Ibyo wamenya ku myambaro Amavubi yaserukanye yerekeza muri CHAN (Amafoto)

Yanditswe na Uwiduhaye Theos
Kuya 13 Mutarama 2021 saa 05:59
Yasuwe :
0 0

Mu myambaro irimo amashati y’umuhondo ndetse n’ay’ubururu atakishijwe imirimbo gakondo izwi nk’imigongo, amapantalo y’umukara ndetse n’inkweto z’umukara; abakinnyi b’Ikipe y’Igihugu ‘Amavubi’ berekeje muri Cameroun mu irushanwa rya CHAN 2020 kuri uyu wa Gatatu.

Ni imyambaro inogeye ijisho kandi ibereye buri umwe, ubona ko yitaweho kandi yahawe umwanya na Moshions yayihanze. Iyi myambaro yahawe izina ‘Ishema’ irihariye ku Ikipe y’Igihugu gusa kuko nta yindi ubu iri ku isoko yo muri ubu bwoko.

Abakinnyi b’Ikipe y’Igihugu mbere yo kwerekeza muri CHAN, bafashe amafoto atandukanye bayambaye, ubona akanyamuneza ari kose, bagaragaza ko uretse no kuwuconga mu kibuga ari abasore baberwa, kandi biteguye kumenyekanisha ibikorerwa mu Rwanda no kuruhesha ishema muri iri rushanwa.

Iyi myambaro iyi kipe yagiye muri CHAN yambaye yakozwe na Turahirwa Moses washinze inzu imaze kuba ubukombe mu guhanga imideli ya Moshions ikorera mu Kiyovu.

Danny Rugamba ushinzwe gukurikirana ibikorwa bya Moshions, yabwiye IGIHE ko iyi myambaro kuyita Ishema ari uko ari imyambaro bahanze bashaka kwifuriza Ikipe y’Igihugu guhesha ishema Abanyarwanda no kwitwara neza igakura igikombe muri Cameroun.

Ati “Ni imyambaro twahanze dushaka ko kwifuriza Ikipe y’Igihugu intsinzi no kuzana igikombe. Niyo mpamvu twayise ‘Ishema’. Ni imyambaro yakozwe mu gihe cy’icyumweru ariko twayitayeho cyane kandi tuyikora mu gihe gito.”

Yakomeje avuga ko bakoze imyambaro 51, y’abakinnyi ndetse n’abandi baherekeje iyi kipe. Inkweto zo ntabwo zirimo kuko zashatswe ku ruhande.

Rugamba yirinze kuvuga igiciro cy’iyi myambaro gusa yemeza ko ihenze, ariko FERWAFA ikaba yarahisemo ko igiciro cyayo kitashyirwa hanze ku mpamvu avuga ko ‘zabo bwite’.

Ugereranyije n’indi myambaro Moshions iheruka gushyira hanze ifite imisusire nk’iya ‘Ishema’ yitwa ‘Inkingi’. Nibura ishati n’ipantalo buri mukinnyi w’Amavubi yambaye bifite agaciro k’amafaranga arenga ibihumbi 300 Frw, nabwo habayeho igabanyirizwa kubera ko ari iy’Ikipe y’Igihugu kandi hakaba haguzwe myinshi icyarimwe.

Imyambaro ya Moshions isanzwe yihagazeho cyane ko ushobora kuhasanga nk’ikanzu y’ibihumbi 500 Frw, agapfukamunwa kagura 15 000 Frw (mu gihe udusanzwe agahenze katarenza 1500 Frw), amashati agura 165 000 Frw n’andi arenzeho, ikabutura ya 65. 000 Rwf, Umushanana wa 350 000 Frw, ikote rya 210 000 Frw n’ibindi byinshi, bikunze kuvugisha benshi.

Moses Turahirwa ashinga Moshions yatangiranye n’umudozi umwe, ariko mu 2018 yari ageze kuri 13 bahoraho, barimo umunani bashinzwe kudoda n’abandi bashinzwe gushaka amasoko no kumenyekanisha ibikorwa banyuze ku mbuga nkoranyambaga.

Imyambaro ya Moshions muri iyi minsi iri mu yatoranyirijwe kugurishirizwa ku rubuga rwa Beyoncé.

Mu gihe gishize, Moses Turahirwa aherutse kugaragara mu bantu baturutse mu bice bitandukanye by’Isi, bifashishijwe n’ikipe ya Paris St Germain mu kwamamaza umwenda wayo mushya wakozwe na Jordan.

Mu 2019, Moshions yahembwe nk’ikigo cyateje imbere ibikorerwa mu Rwanda, mu bihembo bizwi nka RDB Business Excellence Awards, bishimira abashoramari babaye indashyikirwa mu mwaka.

Itsinda ry’Amavubi rigizwe n’abantu 53 barimo abakinnyi 30, ryahagurutse ku kibuga cy’indege cya Kigali saa Mbiri za mu gitondo kuri uyu wa Gatatu tariki 13 Mutarama 2021, n’indege ya RwandAir, bagera i Douala muri Cameroun saa yine n’iminota 30.

Bagiye gukina Shampiyona Nyafurika ihuza abakinnyi bakina imbere mu bihugu byabo (CHAN 2020) izaba guhera ku wa 16 Mutarama kugeza tariki ya 7 Gashyantare 2021.

U Rwanda rwakiriye CHAN 2016, rugiye gukina iri rushanwa ku nshuro ya gatatu yikurikiranya n’iya kane muri rusange nyuma yo kwitabira CHAN 2011 yabereye muri Sudani. Inshuro ebyiri gusa (2009 na 2014) nizo u Rwanda rutitabiriyemo iri rushanwa.

Umukino warwo wa mbere uzaba kuwa 18 Mutarama, ruhura na Uganda kuri Stade de la Réunification y’i Douala mu gihe kuwa 22 Mutarama ruzakina na Maroc kuri icyo kibuga mbere yo guhura na Togo kuwa 26 Mutarama kuri Stade de Limbé/Buea.

Ubwo basurwaga na Minisitiri wa Siporo, Munyangaju Aurore Mimosa, abakinnyi b’Amavubi bayobowe na Tuyisenge Jacques, bavuze ko bihaye intego yo kugera ku mukino wa nyuma ndetse bakazana igikombe.

Umutoza Mashami Vincent yifotozanya na kapiteni Tuyisenge Jacques mu mwambaro mushya 'Ishema' wakozwe na Moshions
Rutanga Eric, Ndayishimiye Eric 'Bakame' na Manzi Thierry bagaragaye baberewe muri uyu mwambaro
Usengimana Faustin, Manzi Thierry na Rutanga Eric bifotoza
Bayisenge Emery yari aberewe ubwo yifotozaga afashe igikapu mu ntoki nk'uri ku rugendo
Hakizimana Muhadjiri yifotozanya na Rugwiro Herve
Iyabivuze Osée mu mwambaro wakozwe na Moshions
Sugira Ernest yifotozanya igikapu
Amavubi yaserukanye umwambaro mushya: bamwe bambaye amashati y’umuhondo, abandi ay’ubururu atakishijwe imirimbo gakondo izwi nk’imigongo
Ifoto Amavubi yifotoreje kuri La Palisse i Nyamata, aho yari amaze iminsi mu mwiherero

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .