Ibyo wamenya kuri Ishimwe umaze imyaka irenga ibiri akora muri Netflix

Yanditswe na Nsengiyumva Emmy
Kuya 30 Nyakanga 2020 saa 09:18
Yasuwe :
0 0

Ishimwe Charles w’imyaka 32 ari mu bakomeye mu bakozi b’ikigo kizwi cyane ku Isi mu ruganda rwa sinema cya NetFlix, aho amazemo imyaka irenga ibiri.

Netflix ni ikigo cyo muri Leta Zunze Ubumwe za Amerika gicuruza filime binyuze kuri Internet, kikaba kiri mu bikomeye cyane ku Isi.

Ishimwe umaze imyaka irenga ibiri akora muri iki kigo, yavukiye muri Repubulika Iharanira Demokarasi ya Congo ataha mu Rwanda mu 1994 ubwo yari afite imyaka itandatu y’amavuko. Yakuriye mu karere ka Bugesera kugeza arangije amashuri yisumbuye ndetse n’umwaka wa mbere wa Kaminuza yari yatangiye kwiga mu Rwanda.

Yize amashuri abanza muri Nyamata Primary School, icyiciro cya mbere cy’amashuri yisumbuye yayize muri Nyagatare Secondary School, yiga icyiciro cya kabiri cy’amashuri muri Kigali International Academy, ari naho yarangirije ayisumbuye.

Yize umwaka umwe muri Kaminuza i Mudende mbere yuko mu 2010 yerekeza muri Leta Zunze Ubumwe za Amerika kwiga ibijyanye n’itangazamakuru.

Ishimwe avuga ko yabyize imyaka ibiri arangije ajya kwiga ibijyanye na Sinema muri Emerson College, ishuri ryigisha ibijyanye na “Film production na Tv production”.

Ubwo yari ari gusoza amasomo ye, yakoze amezi atanu yimenyereza umwuga mu kigo cya HBO akora mu gice cya “Post production”. Akirangiza kwiga yahise ahabona akazi n’ubundi akora bimwe yimenyerezagamo, aha yari yungirije abarangizaga filime “Assistant- Post Production-Live Action shows”.

Avuga ko yagize uruhare mu ikorwa ry’imishinga itandukanye nka; Veep S05, Crashing S01, Ballers S03, Silicon Valley S05, aho izi filime yazikozemo mu gihe cy’imyaka ibiri.

Nyuma y’iki gihe, Ishimwe yaje kubona akazi muri Netflix nk’umukozi uhoraho muri “Post production Department” mbere yuko yinjira muri Animation.

“Assistant- Post Production Management -Animation” ni wo mwanya Ishimwe afite muri Netflix, aho akora akazi kajyanye no guhuza ibikorwa ku buryo iyi kompanyi ikora filime zayo ndetse no gushaka izindi bagura zujuje ibisabwa.

Filime nyarwanda ndetse n’izo muri Afurika zibura iki ngo ziganze kuri Netflix?

Muri iyi minsi biragoye kubona filimi zo muri Afurika ziganje kuri NetFlix. Ishimwe avuga ko hari igihe kizagera filimi zo muri Afurika zikajya ku isoko mpuzamahanga kuko ibigo byinshi bigurisha filime ku Isi byifuza izitandukanye n’izo abantu bamaze kumenyera.

Ati “Igihe kizagera zize rwose kubera ko studio zitandukanye uretse na Netflix ziri gushakisha filime zitandukanye zitari izo abantu bamenyereye, gusa kugira ngo bagure filime runaka bisaba kuba ifite inkuru ikomeye yarebwa na buri muntu wese ku Isi nzima. Ni ibintu bizashoboka bitewe n’imbaraga abantu bazashyiramo.”

Uyu mugabo yagaragaje ubumenyi buke ku bakora filime mu Rwanda no muri Afurika muri rusange, no kuba nta murongo w’uruganda abakora sinema bafite, nk’impamvu y’idindira ry’uyu mushinga.

Urugero yatanze, “Iyo washoye amafaranga yawe muri filime si wowe uyiyobora, uyishakira amasoko, aho ikinirwa, abakinnyi n’ibindi buri kintu kigira ikipe igishinzwe”.

Yasabye abanyarwanda n’abandi kugira ubunyamwuga mu gukina filime zabo kugira ngo filime zabo zirusheho kuba zagera kure.

Ishimwe yavuze ko ururimi filime ikinwemo rutagirwa urwitwazo rwo kutagera kure kuko hari uburyo ikoranabuhanga ryabyoroheje. Urugero ni uko ushobora gushyiraho amagambo asobanura ibyo bari gukina cyangwa gusemura mu zindi ndimi.

Atekereza kuzazana ubumenyi bwe mu Rwanda akazamura urwego rwa filime nyarwanda

Ishimwe yagize ati “Ndabyifuza cyane ariko mu myaka ya mbere imbaraga zose nazishyize mu kwiga cyane, atari ukuvuga kujya mu ishuri ahubwo kwiga mu kazi. Intego mfite ni uko umunsi umwe nabona filime yo mu karere k’iwacu iri gucuruzwa hano muri Amerika.”

Uyu mugabo avuga ko nubwo bitamusaba kugaruka gutura mu Rwanda ariko azashaka uko yafasha abakora filime mu Rwanda ku buryo hakorwa inziza kurusha izikorwa kugeza ubu.

Amara abanyarwanda impungenge yavuze ko ku bwe igihe kigeze ngo atangire kubitekereza.

Ati ”Ni umusanzu nanjye nifuza kuzatanga kuko nanjye hari abantu bagiye bamfasha. Njya nifuza ko igihe cyagera nkagira ibyo nsangiza urubyiruko rushaka kugana muri sinema rukumva ko ari akazi nk’akandi atari ibintu by’imyuga nk’uko benshi babifataga.”

Agira inama urubyiruko, yibukije ko buri kimwe cyose ushyizeho umutima gishoboka. Ati “Sinigeze ntekereza ko naba mu ruganda rwa sinema usibye kuba njye narakundaga kureba agasobanuye ariko sinigeze ntekereza ko naba muri uru ruganda, nageze muri Amerika mbona amahirwe yo kubyiga mpita nanabikora.”

Ishimwe yasabye abana bakiri bato gushyira umuhate mu gukunda ibyo bakora ndetse no gukunda kwiga no kubyihugura.

Ikiganiro na Ishimwe, Umunyarwanda umaze imyaka ibiri akorera mu kigo cya Netflix

Ishimwe Charles, Umunyarwanda umaze imyaka irenga ibiri akora mu kigo cya Netflix
Ishimwe n'umufasha we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .