Patoranking uheruka mu Rwanda yatashye yirahira Perezida Kagame

Yanditswe na Uwiduhaye Theos
Kuya 12 Ukwakira 2019 saa 05:49
Yasuwe :
0 0

Patrick Nnaemeka Okorie wamamaye mu muziki nka Patoranking, yahishuye ko akunda byimazeyo Perezida Kagame.

Uyu muhanzi yashyize ifoto ya Perezida ku rukuta rwa Twitter, arangije ati “Nkunda uyu mugabo mubona hano Perezida Paul Kagame. Papa wa nyawe wa Afurika, umuyobozi nyawe w’umunyafurika.”

Mu bitekerezo byinshi byatanzwe birimo abanyarwanda n’abiganjemo abanya-Nigeria byagaragazaga ko Paul Kagame ari perezida w’intangarugero.

Hari nk’uwitwa Daniel Green Eshiet wo muri Nigeria yavuze ko nabo bifuza umeze nka we.

Ati “Ni umuyobozi udasanzwe. Ntewe ishema nawe ndetse n’ibyiza ari gukorera igihugu cye. Dukeneye Perezida umeze nka we muri Nigeria ariko siko bimeze kuko uwo dufite biratandukanye.”

Patoranking uherutse mu Rwanda aherutse no guhishura ko hari indirimbo yakoranye na Ngabo Medard Jobert umaze kwamamara nka Meddy mu muziki.

Ni nawe wari umuhanzi mukuru mu gitaramo cy’Inama nyafurika y’Urubyiruko izwi nka Youth Connekt Africa, cyabaye ku wa 9 Ukwakira 2019.

Ubwo iyi nama yaberaga i Kigali guhera kuri uyu wa Gatatu tariki 9 kugeza ku wa 11 Ukwakira 2019, yahawe ijambo ubwo yatangizwaga ngo aganirize abayitabiriye.

Mu magambo ye yabanje kuvuga ko ari umuhanzi ukunda gufatanya n’abandi kandi akaba yaranabigaragarije kuri album yise ‘Wilmer’ aheruka gushyira hanze.

Ati “Nkunda gufatanya n’abandi bahanzi nk’uko mubizi nagiye nkorana n’abatandukanye bo ku migabane itandukanye. Ubu namaze gukorana indirimbo na Meddy wo mu Rwanda. Ntabwo mwari mubizi.”

Uyu muhanzi yanavuze ko yabayeho mu buzima bugoye akiri muto agakurira mu muryango iwabo bakodesha inzu amadorali abiri.

Se ntiyashoboraga kubona amafaranga yo gukomeza kwishyura inzu, uyu musore ahitamo gukora ubucuruzi ku muhanda kugira ngo yite ku muryango we nyuma aza kujya mu muziki ukanamuhira akabona akaryo.

Patoranking yasesekaye i Kigali ku mugoroba wo kuri uyu wa Kabiri aho agiye guhurira mu gitaramo na Meddy, Charly na Nina ndetse na Bruce Melodie. Mu muziki we yibanda ku njyana za Dancehall na Reggae.

Yaririmbye nyinshi mu ndirimbo zaciye ibintu muri Afurika nka ‘My Woman’, ‘No Kissing Baby ft. Sarkodie’, ‘Girlie ’O’ Remix yakoranye na Tiwa Savage, ‘Love You Die’ yakoranye na Diamond, ‘Suh Different’, ‘God Over Everything’ n’izindi.

Uyu musore w’imyaka 29 yavukiye ahitwa Ijegun-Egba, Alimosho muri Leta ya Lagos muri Nigeria.

Mu 2012 nibwo yatangiye gukora umuziki mu buryo bw’umwuga, icyo gihe yakoze indirimbo yitwa "Iya Bisi" yahuriyemo na Qdot & Kbaj ariko ntiyakundwa ku rwego rwo hejuru, iyitwa ‘Alubarika’ yakoranye na Timaya mu 2014 niyo yatangiye kugurura amarembo mu muziki we.

Yaherukaga mu iserukiramuco mpuzamahanga ry’umuziki rya Kigali Up Music Festival ryabereye ku Kicukiro ku wa 19 Kanama 2017, icyo gihe yasize inkuru i Kigali yo kuririmbira kuri CD afite umunaniro, asezeranya abakunzi be kuzagaruka gushimisha abo yasigiye umunabi.

Inama ya YouthConnekt ihuriza hamwe urubyiruko ruturutse mu bihugu bitandukanye muri Afurika, hakaganirwa ku nsanganyamatsiko zinyuranye. Muri uyu mwaka zahaganirwa ku iterambere ry’urubyiruko mu bijyanye n’inganda.

Muri izi nama kandi hifashishwa abantu batandukanye bafite aho bageze bakaganira n’urubyiruko. Inama nk’iyi yabaye muri Nyakanga 2017 yitabiriwe n’umuhanzi Akon n’umunyemari ukomeye w’umushinwa, Jack Ma. Uyu mwaka abantu 10,000 nibo bitabiriye iri kubera muri Kigali Arena.

Patoranking asuhuzanya na Perezida Kagame mu nama ya YouthConnekt Africa 2019
Patoranking yahamije ko Perezida Kagame ari umubyeyi wa Afurika
Patoranking yari yatumiwe nk'umuhanzi mukuru mu gitaramo cy’Inama nyafurika y’Urubyiruko izwi nka Youth Connekt Africa, cyabaye ku wa 9 Ukwakira 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza