Kuva ku wa 26 Ugushyingo, abasaga 1000 bo muri Afurika barimo abafata ibyemezo, inzobere mu bidukikije n’abagize za guverinoma, bari bateraniye i Kigali. Bigiye hamwe ingamba zo kubaka ubukungu burambye bubungabunga ibidukikije, mu bisubizo bibereye Afurika.

Ryasojwe n’igitaramo cyanatangiwemo ibihembo ku ndashyikirwa mu itangazamakuru, inzego z’ibanze, inganda n’urubyiruko mu kubungabunga ibidukikije.

Cyabereye i Rusororo muri Intare Conference Arena. Cyitabiriwe n’abari mu nama baturutse imihanda yose ya Afurika n’ibihumbi by’abakunzi b’umuziki i Kigali.

Sauti Sol yaherukaga kuririmbira mu Rwanda mu gitaramo cyiswe “New Year Countdown’’, yongeye kwerekwa urukundo. Yabanjirijwe ku rubyiniro n’abahanzi Charly na Nina na Bruce Melody bakunzwe mu rwa Gasabo.

Amagorane y’ibyuma!

Abanyamuziki bize ku Nyundo babarizwa muri Sebeya Band, basesekaye ku rubyiniro saa kumi n’ebyiri n’iminota 38, batanga integuza ko ikirori kigiye gushya.

Ibyuma byahise bizamo amakaraza ariko abantu ntibicwe n’irungu! Batangiye gucinya akadiho mu ndirimbo zirimo ‘Gatambatamba’, ‘Kirisese’, ‘Ibare’, ‘Weka morale’ n’izindi.

Byasuzumwaga Dj Miller avanga imiziki yiganjemo iyo muri Amerika ndetse abayikunda bo bari mu buryohe, bawukata.

Isura y’ikirori yahindutse ubwo MC Lion Imanzi yahamagaraga Charly na Nina bakiriwe mu byishimo bihanitse.

Baririmbye indirimbo zabatumbagije nka “Zahabu”, “Face to face”, “I do” “Komeza Unyirebere”, “Owooma”, “Agatege” n’ “Indoro”.

Nina wabyinaga yifashe ku myanya y’ibanga, yanyuzagamo agahamara abasore bafatanya gukaraga umubyimba.

Bakuriwe mu ngata na Bruce Melody. Uyu muhanzi yaserutse yahinnye ukuguru kw’ipantaro, anakenyeye agakapu.

Ubwamamare bwe bwazamuye morale y’abafana muri “Turaberanye”, “Complete Me”, “Ntundize”, “Blocka”, “Ndakwanga”, “Ikinya” n’“Ikinyarwanda” yakoranye na Riderman.

Yatanze ubutumwa bukangurira urubyiruko kubungabunga ibidukikije.

Ati “Nishimiye ko ndi kuririmbira abantu nkamwe. Ubutumwa mufite mubusangize abandi kuko bwakwira mu gihugu mu munota umwe.”

Indirimbo zose yaririmbanaga n’abakunzi be. Yasoje na Ndumiwe, ahabwa amashyi y’urufaya.

Sauti Sol yari ifitiwe urukumbuzi rwinshi yaharuriwe umuhanda na Dj Miller wamaze iminota 36 avanga umuziki ari nako abacuranzi b’iri tsinda bategura ibyuma.

Iri tsinda ry’i Nairobi ryaririmbwaga buri kanya, abafana bariteye imboni saa 22:36.

Abarigize barimo Bien-Aimé Baraza, Willis Austin Chimano, Delvin Savara Mudigi na Polycarp Otieno bapfukamye hasi, bashimira abafana urukundo n’icyizere baberetse.

Baraza yahise abaza ati “Kigali amakuru? Kigali turabakunda cyane.”

Ikirori cyanzitse baririmbana n’abakunzi babo ijambo ku rindi muri “Sura yako”, “Nerea”, “Live and die in Africa”, “Unconditional bae”, “Kuliko jana”, “Isabella” na “Short and Sweet”.

Sauti Sol yavuze ku Rwanda rushya

Umuhanzi Baraza wamanukaga kuririmbana n’abafana yavuze ko bishimira kuba mu Rwanda.

Yagize ati “Buri gihe iyo tuje i Kigali tubona urukundo. Tubona u Rwanda rusukuye, rwiza, rubungabunga ibidukikije. U Rwanda rwose ni rwiza uhereye Musanze na Rubavu. Ndabasaba ko mufasha u Rwanda kuguma uko ruri. Ni icyitegererezo muri Afurika.”

Yaniseguye ku bakunzi ba Sauti Sol kubera umuziki wabanje kuzamo amakaraza. Ati “Turabakunda kandi turiseguye kubera ibyuma.”

Igitaramo kigana ku musozo, abakobwa b’abanyabirori b’i Kigali bahamagawe ku rubyiniro, bafatanya na Sauti Sol mu ndirimbo ’Shake yo bam bam’ babyinaga bakaraga ikibuno.

Abitabiriye bahawe akanozangendo ka “Melanin” yaririmbwe abagize Sauti Sol bakubye akabero hasi. Bagiye bagifitiwe urukundo!

Umurishyo uhumuza igitaramo wavugijwe saa tanu n’iminota 58 ku isaha ya Kigali.

Lion Imanzi ni we wayoboye igitaramo

MC Lion Imanzi yahaye amahirwe umwe mu rubyiruko asukiranya amagambo arimo ubutumwa bwo kubungabunga ibidukikije binyuze mu gukoresha amazi neza

Iki gitaramo cyitabiriwe n'abantu b'ingeri zitandukanye. Abananirwaga bakubaga akabero hasi

Charly na mugenzi we beretswe urukundo

Yaririmbanaga n'abafana be

Charly yari agaragiwe n'umusore yahamagaye mu bafana ngo aze kumubyinisha

Nina bamubyinishije kugeza umu-bouncer aje gukura umusore ku rubyiniro

Charly na Nina bafashwaga na Sebeya Band igizwe n'abanyeshuri bize umuziki ku Nyundo

Hari umuziki w'umwimerere. Uyu musore yanyuze benshi mu kuvuza imirya ya gitari

Nina yakunze kubyina akaraga ikibuno imbere y'abafana be

Nina yasanze abakunzi b'umuziki be bafatanya kuririmba

Nina yari yizihiwe no gutaramana n'abakunzi be

Abakunzi b'umuziki bitabiriye igitaramo ari benshi

Abanyamuziki banyuze ku Nyundo bafashije abahanzi b'Abanyarwanda mu ndirimbo zanyuze benshi

Dj Miller ni we wavangaga imiziki

Umuziki wacuranzwe na Dj Miller watumye benshi bajya mu bicu

Abanyamuziki bawukase karahava

Babyinaga mu buryo bugezweho

Akanyamuneza kari kose ku bitabiriye

Iki gitaramo cyasoje Ihuriro rya mbere Nyafurika ku bukungu butangiza Ibidukikije ryateraniye i Kigali mu minsi itanu

Inkweto Bruce Melody yari yambaye

Igitaramo cyarimo uburyohe bw'umuziki w'umwimerere

Melody yari yambaye ipantaro yazinze ukuguru kumwe, anakenyeye agakapu kamezze nk'abacuruzi kabikwamo amafaranga

Yahamagaye uyu mucuranzi abaza abafana ati "Murashaka ikirori?'' Ahita yanzika n'indirimbo ze zishimiwe cyane

DJ Miller na we yanyuzagamo akabyina umuziki yavangaga

Bien-Aimé Baraza ni umuririmbyi uri mu bakomeye muri Sauti Sol

Bien-Aimé Baraza yafashe gitari aracuranga ubwo baririmbaga indirimbo yitwa "Nerea"

Sauti Sol yakuriwe ingofero mu gitaramo yakoreye i Kigali cyo kubungabunga ibidukikije

Yasigaranye amashusho y'urwibutso rw'igitaramo gikomeye cyatangiwemo ubutumwa bwo kubungabunga ibidukikije

Sauti Sol yamaze isaha n'iminota 22 ku rubyiniro. ikina umuziki w'umwimerere

Sauti Sol iri mu matsinda akomeye mu Karere ka Afurika y'Uburasirazuba n'Umugabane imaze kwigarurira imitima ya benshi

Biseguye ku muziki wabanje kuzamo amakaraza

Bien-Aimé Baraza yavuze ko buri gihe iyo baje mu Rwanda bahagirira ibihe byiza

Imyambarire na yo igaragaza ko ari abanyabirori! Imibyinire nawe urayibonera

Babyinaga nta kibatangira!

Nyuma yo kubyinana, abakobwa bose baguye mu byano bya Bien-Aimé Baraza

Umuziki wa Sauti Sol ntibawupfushije ubusa

Bagize ibihe by'umunezero

Igitaramo kigana ku musozo, abakobwa b'abanyabirori bahamagawe ku rubyiniro, bakata umuziki karahava. Aha haririmbwaga iyitwa Shake yo bam bam babyina bazunguza ikibuno

Uyu mukobwa yishimiye ikirori cyasusurukijwe n'itsinda ry'iwabo muri Kenya. Aha yabyinnye ashaka kurira Bien-Aimé Baraza

Melanin basorejeho bayiririmbye bicaye ku rubyiniro imbere y'abafana

Amafoto: Muhizi Serge