Igihangange mu muziki Oumou Sangaré azahurira na Miss Shanel mu iserukiramuco i Kigali

Yanditswe na Uwiduhaye Theos
Kuya 22 Ukwakira 2019 saa 09:56
Yasuwe :
0 0

Kaminuza ya Global Health Equity, mu kwezi gutaha izatangiza iserukiramuco rya Hamwe Festival rizabera mu Mujyi wa Kigali. Rizitabirwa n’abahanzi bakomeye barimo Nirere Shanel ndetse na Oumou Sangaré wubatse amateka mu muziki wa Mali.

Iri serukiramuco rifite intego yo gusangizanya akamaro k’ubuhanzi bw’uburyo bwose ndetse n’uko bwagira uruhare mu bwagira mu bijyanye n’ubuzima.

Muri iri serurikiramuco abahanzi, abacuruzi, inzobere mu buzima ku rwego rw’Isi, n’abandi batandukanye bazerekana uburyo imbaraga z’ubuhanzi zafasha mu buzima.

Hamwe Festival izaba ibaye ku nshuro ya mbere mu Rwanda, izaba hagati yo ku wa 8 na 13 Ugushyingo 2019 ahantu hatandukanye.

Ku wa 8 Ugushyingo 2019, rizabera muri Kigali Convention Centre. Ku wa 10 Ugushyingo 2019, hazabaho ikiganiro na Cynthia Fleury muri Kigali Convention Centre. Uyu akaba umufaransa w’umu-philosophe ndetse w’umuhanga mu by’imitekerereze uzaba avuga ku kamaro k’ubumuntu mu bijyanye na serivisi z’ubuzima. Kuri iyi tariki kandi hazabaho igitaramo muri Camp Kigali.

Iki gikorwa kizahuriza hamwe abanyamuziki bagiye bakoresha imiyoboro yabo mu kuvugira ubuzima bw’abagore. Uzaba ari uw’imena ni Oumou Sangaré wo muri Mali aririmba mu njyana gakondo ya Wassoulou.

Uyu mugore w’imyaka 51 ni umwe mu bahanzi bakomeye ndetse yanegukanye Grammy Award anaba umukemurampaka muri Prix Découvertes mu 2015 na 2019.

Muri iki gitaramo azafatanya na Nirere Shanel uri mu bagore batumye benshi mu bakobwa batinyuka umuziki mu Rwanda.

Iki gitaramo cyateguwe n’umuryango wa Globe’athon, ufite gahunda yo kurandura burundu kanseri y’abagore ku Isi yose.

Ku wa 11 na 12 Ugushyingo, ku cyicaro cya University of Global Health Equity [UGHE] hazabaho ibiganiro hagati y’abahanzi, abanyeshuri muri iyi kaminuza ndetse n’impuguke mu by’ubuzima ku Isi.

Ku wa 13 Ugushyingo hazabaho umugoroba w’imbyino. Aho hazagaragazwa imbyino herekanwa uburyo uburyo zafasha mu gukemura ibibazo byo mu bwonko.

Hazagaragaramo Dr. Rainbow Ho wagiye wegukana ibihembo bitandukanye mu bijyanye n’ubushakashatsi akaba n’umubyinnyi wabigize umwuga guturuka muri University of Hong Kong azafatanya na Wesley Ruzibiza washinze Amizero Dance Company ikorera mu Rwanda.

Nirere Shanel uzaririmba mu iserukiramuco yakunzwe mu ndirimbo ‘Nakutaka’ yakoranye n’umuhanzi Wyre, ‘In love’ yakoranye na Rafiki, ‘Ndarota’ yamumenyekanishije birushijeho, ‘Ubufindo’ n’izindi nyinshi.

Ni umwe mu bahanzi baje mu kiragano cyari kirimo abakomeye bamenyekanye mu muziki nyarwanda barimo Rafiki, Miss Jojo n’abandi. Ubu abana mu Bufaransa n’umuryango we.

Nirere Shanel agiye gutaramira abatuye i Kigali
Nirere Shanel ni umwe mu bahanzikazi bamaze igihe kinini banatangiye mu bihe byari bigoye
Oumou Sangaré ni umwe mu bazaba bagize akanama nkemurampaka ka Prix Decouvertes uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza