Patrick Nyamitari yatangije amarushanwa agamije kurwanya inda zitateganyijwe

Yanditswe na Uwiduhaye Theos
Kuya 12 Mutarama 2021 saa 04:05
Yasuwe :
0 0

Umuhanzi Patrick Nyamitari abinyujije muri sosiyete ye yise PN Drealand Ltd yatangije amarushanwa ya muzika ku rubyiruko yahawe inyito ya “Impuruza Contest", agamije gushakisha impano nshya zizifashishwa mu kurwanya ikibazo cy’inda zitateganijwe ziterwa abangavu.

Abifuza kwitabira iri rushanwa barasabwa kwiyandikisha bohereza amashusho atarengeje umunota umwe ku mbuga nkoranyambaga za Instagram, Facebook na Twitter. Urushanwa yifata amashusho avuga amazina ye yombi maze akaririmba indirimbo yose ashaka.

Mu kuyashyira ku mbuga bakoresha bazajya bashyiraho hashtag ya #Impuruzacontest maze bahuze (tag) @pndreamland na @artrwanda_ubuhanzi. Aya marushanwa azitabirwa n’urubyiruko guhera ku rufite imyaka 12 kugeza ku rutarengeje 21.

Patrick Nyamitari yavuze ko ku nshuro ya mbere bazatoranya abahanzi 10 bagendeye ku mpano zabo.

Aba nibamara gutoranywa bazabazwa ibibazo bijyanye n’uko bumva icyo kibazo kijyanye n’inda zitateganyijwe n’uko bakoresha impano zabo mu kugikemura, ubundi nibarangiza bohereze amashusho basubiza ibyo bibazo.

Nyuma akanama nkemurampaka kazabahitiramo ikindi cyo gukora kijyanye no kuririmba buri wese ahabwe insanganyamatsiko yavugaho. Aha hazatoranywamo abahanzi batandatu buri umwe ahabwe ibihumbi 100 Frw.

Muri aba batandatu ni naho hazavanwamo batatu ba mbere bazahembwa ibihembo nyamukuru muri iri rushanwa.

Guhera ku itariki 11 kugeza ku wa 18 Mutarama nibwo aya mashusho yemerewe kwakirwa mu gihe nyuma yaho, akanama nkemurampaka kazatangaza abemerewe gukomeza mu cyiciro gikurikiraho.

Abazatsindira kwinjira mu cyiciro cya kabiri bazahabwa igihembo gihwanye na 100 000 Frw. Naho, abazatsinda irushanwa ryose uwa mbere azahembwa 500 000 Frw, uwa kabiri 300 000 Frw naho uwa gatatu ahabwe 200 000 Frw, bongererweho no gukorerwa indirimbo mu majwi n’amashusho.

Aba bahanzi bashya kandi bazafatanya na Patrick Nyamitari gukomeza gukora ubukangurambaga bugamije gukumira inda zitateganijwe cyane cyane, mu rubyiruko hifashishijwe muzika n’imyidagaduro muri rusange.

‘Impuruza’ ni umushinga wa Patrick Nyamitari watoranijwe mu mishinga 23 muri 30 yiganjemo iy’ikoranabuhanga yari ihataniye inkunga yo gufasha abahanzi guhangana n’ingaruka za COVID-19.

Uyu mushinga uzaba ugizwe n’amarushanwa ya muzika azakorerwa kuri murandasi, mu rwego rwo kubahiriza amabwiriza yo kwirinda ikwirakwizwa rya COVID-19.

Iyi nkunga yashyizweho na Imbuto Foundation ifatanyije na Minisiteri y’Umuco n’Urubyiruko mu rwego rwo kunganira abakora mu ruganda rw’ubuhanzi n’imyidagaduro mu gihe ibikorwa byabo byahungabanyijwe n’iki cyorezo.

Patrick Nyamitari yatangije amarushanwa yo kurwanya inda zitateganyijwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .