00:00:00 IGIHE NETWORK KN KINYARWANDA EN ENGLISH FR FRANCAIS

Umuramyi Danny Mutabazi yatangaje itariki y’ubukwe bwe na Berry

Yanditswe na Uwiduhaye Theos
Kuya 4 Gicurasi 2021 saa 04:06
Yasuwe :
0 0

Umuramyi wo muri ADEPR, Mutabazi Daniel[Danny] yatangaje ko muri Kanama azasezerana kubana akaramata n’umukunzi we Mahoro Bernadette [Berry] bamaze igihe bakundana.

Nyuma y’integuza y’ubukwe bw’aba bombi yagiye hanze mu minsi ishize, Mutabazi yanditse kuri Instagram ateguza abakunzi be ubukwe bwe, ati “Mubike ahantu iyi tariki.”

Danny Mutabazi na Mahoro Berry batangiye umushinga w’ubukwe bwabo berekanwa mu rusengero rwa ADEPR- Kumukenke tariki 21 Werurwe. Aba bombi bamaze imyaka ibiri bakundana. Mahoro aririmba muri Korali yitwa Himbaza yo muri ADEPR -Kacyiru.

Danny Mutabazi ubwo yerekanwaga, yabwiye IGIHE ko icyatumye ahitamo uyu mukunzi we ari uko yamunyuze.

Ati “Impamvu ari we nahisemo ni uko ari we wanyuze umutima wanjye, nanyuzwe n’urukundo rwe, cyane kubera indangagaciro zimuranga no guca bugufi.”

Yavuze ko kumenyana na Berry byari mu muteguro w’Imana. Ati “ Ni Imana yabinshoboje mu buryo bw’amarangamutima mbona birakwiye kandi umutima wanjye uranyuzwe cyane. Cyari igihe cy’Imana, twarahuye turahuza.”

Berekanywe mu rusengero nyuma y’icyumweru kimwe Danny Mutabazi yambitse impeta umukunzi we .

Danny Mutabazi asanzwe ari umuramyi ubivanga n’ivugabutumwa mu Itorero ADEPR, Paruwasi ya Gasave. Yatangiye umuziki nk’umuhanzi wigenga mu 2015, akaba amaze gushyira hanze indirimbo nyinshi.

Indirimbo yitwa ‘Calvary’ ni yo yazamuye izina rye mu ruhando rw’abakunda umuziki uhimbaza Imana. Izindi ndirimbo ze zizwi harimo “Ntiyasinziriye”, “Ntiwanyihakanye”, “Binkoze ku Mutima”, “Ufite uwo mwana”, “Amarira y’Ibyishimo”, “Saa Cyenda” n’izindi.

Danny Mutabazi yavukiye mu Murenge wa Gishali mu Karere ka Rwamagana ahitwa Nyarugari. Uyu musore w’imyaka 27 yatangiye kuririmba muri korali z’abana mu 2004.

Reba indirimbo uyu musore aheruka gushyira hanze

Danny Mutabazi yakundiye uyu mukobwa ikinyabupfura agira n'ibindi
Bamaze imyaka ibiri bakundana
Aba bombi ni abaririmbyi, umukobwa aririmba muri korali naho Mutabazi ni umuhanzi ku giti cye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .