00:00:00 IGIHE NETWORK KN KINYARWANDA EN ENGLISH FR FRANCAIS

Bushali ugiye gutaramira i Dubai abifata nk’intsinzi ku njyana yambitswe icyasha

Yanditswe na Nsengiyumva Emmy
Kuya 24 May 2022 saa 07:19
Yasuwe :

Umuraperi Bushali yatangaje ko mu minsi mike iri imbere azataramira abakunzi b’umuziki nyarwanda batuye Dubai muri Leta Zunze Ubumwe z’Abarabu.

Uyu muraperi uri mu bagezweho kugeza uyu munsi, yabwiye IGIHE ko kuba agiye gutaramira i Dubai atari impano yahawe ahubwo ari uko Abanyarwanda batuyeyo batahwemye kugaragaza ko bakunda ibihangano bye.

Ati “Kuba ngiye gutaramira i Dubai hari uwatekereza ko ari impano nahawe cyangwa ari ibyo bankiniye, ntabwo aribyo. Ni uko Abanyarwanda batuyeyo bakunda ibihangano byanjye kandi batahwemye kugaragaza ko banyotewe n’uko nabataramira.”

Yakomeje asaba abanyamakuru n’abafite aho bahuriye n’iterambere rya muzika gukomeza gushyigikira injyana ya Kinyatrap kuko ku bwe asanga ari injyana ikunzwe.

Ati “Dutangira iyi njyana benshi ntabwo batwumvaga, hari umubare munini w’abaduciye intege. Twambitswe ibyasha bitandukanye, gusa uyu munsi urebye uko duhagaze mu muziki nibaza ko ari igihe abahanzi nyarwanda bagashyigikirwa kimwe aho gushaka gutonesha injyana zimwe izindi zikambikwa ibyasha.”

Ubu butumwa Bushali abutanze mbere yo kwerekeza i Dubai aho afite igitaramo ku wa 26 Gicurasi 2022, akazagihuriramo n’abahanzi basanzwe batuye muri uyu Mujyi barimo Green P, Wiz Kool ndetse na Batman ari nawe wagiteguye.

Batman wateguye iki gitaramo we yabwiye IGIHE ko Abanyarwanda batuye i Dubai bategerezanyije amatsiko Bushali cyane ko ari ubwa mbere agiye kubataramira.

Yongeyeho ko uretse gutegura ibitaramo nk’ibi, hari gahunda nyinshi afite zafasha umuziki nyarwanda kurushaho gutera imbere.

Ati “Urebye iki gitaramo ni kimwe ariko mfite n’ibindi byinshi ndi gutekereza, si ibitaramo gusa, hari n’izindi gahunda ndimo zo kureba uko nashinga studio inaha ikora indirimbo mu buryo bw’amajwi ndetse na Video ku buryo uwifuza gukorera inaha byajya bimworohera.”

Green P we ugiye kuririmba muri iki gitaramo, aherutse kutubwira ko ari kwisuganya kugira ngo asohore album ye nshya yiganjeho indirimbo yanafatiye amashusho i Dubai.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .