Zacu TV yakuyeho ikiguzi abantu basabwaga ngo barebe filime nyarwanda

Yanditswe na Nsengiyumva Emmy
Kuya 29 Werurwe 2020 saa 12:33
Yasuwe :
0 0

Hakuweho ikiguzi abantu basabwaga kugira ngo babashe kureba filime nyarwanda kuri Zacu TV muri iki gihe u Rwanda n’Isi yose byugarijwe n’icyorezo cya Covid-19.

Zacu tv isanzwe itambutsa filime z’abanyarwanda na Tanzania ku rubuga rwayo rwa zacutv.com. Yatangaje ko yifatanyije n’abanyarwanda aho bari ku isi hose ibaha uburyo bwo kureba izi filime ku buntu mu gihe cy’iminsi 14 ishobora no kongerwa mu rwego rwo kwifatanya nabo muri ibi bihe bya COVID-19.

Ku muntu usanzwe ufite konti kuri Zacutv.com, arajya kuri urwo rubuga nagera aho bamusaba kwishyura ajye ahanditse “ Coupon Code”. Muri icyo gice, arabona aho ashyira kode yandikemo “STAYHOME” atangire kureba nta kiguzi asabwe.

Aha niho umuntu abona aho ashyiriramo kode

Mu kiganiro twagiranye na Wilson Misago, Umuyobozi wa ZACU TV yagize ati” Zacutv isanzwe iha abantu amafilime mu bihe byiza, rero ntabwo twabibagirwa no mu bihe nk’ibi bikomeye Isi yose iri kurwana no kwirinda ikwirakwizwa rya Covid-19. Niyo mpamvu twabaye dukuyeho amafaranga twacaga abantu ngo babashe kureba filime kuri porogaramu yacu”

Zacu tv ni urubuga rwa internet rumaze imyaka ibiri rwerekanirwaho filime nyarwanda zitandukanye harimo izakunzwe nka City Maid, Seburikoko, Intare y’ingore,Amarira y’urukundo, Giramata n’izindi nyinshi.

Kuri ubu uru rubuga rufite filime z’uruhererekane zirenga 1,500 ndetse n’amafilime arangira arenga 300.

Ubusanzwe abantu barebera kuri uru rubuga bishyura amafaranga angana hafi n’ibihumbi bitanu ku kwezi (5000 Frw).

Zacutv.com ifite abamaze kwiyandikishaho(Subscribers) barenga ibihumbi 20 baturuka mu bihugu birenga 130 byo ku isi.

Wilson Misago, Umuyobozi wa ZACU TV yavuze ko babaye bakuyeho ikiguzi ku bareba filime zabo mu gihe cy'iminsi 14 ishobora kongerwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .