00:00:00 IGIHE NETWORK KN KINYARWANDA EN ENGLISH FR FRANCAIS

Fireman yakozwe ku mutima n’abacamanza bagejeje saa mbili z’ijoro mu rubanza rwe

Yanditswe na Nsengiyumva Emmy
Kuya 10 Kamena 2021 saa 08:44
Yasuwe :
0 0

Si ibintu bimenyerewe ko habaho urubanza rutangira mu gitondo rukageza mu ijoro rukiburanishwa gusa mu rubanza rwa Fireman n’itsinda ry’abantu 10 bakurikiranyweho icyaha cyo gukubita no gukomeretsa, byabayeho.

Ni urubanza rwabaye ku wa Mbere tariki 7 Kamena 2021, mu gitondo saa mbili buri wese yasabwaga kuba yageze ku rukiko rukuru rwa gisirikare kugira ngo yipimishe Covid-19.

Nyuma yo kubona ko buri wese witabiriye iburanisha ari muzima, ahagana saa yine nibwo rwatangiye.

Ni urubanza ruregwamo abantu 11, umunani muri bo bari barakatiwe igifungo cy’imyaka itatu, naho batatu bari baragizwe abere n’urukuko rwa gisirikare.

Aba umunani bari barakatiwe, bajuririye Urukiko rukuru rwa gisirikare basaba kugirwa abere, mu gihe ku rundi ruhande Ubushinjacyaha nabwo bwari bwajuririye ibihano abahamwe n’icyaha bahawe, rukanajuririra abagizwe abere.

Ubu bujurire uko ari bubiri bwagombaga kuburanishwa umunsi umwe, kuko ari urubanza rwari rwaragiye rusubikwa inshuro nyinshi ku mpamvu zitandukanye.

Ibi byatumye rutinda kurangira kuko Perezida w’inteko yaruburanishaga yarupfundikiye saa mbili z’ijoro zibura iminota itanu.

Mu kiganiro na IGIHE, Uwimana Francis, benshi bazi nka Fireman wari umwe mu baburanaga, yashimiye bikomeye ubwitange bwagaragajwe n’inteko yaburanishije urwo rubanza.

Ati “Ikintu kidasanzwe nabonye muri ruriya rubanza, ni ubwa mbere nabonye iburanisha rimara igihe kirekire kuriya, ahantu twageze saa mbili za mu gitondo tukahava saa mbili z’ijoro? […] turabizi n’abandi bose bakora akazi ka Leta ko bigera saa kumi bakitahira!”

Uyu muhanzi avuga ko ubwitange yabonanye abacamanza b’abasirikare atari ibintu wapfa kubona mu nkiko za gisivile cyangwa ahandi aho ariho hose.

Avuga ko hari aho byageze akumva ko rugiye gusubikwa rukazasubukurwa undi munsi, ati “Njye natekerezaga ko nibigera saa kumi bari bufunge tukazasubukura ikindi gihe, ibaze kugira ngo umuntu w’umu Afande kuriya ahere saa mbili yicaye ageze izindi saa mbili.”

Uyu muraperi ahamya ko ubwitange yabonye muri uru rubanza byamuhaye icyizere cy’uko nta muntu rwarenganya.

Ati “Bariya bagabo Imana ijye iborohereza ni ukuri, biriya bintu ntabwo babikora nk’akazi ahubwo nibwo buzima. Reba kwicara kuriya kugira ngo atange ubutabera gusa. Akicara kuriya kugira ngo akurikirane arebe niba nta muntu urengana amurenganure!”

Fireman wamenyekanye mu itsinda rya Tuff Gangz, yajyanywe ku kirwa cya i Iwawa muri Nzeri 2018, nyuma y’umwaka muri Nzeri 2019 nibwo yavuyeyo nyuma y’umwaka agororwa.

Amaze amezi abiri avuye i Iwawa, mu Ugushyingo 2019 yaje gutabwa muri yombi asinjwa kuba hari abagororwa babiri ngo yakubitiye i Iwawa akabakomeretsa.

Urukiko rwa gisirikare rwaje kumurekura by’agateganyo muri Gashyantare 2020, icyakora iperereza rirakomeza.

Mu Ugushyingo 2020 yakatiwe n’Urukiko rwa Gisirikare igihano cyo gufungwa imyaka itatu azira gukubita no gukomeretsa umwe mu bagororwa bagororerwaga i Iwawa.

Nyuma Fireman yaje kujuririra Urukiko Rukuru rwa Gisirikare ahamya ko yarenganye, asaba kugirwa umwere.

Uko yajuriye ni nako Ubushinjacyaha bwa gisirikare bwajuriye bugaragaza ko uyu kimwe na bagenzi be bahawe igihano gito cyane kandi batagikwiye.

Muri ubu bujurire Fireman yasabaga kugirwa umwere, naho Ubushinjacyaha bukamusabira gufungwa imyaka 15.

Byitezwe ko urubanza rwe n’abo bareganwa ruzasomwa tariki 2 Nyakanga 2021.

Ikiganiro kirambuye na Fireman

Ibyaha Fireman akurikiranyweho bivugwa ko yabikoreye i Iwawa
Fireman yari yakatiwe imyaka itatu y'igifungo n'Urukiko rwa gisirikare
Uyu muraperi yashimiye abacamanza bagejeje saa mbili z’ijoro bakiburanisha urubanza rwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .