00:00:00 IGIHE NETWORK KN KINYARWANDA EN ENGLISH FR FRANCAIS

Shaddy Boo yahawe urw’amenyo mu mvugo ‘Odeur ya océan’

Yanditswe na Bukuru JC
Kuya 25 Kanama 2017 saa 02:47
Yasuwe :
4 0

Nta rungu mu bakoresha imbuga nkoranyambaga by’umwihariko abo muri Uganda, Kenya, Tanzania n’u Rwanda, ikigezweho ni imvugo ‘odeur ya océan’ iyoboye mu ziri guca ibintu muri iki gihe.

Mbabazi Shadia [Shaddy Boo] wahoze ari umugore wa Producer Meddy Saleh asigaye akurikiwe mu buryo budasanzwe ndetse afatwa nk’icyamamare mu itangazamakuru kubera umurindi afite ku mbuga nkoranyambaga.

Mu minsi mike ishize yatumiwe kuri Televiziyo avuga ibyerekeye ubuzima bwe, umunyamakuru yamubajije ahantu akunda kujya mu buryo bwo kuruhura ubwonko no gushimisha amaso, atazuyaje yavuze ko akunda kujya ku mucanga hafi y’amazi.

Yabajijwe niba yaba azi koga, asubiza agira ati “Enfete nkunda kubona abantu boga, sinzi, no kumva iriya odeur ya ocean[impumuro y’inyanja], biranshimisha cyane”. Undi ahita amubaza niba hari inyanja yari yageraho undi na we ati “No! No!”

Yasohotse mu kiganiro urwenya rutangira ubwo, ku mbuga nkoranyambaga hatangira gusakazwa videos ngufi zikubiyemo amagambo Shaddy Boo yavuze, ni nako abahanga mu gusetsa bagenda bakora amashusho yumvikanisha uburyo ibyo uyu mugore yavuze ari agahomamunwa.

Izina Shaddy Boo ryongeye kuba ingingo nyamukuru kuriTwitter binyuze kuri Hashtag yitwa #OdeurYaOcean n’andi magambo atandukanye amukomozaho mu buryo bwo kumukwena.

Imvugo ‘odeur ya océan’ yatangiye kugaragaza imbaraga mu ntangiriro z’iki Cyumweru, aho buri wese ku mbuga nkoranyambaga asigaye ayikoresha no ku bintu bitagira impumumuro. Umuntu akihanukira ati ‘Nkumbuye odeur ya Convention Center’.

Shaddy Boo yahoze ari umugore wa Meddy Saleh, izina rye ryamenyekanye bwa mbere ubwo yagaragaye mu mashusho y’indirimbo Buhoro Buhoro ya King James, aba bombi bafitanye abana babiri. Mu ntangiriro z’umwaka wa 2016 byatangajwe ko Meddy Saleh n’umugore we bari gushaka gatanya nk’umuti w’ibyo batumvikanyeho nyuma yo kurushinga ndetse inkuru isa n’iyabaye impamo kuko buri wese asigaye aba mu rugo rwe.

Muri Gashyantare 2016, Shaddy Boo yasize Meddy mu nzu babanagamo i Nyamirambo ajya kubaho mu buzima bwa wenyine i Gikondo aho abana n’abana be.

Nyuma yo gutandukana n’umugabo, Shaddy Boo asigaye yifashishwa mu mashusho y’indirimbo, ubundi akaba azwi cyane ku mafoto adasanzwe asakaza ku mbuga nkoranyambaga.

Shaddy Boo ni umwe mu bagore bahanzwe amaso ku mbuga nkoranyambaga ndetse izina rye ryaratumbagiye, uko yavugwaga ataratandukana na Meddy Saleh byarahindutse.

Shaddy Boo kandi asigaye agaragara kenshi yafashe indege yagiye mu mahanga muri gahunda ze bwite no mu kazi akora.

Ubu ku mbuga nkoranyambaga za Instagram, Facebook na YouTube hasigaye hakwirakwizwa amashusho ya Shaddy Boo arimo kubyina mu buryo budasanzwe. Uko iminsi ishira abantu bararushaho guhanahana ibyerekeye amakuru y’uyu munyamideli ku buryo amaze kwinjira mu mitima y’abakoresha imbuga nkoranyambaga, na we ubwe amaze kubona umubare munini w’abamukurikira[followers], abarirwa mu ba mbere bakurikiwe cyane nko kuri Instagram gusa afite abarenga ibihumbi 160.

Shaddy Boo yahindutse urwenya...

Shaddy Boo yahawe urw’amenyo mu mvugo ‘Odeur ya océan’

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .