Umuraperi Jay Polly yasabiwe gufungwa imyaka ibiri

Yanditswe na IGIHE
Kuya 14 Kanama 2018 saa 02:29
Yasuwe :
1 1

Umuraperi Jay Polly amaze iminsi afunzwe, akurikiranyweho icyaha cyo gukubita umugore we akamukura amenyo, yitabye urukiko maze ubushinjacyaha bumusabira gufungwa imyaka ibiri.

Kuri uyu wa Mbere tariki ya 13 Kanama 2018 nibwo Tuyisenge Joshua uzwi nka Jay Polly yitabye Urukiko rw’ibanze rwa Gasabo aburanishwa ku byaha akurikiranyweho birimo gukubita no gukomeretsa umugore we.

Umuvugizi w’Inkiko, Mutabazi Harrison yabwiye IGIHE ko urukiko ruzafatira umwanzuro ku rubanza rwa Jay Polly saa tanu z’amanywa ku itariki ya 24 Kanama 2018 ari nabwo uyu muhanzi azasubira mu rukiko.

Jay Polly mu kwiregura kwe, yaburanye yemera icyaha aregwa cyo ‘gukubita no gukomeretsa ku bushake ku buryo bubabaje’ ariko akaba yaravuze ko yakubise umugore we abitewe n’ubusinzi.

Ubushinjachaha bwasabye ko Jay Polly yafungwa imyaka ibiri n’ihazabu y’amafaranga ibihumbi ijana(100,000). Ubushinjacyaha bwamusabiye iki gihano, bushingiye ku ngingo ya 148 y’itegeko ngenga mu gitabo cy’amategeko ahana y’u Rwanda.

Jay Polly agifatwa ku itariki ya 4 Kanama 2018, yabanje gufungirwa muri kasho ya Remera mu Mujyi wa Kigali. Yafunzwe nyuma y’uko abaturanyi be batabaje inzego zishinzwe umutekano ubwo bumvaga ari gukubita umugore we.

Muri Kanama 2015, Jay Polly yatandukanye n’umugore babyaranye mbere witwa Nirere Afsa ku mpamvu atasobanuye, icyo gihe yavuze ko basigaye bahuzwa gusa n’umwana babyaranye.

Yagize ati “Aho duhuriye ni umwana wacu dufitanye kandi ndi papa we ni imfura yanjye ndamukunda cyane mukorera byose kandi niteguye gukomeza kumukorera byose ni nawe nkorera, ariko mama we ntitukibana.”

Muri icyo gihe yari amaze iminsi mike akururana na Sharifa hashize iminsi mike bahita babyarana; budacyeye kabiri uyu na we batangiye gufatana mu mashati kugeza ubwo ejobundi barwanye akamukura amenyo.

Uwimbabazi Sharifa umugore wa Jay Polly yaherukaga kwifashishwa muri video y'umugabo we
Jay Polly yafashwe mu gihe yiteguraga gusohora umushinga yakoranye na Davido

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza