Umwe mu bazi iby’aya makuru waganiriye na IGIHE, yavuze ko King James yerekeje muri Amerika agiye kuririmba mu bukwe bw’inshuti ze ari nazo yubakiyeho yandika iyi ndirimbo ye nshya.

Yagize ati “Indirimbo ‘Ejo’ yubakiye ku rukundo rw’inshuti ze zituye muri Leta Zunze Ubumwe za Amerika. Ni abantu bafite urukundo rukomeye cyane rwanatumye agira igitekerezo cyo gukora iyi ndirimbo, banemeranya ko azayibaririmbira nibaramuka bakoze ubukwe.”

Hari amakuru agera kuri IGIHE avuga ko amashusho yafashwe ubwo King James yaririmbaga mu bukwe bw’izi nshuti ze ari nayo azifashishwa mu gukora amashusho y’iyi ndirimbo yanamaze gusohora.

Uretse ubu bukwe King James yaririmbyemo ku wa 12 Kamena 2022, hari kandi amakuru avuga ko uyu muhanzi ari mu biganiro n’abashoramari bazakorana mu bucuruzi bwe ari nako akomeza ibiganiro n’abashya bifuza gukorana.

Iyi ndirimbo nshya ya King James ibaye iya mbere mu ziri kuri album ye nshya aherutse gutangaza ko agiye gutangira kuyishyira kuri YouTube nyuma y’amezi atandatu iri gucururizwa ku rubuga rwe Zana Talent.

Album nshya ya King James iriho indirimbo 17 zirimo ‘Ejo’, ‘Ubanguke’, ‘Ndagukumbuye’ ye na Ariel Wayz, ‘Ubushobozi’, ‘Ubudahwema’, ‘Habe namba’, ‘Uhari Udahari’ , ‘Uyu Mutima’, ‘Nyabugogo’, ‘Reka gukurura, ‘Kimbagira’, ‘Nyishyura Nishyure, ‘Ikiniga, ‘Nzakuguma Iruhande’, ‘Pinene yahuriyemo na Bulldogg, ‘Hinduka’ na Inshuti Magara yakoranye na Israel Mbonyi.

King James yasohoye indirimbo yakoze yubakiye ku rukundo rwa Dely na Shax aherutse no kuririmbira mu bukwe

King James agiye kuzuza ibyumweru bibiri ari muri Leta Zunze Ubumwe za Amerika

King James n'inshuti ze zirimo Cedru na Ernesto ubwo bari batashye ubukwe bwa Dely na Shax