Umunyarwanda Dorcy Rugamba yitabiriye ubutumire bwa Perezida wa Mali

Yanditswe na Nsengiyumva Emmy
Kuya 13 Ukwakira 2019 saa 09:46
Yasuwe :
0 0

Ku wa Gatandatu tariki 13 Ukwakira 2019 abinyujije ku rukuta rwe rwa Facebook, Dorcy Rugamba umuhungu wa kabiri mu bana ba Rugamba Sipiriyani yafashe indege yerekeza muri Mali aho yari yitabiriye ubutumire bwa Perezida wa Mali.

Dorcy Rugamba yatumiwe na Perezida wa Mali, Ibrahim Boubacat Keita, kuba umwe mu nararibonye zizatekereza ku mushinga wa Politiki y’umuco n’iterambere mu by’ubuhanzi mu muryango wa Afurika yunze Ubumwe.

Mu magambo yashyize ku mbuga nkoranyambaga ubwo yari agiye muri Mali yagize ati” Nerekeje i Bamako, ku butumire bwa Perezida wa Mali Ibrahim Boubacar Keita kuba umwe mu nararibonye zizatekereza ku mushinga wa Politiki y’umuco n’iterambere mu by’ubuhanzi mu muryango wa Afurika yunze Ubumwe.”

N’ubwo atari umuririmbyi nka se, Dorcy RUGAMBA ni umwe mu banyarwanda bake bagize ibikorwa by’umuco nk’umwuga. Impano yo kubikunda akaba yarabikuye kuri se wari umusizi n’umushakashatsi w’intyoza.

Dorcy Rugamba ni umwanditsi n’umuhimbyi w’ikinamico (Auteur, Acteur et Metteur en scène de théâtre) yavukiye mu Rwanda 1969, mu muryango w’abahanzi, se Rugamba Cyprien nawe yari umwanditsi n’umuhanzi w’indirimbo, yanashinze kandi ayobora itorero ’Amasimbi n’Amakombe’ mu 1976 kugeza aho atabarukiye mu 1994.

Dorcy yinjiye mu itorero rya se ’Amasimbi n’Amakombe’ afite imyaka umunani, yasohotse bwa mbere ku rubyiniro mu 1991 mu bitaramo Amasimbi n’Amakombe yakoreye mu Bubiligi mu Mujyi wa Anvers na Bruxelles, mu Busuwisi ahitwa Fribourg, mu Budage ahitwa Mayance no mu Bufaransa i Paris.

Nyuma y’ibyo bitaramo niho Dorcy wari ukiri muri Kaminuza y’u Rwanda (UNR) yiga ibijyanye n’imiti, yiyemeje kugana inzira y’ubuhanzi n’ubuvanganzo (Carrière artistique).

Rugamba Dorcy yashinze ikigo mu Rwanda yise RAI (Rwanda Arts initiative) giteza imbere ubugeni n’ubuhanzi.

Se Rugamba yishwe muri Jenoside yakorewe Abatutsi muri Mata 1994, akaba we n’umugore we bari barabyaranye abana 10. Muri Jenoside bicanywe n’abana babo batandatu, ubu hasigaye bane.

Dorcy Rugamba yagiye muri Mali yitabiriye ubutumire bwa Perezida w'iki gihugu
Muri Mata 2019 ubwo hatangizwaga Kwibuka ku nshuro ya 25 Jenoside yakorewe Abatutsi hakinwe umukino "Umurinzi" wanditswe na Dorcy Rugamba ukundwa n'abatari bake

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza