Studio zubatse izina mu Rwanda zabaye amateka

Yanditswe na Uwiduhaye Theos
Kuya 12 Ukwakira 2019 saa 09:47
Yasuwe :
0 0

Kugira ngo indirimbo isohoke ifite umudiho n’ijwi biryohera buri wese bisaba kongerwamo ibirungo by’uyitunganya benshi bazi nka ‘Producer’.

Uretse mu Rwanda, usanga hanze ho indirimbo ishobora gukorwaho n’aba-producers benshi kugira ngo izajya hanze yuje uburyo ntagereranywa kandi yishimirwe.

Mu myaka ya mbere ya Jenoside yakorewe Abatutsi mu Rwanda mu 1994, wasangaga gukora indirimbo bigoye cyane ko hari studio mbarwa zirangajwe imbere n’iya Radio Rwanda.

Nyuma ibintu byagiye bihindura isura hagenda havuka izindi studio uko umuziki wagiye utera imbere ndetse binafasha abahanzi bashya baje mu gisekuru cyo mu myaka yatangiye ahagana mu 2000 kuzamura.

Izi studio zakoze akazi gakomeye, zakoreyemo abatunganya indirimbo batandukanye bubatse amateka mu myaka isaga icumi ishize mu Rwanda.

IGIHE yakusanyije studio ziri mu zamamaye kubera indirimbo zakorewemo zagize igikundiro mu muziki w’u Rwanda ariko ubu zitagikora.

-  Bridge Records

Iyi ni imwe muri studio zakoze ibitangaza mu muziki Nyarwanda zifasha abahanzi benshi, ubu bari ku rwego rwiza muri muzika. Yanyuzemo Producer Nicolas na Piano The Grooveman.

Iyi studio yakorewemo indirimbo nyinshi zirimo iza Tom Close nka ‘Ndacyagukunda’, ‘Nakoze iki?’ ya Peace Jolis, ‘Byacitse’ ya Kamichi n’izindi nyinshi z’abahanzi bakomeye.

Ubu, Bridges Records ntabwo igikora mu buryo bukomeye nk’uko byari bimeze mu gihe cyayo ikorera abahanzi bakomeye.

-  Unlimited Records

Iyi yo urondoye indirimbo zakorewemo ntiwazirangiza. Ni imwe mu zazamuye benshi mu bahanzi bakomeye mu Rwanda ndetse wasangaga hatonze umurongo w’abashaka gukoreramo indirimbo.

Izina rya Unlimited Records ryamamaye kuva ku mwaduko w’abahanzi bayobowe na The Ben na Meddy n’igihe injyana ya Hip hop yari itangiye gushinga ibirindiro mu Rwanda ahagana mu 2009.

Iyi studio yamenyekanye cyane ubwo yakorerwagamo na Lick Lick nyuma waje kwerekeza muri Leta Zunze Ubumwe za Amerika, ikaza kugenda icika intege kugeza ubwo indirimbo zakorerwagamo ubu zibukwa nk’amateka.

Nyuma yo kugenda kwa Lick Lick, Unlimited Records yagiye mu maboko y’uwitwa Munyaneza Janvier unatangaza ko nyuma y’uko bimutwaye akayabo ka miliyoni 2 Frw azanye ivugurura rikomeye mu mikorere.

Munyaneza ubusanzwe na we yari umuhanzi utaramenyekana cyane, ariko yari anasanzwe atunze indi nzu itunganya muzika izwi nka Black Gang Studio.

Yazanye imishinga myiza myinshi irimo gutangiza inzu ya Unlimited ikora amashusho yagombaga kuzajya itunganya amashusho y’indirimbo zizajya zikorerwa muri Unlimited itunganya amajwi, gutangiza ishami rya Unlimited mu Mujyi wa Gisenyi no gukomeza gushimangira imikorere myiza.

Yahise asinyana amasezerano y’umwaka na Producer Fayzo uzwi mu gutunganya amashusho y’indirimbo, akaba ariwe wagombaga kujya muri Unlimited Video. Gusa ibi byose byarangiriye mu magambo kuko iyi studio iri mu zakendereye.

Yakorewemo indirimbo zitandukanye zamenyekanye nka ‘Zubeda’ ya Kamichi na The Ben, ‘Umunsi ucyeye’ na ‘Umucakara w’ibihe’ za Diplomat, iza Kamichi zirimo nk’iyo yise ‘Aho Ruzingiye’, ‘Gangster Love’ ya Oda Paccy, n’izindi nyinshi.

-  Top 5 Sai

Iyi studio iherereye mu Karere ka Musanze ni imwe mu zubatse amateka mu muziki Nyarwanda, yakorewemo na Mastola wari umwe mu batunganya indirimbo bafite ubuhanga bwihariye.

Yakorewemo indirimbo zitandukanye zakunzwe nka ‘Amaganya’, ‘Inkongoro y’Umushimusi’ za Tuff Gangz, ‘Bya bihe’ na ‘Ikirori za The Brothers, yakorewemo nyinshi za Just Family n’izindi nyinshi zakoze akazi gakomeye mu gihe cyazo.

-  TFP (The Future Production

Iyi yashyinzwe na BZB The Brain, uri mu ba mbere batangiye gutunganya indirimbo z’abahanzi b’Abanyarwanda.

Yakoze indirimbo zitandukanye z’abahanzi b’abanyabigwi mu muziki Nyarwanda bakoze amateka akomeye mu gihe benshi bazwi ubu bari bakiri hasi, bataramenyakana.

TFP yashinze yakoreyemo abahanzi benshi. Yakoze iyitwa ‘Umutima Ukunda’ ya Pappy Safa John, ‘Kubaka Izina’ ya MC Mahoniboni, ‘Rutenderi’ ya Riderman n’izindi nyinshi.

Hashize imyaka myinshi yarahagaritse ibyo gutunganya indirimbo, gusa hari amakuru avuga ko yaba ari mu mugambi wo kongera kubyutsa umutwe.

-  F2K

F2K ni studio yanyuzemo abatunganya indirimbo batandukanye barimo Lick Lick, Junior Multi System na Devy Denko.

Iyi ni imwe muri studio nazo zubatse amateka mu muziki Nyarwanda, yakorewemo indirimbo zitandukanye zakanyujijeho mu myaka yashize.

Ibihangano bikomeye byayitunganyirijwemo birimo ‘Amayobera’ ya Meddy, ‘Igicaniro cy’Impanuro’ ya Ally G, ‘Nyemerera’ yakozwe n’Abakimaze Groupe yamamaye mu myaka yashize, ‘Ingufu zo Gukora’ ya Riderman, Neg G the General na P Fla n’izindi nyinshi.

Iyi nayo n’ubwo iri muri Studio zubatse izina bikomeye imaze igihe nta ndirimbo nshya isohokamo.

-  Ibisumizi

Iyi studio yashinzwe na Riderman yamenyekanye cyane mu 2012 ubwo umusore witwa T Brown yayikoreragamo.

Yakorewemo indirimbo zitandukanye zagiye zikundwa muri icyo gihe harimo ‘Arambona Agaseka’ ya Dj Zizou ihuriyemo abahanzi benshi, ‘Igitangaza’ ya Riderman, ‘Uruhinja’ ya Ama G The Black, ‘Kabimye’ ya Kamichi n’izindi nyinshi.
Nyuma yo kwirukanwa kwa T Brown muri iyi studio mu 2013, azira kuba yarashatse gusambaniramo n’umuhanzikazi Fearless, bigateza umwuka mubi hagati ye n’abo bakoranaga, uyu musore ntiyongeye kugira studio akoreramo kugera n’aho azimiye burundu.

Studio y’Ibisumizi kandi yakoreyemo uwitwa First Boy warambitse ikiganza ku ndirimbo nyinshi zakunzwe zirimo iyitwa ‘Ninjye’ ya M Izzo na ‘Horo’ ya Riderman n’izindi nyinshi ziganjemo iza Hip hop.

Ubwo yari asigaye mu Ibisumizi, yaje gutabwa muri yombi azira kunywa urumogi, bituma Riderman ahita afunga iyi studio burundu ayimurira iwe.

-  Super Level

Iyi yari Label ariko yabarizwagamo n’abahanzi batandukanye barimo Mico The Best, Urban Boyz, Bruce Melodie, Fireman na Ama G The Black. Yanagize studio yakorewemo indirimbo zitandukanye z’abahanzi biganjemo abari bayirimo.

Super Level yahozemo abahanzi bakomeye ariko bagiye bayivamo urusorongo; ku ikubitiro hasohotse Ama G The Black, akurikirwa na Bruce Melodie ndetse bahita bashyidika mu manza kubera ibibazo by’amafaranga.

Budacyeye kabiri muri Super Level hongeye kuvuga induru ubwo uwitwa Rwema Dennis [wahoze afasha Urban Boyz] yavugaga ko bamwambuye ndetse baramwipakurura nyuma yo guhabwa miliyoni 24 Frw za Bralirwa bari batsindiye muri Primus Guma Guma Super Star.

Umuraperi Fireman na we yavuye muri Super Level bucece, mu 2017 Mico The Best na Urban Boyz na bo bayisokamo.

Super Level yakoreyemo abatunganya indirimbo nka Piano The Grooveman.

-  Ray Music

Ray Music yamenyekanye cyane ikoreramo uwitwa Ray P, yakoze indirimbo zitari nke kandi zamenyekanye muri zo harimo ‘Uramfite’ ya Diplomate na Yverry na ‘Bagupfusha ubusa’ ya Dj Zizou n’abandi bahanzi.

Nubwo no mu gihe yakoraga yari umuntu udakunda kwigaragaza cyane, ubu hashize igihe nta bihangano yatunganyije byumvikana.

Iyi studio yubatse amateka ubu ntabwo igikora nk’ibyo yari izwiho mu minsi yo hambere.

Hari amakuru avuga ko Ray Music yimuriwe muri Kenya igahuzwa n’indi nzu itunganya umuziki wa Gospel yitwa Sauti Record ikitwa Ray Gospel Record.

-  Ubuntu Studio

Iyi studio ni imwe mu zakoze akazi gakomeye ubwo umuziki w’u Rwanda wari ugifite igicumbi mu Karere ka Huye mu Ntara y’Amajyepfo, mu myaka isaga icumi ishize.

Iyi studio yakoreyemo Dr Jack witabye Imana mu Ugushyingo 2014, ndetse n’uwitwa Amir Pro.

Yakorewemo indirimbo zitandukanye zubakiye amateka abahanzi bakomeye ubu zirimo ‘Ese Nzapfa’ ya Oda Paccy na Kayishunge, ‘Amahirwe ya nyuma’ ya The Ben, nyinshi mu ndirimbo za Urban Boyz n’izindi.

N’ubwo iri muri studio zubatse izina mu buryo bukomeye mu myaka yashize, ubu nta kanunu k’indirimbo nshya zisohoka muri iki gihe ziyiturutsemo.

-  Infinity Records

Iyi ni imwe muri studio zubatse amateka mu Rwanda, yakoreyemo abatunganya indirimbo batandukanye nka T Brown na Fazzo.

Yakorewemo ibihangano by’abahanzi bo mu Rwanda batandukanye nka Ciney n’abandi. Ubu Infinity yabaye amateka kuko nta gihangano na kimwe giheruka kuvamo.

Unlimited Records iri muri studio zanditse izina yari iherereye mu Biryogo i Nyamirambo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza