Zabyaye amahari mu mushinga "I’m the future”, David Pro ashobora kujyanwa mu nkiko

Yanditswe na Nsengiyumva Emmy
Kuya 5 Gashyantare 2020 saa 03:31
Yasuwe :
0 0

Umwuka si mwiza mu buyobozi bwa sosiyete Diamond Dreams itegura irushanwa rya “I’m The Future” ryari rifite intego yo gushyigikira no kumenyekanisha abanyempano mu muziki.

Iri rushanwa ryatangiye mu 2018, riba uwo mwaka gusa ubundi rirahwekera kandi intego y’abariteguraga kwari ukujya riba buri mwaka.

Ku gicamunsi cyo kuri uyu wa Gatatu tariki 5 Gashyantare 2020 nibwo amakuru yageze ku IGIHE ko umuriro watse hagati y’ubuyobozi bwa kompanyi ya Diamond Dreams itegura “I’m The Future”.

Amakimbirane y’aba bayobozi ba Diamond Dreams yavutse mu minsi ishize ashingiye ku bwumvikane buke bw’abahuriye muri iyi kompanyi aribo Tuyishime David uzwi nka David Pro na Mukeshimana Primitive wari washoyemo amafaranga ye.

Mu gushaka kumenya aya makuru by’imvaho twavugishije Mukeshimana Primitive uri mu kazi hanze y’u Rwanda atuvira imuzi ikibazo nyiri zina uko gihagaze.

Yavuze ko we na David Pro bahuye bakaganira uko bakorana umushinga mu muziki, iki gihe David Pro yari afite igitekerezo cya “I’m The Future” ariko adafite ubushobozi bityo we yagombaga gushyiramo ubushobozi.

Ati "Yambwiraga ko we nta mafaranga afite ariko yajya abona umwanya uhagije wo kwiruka mu bintu umunsi ku wundi ndetse akanabikurikirana nanjye nkashyiramo amafaranga aho bishoboka hose.”

Yunzemo ati” Murabizi David Pro si umuswa mu kazi ke ka buri munsi ka Production, icyo yaburaga ni ibikoresho kandi mwarabibonye ko nari nagerageje kugura ibishoboka byose.”

“Naguze ibikoresho, nishyura inzu nini yo gukoreramo ndetse nanamuha imodoka yo kuba akoresha mu kazi ka buri munsi.”

Mukeshimana avuga ko yimuriye ibikorwa bya kompanyi mu nyubako igezweho ku Kimironko.

Mu minsi ishize nibwo nyiri iyi nzu yibukije Mukeshimana ko bagomba kwishyura ukwezi kwarangiye nawe abaza David uko ibikorerwa muri iyo nzu bimeze, undi amubwira ko batari gukora kuko nta mafaranga bafite.

Ati” Ese ko twari twakoze studio n’ibindi bikorwa ngo bibyare amafaranga andi yashakaga ni ayahe? Ni ay’iki?”

Mukeshimana avuga ko yaje kumenya ko David Pro yagiye muri Kenya ku mpamvu zitazwi bituma amwandikira amubwira ko niba batari gukorera muri iyi nzu atakomeza kuyishyura ahubwo bafata umwanya bagahagarika ibikorerwamo.

Anashinja David Pro kuba yaragiye mu biro bye agakuramo ibyangombwa by’ubutaka bwe akabyiyandikishaho mu buryo bunyuranyije n’amategeko.

Ibi byaje gukazwa n’uko hari amakuru yageze kuri uyu mubyeyi avuga ko David Pro kuri uyu wa Gatatu tariki 5 Gashyantare 2020 yagiye Kimironko ku biro by’iyi kompanyi agapakira ibikoresho ashaka kwimuka icyakora ngo umugambi we wakomwe mu nkokora nuko uyu mubyeyi yabimenye mbere akiyambaza inzego zinyuranye yaba iz’ibanze ndetse n’umuryango we, bakabatesha.

Mukeshimana yiteguye kujyana mu nkiko David Pro

Mukeshimana avuga ko mu gihe David Pro yaba atamusubije ibyangombwa bye ku neza ngo umutungo we awusubirane bakizwa n’inkiko cyane ko ibyo uyu musore yakoze binyuranyije n’amategeko.

Ati” Nasabye umunyamategeko wanjye n’abo mu muryango ko bamubwira akansubiza umutungo wanjye yiyandikishijeho ubundi tugasigara tureba ibindi uko byifashe. Nta deni murimo ngo yagwatiriye ibyanjye. Icyo yakoze ni icyaha gihanwa n’amategeko kandi nziko nk’umuntu mukuru atakora ikosa ryo gukinisha amategeko kandi ayazi.”

Uyu mubyeyi yongeyeho ko hari amakuru ari kwakira y’uko n’imodoka yari yaratije David Pro yaba yahishwe mu rwego kugira ngo inyerezwe ariko ngo ibyo byose byatangiye gukurikiranwa mu buryo bw’amategeko kandi aho bikenewe ko bajya mu nkiko yiteguye kuburana.

Ese “I’m The Future” yaba irangiriye aha?

Mukeshimana yavuze ko atakwemera guhagarika umushinga yashoyemo amafaranga menshi kubera amakosa y’umuntu umwe.

Yagize ati "Urumva nashora miliyoni zirenga ijana mu mushinga ugahagarara gutyo gusa? Ntabwo bishoboka. Uzakomeza, kuba David avuyemo akoze amanyanga ntibivuze ko atasimburwa. Iki gikorwa cyategurwaga na kompanyi duhuriyemo rero niba ashatse kubizanamo amanyanga nyine ubwo aragenda dushake undi umusimbura kandi barahari benshi.”

Yunzemo ati”Ubu nibwo ahubwo igiye kuba neza, uwayidindizaga ubwo yigaragaje akaba agiye ubu igiye gukorwa kandi nizeye ko izagenda neza.”

Twifuje kuvugana na David Pro no tumenye icyo avuga kubyo ashinjwa n’uyu mubyeyi bari bafatanyije kompanyi yateguraga “I’m The Future” ariko ntibyadukundiye cyane ko twarinze turangiza kwandika iyi nkuru telefone ye itaradukundira.

“I’m The Future” yabaye bwa mbere mu mpera za 2018 yegukanwa na Gusenga Marie France wahawe Miliyoni 15 z’amafaranga y’u Rwanda mu gihe uwa kabiri yabaye Mugisha Lionel wegukanye miliyoni zirindwi z’amafaranga y’u Rwanda (7 000 000frw).

Mu mwaka wa 2019 hategerejwe ko iri rushanwa ryongera kuba abantu baraheba naho ryari ribuditse ibi bibazo byari bitaraturika ngo abantu bamenye ikiri kurisibya.

Abari batsinze aya marushanwa bwa mbere
David Pro ubanza iburyo ashobora kujyanwa mu nkiko
Mukeshimana Primitive (Ubanza iburyo bw'ifoto) ashinja David Pro gushaka kumunyanganya ibikoresho bya Studio bari bahuriyeho ndetse no kumwiba umutungo mu buryo bunyuranyije n'amategeko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza