Sandra Miraj agiye gusezera umuziki utaramuhiriye

Yanditswe na Nsengiyumva Emmy
Kuya 11 Mutarama 2021 saa 09:36
Yasuwe :
0 0

Sandra Miraj uri mu bagore ba mbere bake batinyutse gukora injyana ya Hip Hop mu Rwanda, yahishuye ko agiye gusohora indirimbo ya nyuma agahita asezera umuziki.

Abinyujije ku rukuta rwe rwa Instagram, Sandra Miraj wasibye amafoto ye yose kuri uru rubuga, yabwiye abamukurikira ko yiteguye gusohora indirimbo nshya ikaba iya nyuma azahita asorezaho urugendo rwe mu muziki.

Ibi yabitangaje ubwo yari ari kuganira n’abamukurikira kuri Instagram. Mu bibazo bya mbere yabajijwe n’abakunzi be ubwo yari abahaye umwanya ngo buri wese amubaze ibyo yifuza, harimo igihe azasohorera indirimbo nshya.

Asubiza uwari umubajije igihe azasohorera indirimbo nshya, Sandra Miraj yagize ati “Ni vuba cyane ariko izahita iba iya nyuma.”

Hari undi mukunzi w’umuziki w’uyu muraperikazi wamubajije niba koko agiye kureka umuziki, undi nawe mu kumusubiza agira ati “Nibyo ngiye guhagarika umuziki.”

Sandra Miraj agiye kureka umuziki nyuma y’igihe adasohora indirimbo dore ko mu 2019 aribwo yaherukaga gukora iyo yise “Hagenimana”.

“Hagenimana” ni indirimbo yasohoye nyuma y’imyaka itatu adakora umuziki kuko yaherukaga kugaragaza ingufu mu 2016.

Ubwo yasohoraga iyi ndirimbo ye nshya, yavugaga ko yafashe igihe gihagije ngo yige uko yakora umuziki ukanamwinjiriza mu buryo bw’amafaranga kuko igihe yari awumazemo utari uhagaze neza.

Icyakora ibyo yatangaje icyo gihe byabaye amasigarabyicaro kuko ntacyo yigeze ahindura ku mikorere ye.

Sandra Miraj yari yijeje abakunzi b’umuziki we album ye ya mbere, icyakora nayo yasigaye mu magambo agiye gusoza umuzikii atayimuritse.

Sandra Miraj ari mu bagore bake batinyutse injyana ya Hip Hop mbere, avuga ko yayikomoye ku rukundo yakundaga umuziki wo muri iyi njyana.

Sandra Miraj yakoze indirimbo zabiciye bigacika zirimo izo yise; Andi mahirwe yakoranye na Bull Dogg, Isezerano yakoranye na Butera Knowless,Byakaze,Impeta y’urupfu yakoranye na Green P,Icyemezo yakoranye na P Fla ndetse na Jody, Powa powa n’izindi.

Ubwo aheruka kugaragara mu gitaramo, hari muri Mutarama 2019 ubwo yashwanaga n'umugore wa Bulldogg
Inkuru zimushyira mu rukundo na Bulldogg ziri mu zaranze urugendo rw'umuziki w'uyu muraperikazi
Sandra Miraj ari mu bagore bake batinyutse bakinjira mu njyana ya Hip Hop mbere
Agiye guhagarika umuziki atamuritse album yari amaze umwaka urenga yijeje abakunzi be
Yavuze ko agiye guhagarika umuziki nyuma y'umwaka urenga adasohora indirimbo
Abamuzi neza bahamya ko uyu muraperikazi yahaye umwanya munini gahunda z'ubuzima bwe bwite kuruta umuziki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .