Umugore wa Bob Marley yabitswe ari muzima

Yanditswe na Uwiduhaye Theos
Kuya 10 Mutarama 2021 saa 05:19
Yasuwe :
0 0

Mu mpera z’iki Cyumweru hakwirakwiye amakuru avuga ko umugore wa Bob Marley witwa Rita Marley yitabye Imana, ndetse abafana bamwe babifata nk’ukuri.

Inkuru y’urupfu rwa Rita Marley uri mu bahanzi bafite amateka bakomoka muri Jamaica, yamenyekanye ku wa Gatanu tariki 8 Mutarama 2021, aho umwe mu bakoresha urukuta rwa Facebook yanditse ubutumwa avuga ko uyu mubyeyi yamaze gushiramo umwuka.

Kuri urwo rukuta ubutumwa bubika Rita bwagiraga buti “Mu masaha ya saa tanu za mu gitondo (ku isaha y’iwabo) kuri uyu wa 8 Mutarama 2021, umuririmbyi dukunda Rita Marley yitabye Imana […] ndabinginze mutwereke ubutumwa bwo kudukomeza, mutanga ibitekerezo munakanda kuri like kuri uru rukuta.”

Amagana y’abafana b’uyu muhanzi bahise batangira kwandika butandukanye bihanganisha umuryango w’uyu muhanzikazi w’imyaka 74, ndetse n’abakoresha izindi mbuga nkoranyambaga batangira guhererekanya ubutumwa nk’ubu, ariko bamwe bakabukemanga.

Ku wa Gatandatu tariki 9 Mutarama, abahagarariye uyu muhanzi batangaje ko ibijyanye n’urupfu rwe atari ukuri. Bati “Aracyari muzima kandi ameze neza, mureke kwizera ibyo mubona byose kuri internet.”

Umukobwa we witwa Cedella Marley, na we yifashishije urukuta rwe rwa Facebook yagaragaje ko nyina ari muzima nta kibazo na kimwe afite ibyo abantu bari kubona ari ibinyoma. Yashyizeho amashusho afite amasegonda 37 bari kumwe, ahumuriza abantu ababwira ko nyina ari muryerye.

Ntabwo ari ubwa mbere uyu mukecuru abikwa cyane ko mu 2016 yarwaye ‘Stroke’ akajyanwa mu bitaro muri Leta Zunze Ubumwe za Amerika, maze inkuru zigatangira gukwira ko yavuye mu mubiri.

Uyu mubyeyi ubusanzwe witwa Born Alfarita Constania Anderson yavutse kuwa 25 Nyakanga 1946. Yabaye mu Mujyi wa Kingston aza guhura na Bob Marley ubwo yari mu bwangavu, mu 1966 barabana. Ni umwe mu bari bagize itsinda rya batatu ryitwa “I Threes” ryafashaga Bob Marley ku rubyiniro.

Uretse kuba muri iri tsinda, yabaye n’umuhanzi ku giti cye. Yakoze indirimbo nyinshi zakunzwe zirimo iyitwa “One Draw” n’izindi nyinshi zirimo “A Jah Jah”, “Harambee”, “Earth Runnings”, “Good Moning Jah”, “Serious Time”, “One More Morning”, “So Much Things to Say” na “Who Colt the Game” yakoranye n’umuhungu we muto Stephen Marley nawe uri mu bahanzi bakomeye muri Jamaica.

Reba zimwe mu ndirimbo z’uyu mubyeyi

Umugore wa Bob Marley, Rita Marley yabitswe ari muzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .