00:00:00 IGIHE NETWORK KN KINYARWANDA EN ENGLISH FR FRANCAIS

Kubura aho bacuranga byatumye itsinda ‘His Voice Rwanda’ rigurisha ibikoresho bya muzika

Yanditswe na Nsengiyumva Emmy
Kuya 16 Mata 2021 saa 02:44
Yasuwe :
0 0

Coronavirus ikomeje kwangiza ibintu byinshi, ubukungu bwa benshi bukajya mu kangaratete ku buryo umuntu agera n’aho asaba uwo yimye, gusa ubuze uko agira akagwa neza akanga guhemuka ahubwo agateza utwe bimwe bya rya tungo rikugoboka wakennye.

Itsinda rya ‘His Voice Rwanda’ rigizwe n’umugabo n’umugore bize umuziki bakawugira akazi ka buri munsi, ryafashe icyemezo cyo kugurisha ibyuma bifashishaga mu birori kubera ubukene batewe n’icyorezo cya Covid-19 cyasanze bamaze ukwezi kumwe gusa bakoze ubukwe.

Iyi Band yari imaze kubaka izina mu muziki w’u Rwanda, usibye gucuranga mu birori bitandukanye, yagiye inagaragara mu tubari na hotel isusurutsa abantu. Ni imwe mu zitabiriye irushanwa rya ‘Batlle of the bands’, ryateguwe na Kigali Marriott Hotel mu 2019.

Nyuma y’uko icyorezo cya Covid-19 kigeze mu Rwanda kigashegesha bikomeye uruganda rw’imyidagaduro, abagizweho ingaruka zigaragara ni abari batunzwe no gucuranga mu tubari no mu birori bitandukanye kuko ibi bikorwa bimaze umwaka urenga bifunze.

Iyakare Wensislas ufatanyije iyi Band n’umugore we, yavuze ko ubuzima bw’abakora umuziki wo gucuranga Live mu tubari na hotel no mu birori bitandukanye budahagaze neza kuko iki cyorezo cyaje kikangiza byinshi mu gihe kinini.

Mu kiganiro yagiranye na IGIHE, Iyakare yavuze ko we n’umugore we bari baragiye bizigama ku buryo igihe kinini Covid-19 yari imaze batigeze bagira ikibazo.

Ati “Njye n’umugore wanjye twakoraga umwuga wo gucuranga, uko twinjizaga twarizigamaga kugira ngo dukore indi mishinga. Ku ruhande rwacu byibuza iki cyorezo cyasanze twarizigamye, ariko uko igihe kigenda gishira niko bwa bwizigame bwagabanutse cyane.”

Uyu mugabo yakomeje avuga ko nyuma y’aho ubwizigame bwabo bukendereye bakaba batabona icyizere cy’ubundi buzima, bafashe icyemezo cyo kugurisha ibyuma byibuza ngo iminsi yisunike kabiri.

Ati “Urabona dufite abana bato b’impanga bafite imyaka ibiri, kubera ubwizigame bwacu bwashize kandi abana bakeneye kubaho neza ndetse natwe ubwacu, naravuze nti ibi bikoresho reka tubitange.”

Kutabona ubukode bw’inzu babamo no gushakisha imibereho ya buri munsi ni yo yabaye intandaro yatumye abagize ‘His voice Rwanda’ bashyira ku isoko ibyuma bakoreshaga mu muziki.

Iyakare yavuze ko bagerageje gukomanga ahashoboka hose ngo barebe ko babona ubufasha ariko bagaheba.

Urugero yatanze ni uko bigeze no kwitabira amarushanwa y’imishinga yatewe inkunga na Minisiteri y’Urubyiruko n’Umuco ariko uwo batanze wo kwigisha abakiri bato umuziki ntubashe gutoranywa.

His Voice Rwanda ni itsinda rigizwe n'umugore n'umugabo bose bize umuziki
His Voice Rwanda bari kumwe na Makanyaga Abdul
Ibyuma iri tsinda ryifashishaga byashyizwe ku isoko
Bahisemo gushyira ku isoko ibi byuma mu gushakisha imibereho y'abana babo n'ayabo muri rusange

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .