00:00:00 IGIHE NETWORK KN KINYARWANDA EN ENGLISH FR FRANCAIS

Urugendo rwa Kanyana, umunyamideli wakuranye inzozi zo kwambika ibyamamare (Amafoto na Video)

Yanditswe na Mukahirwa Diane
Kuya 18 January 2022 saa 06:54
Yasuwe :

Kanyana Nadine, ni umwe mu bakobwa bakiri bato uri mu banyamideli bambika abanyacyubahiro batandukanye mu Rwanda. Urugendo rwe ruratangaje kuko nubwo yakuze akunda imideli, yize amasomo y’ikorabuhanga.

Yavuze ko yakuze akunda kwambara neza ndetse ngo no mu mikino yakinaga nk’umwana, hagarukagamo gutegura imyenda n’ibijyanye n’imideli.

Mu kubyiruka kwe ntabwo yakurikiye iyi mpano kuko mu mashuri yisumbuye yize ishami ry’Imibare na mudasobwa, akomeza kaminuza mu bijyanye n’ikorabuhanga, IT.

Kanyana yabwiye IGIHE ko muri we yiyumvagamo imideli nubwo atagize amahirwe yo kubikurikirana akiri muto.

Yagize ati “Nakundaga gukora imyenda y’ibipupe byanjye, ngafata amarido yo mu rugo yashaje nkayahindura, ibintu nk’ibyo. Byari ibintu nkora byo kwishimisha gusa kuko narakuze nkomeza kwiga bisanzwe.”

Yakomeje avuga ko impamvu atabashije kugira imideli umwuga akiri muto ari uko atabonye aho abyiga, gusa yaje kubona ishuri ryigisha kudoda abona ko inzozi zishobora kuzagerwaho.

Yagize ati “Mu mwaka wo kuruhuka ntegereje kujya muri kaminuza naje kubona ikigo cya WDA cyigishaha kudoda no gukora ubucuruzi njyayo turiga, nibwo naje kubona ko natangira.”

Kuri ubu Kanyana afite inzu y’imideli yitwa ‘Kanyana World’, wakwibaza uko yayigezeho kandi yarize ikoranabuhanga. Yakomeje kujya yiga muri kaminuza ndetse no kudoda aza kugira amahirwe yo kwitabira Art Rwanda Ubuhanzi ari yo yatumye inzozi ze ziba impamo.

Yavuze ko yabanje gutinya kujya muri Art Rwanda Ubuhanzi ariko abona abamukomeza ajyayo ndetse aratsinda kuva ubwo impano ye ibona umurongo.

Yagize ati “Ubwo icyiciro cya mbere cya Art Rwanda cyabaga nibwo inshuti zanjye zambwiye ngo urabishoboye gerageza amahirwe, njye nkitinya ariko bakomeza kuntera inbaraga nza kujyayo. Mba mu bantu batsinze mu mideli.”

“Baduhaye ubumenyi twari dukeneye baduha abantu batwigisha, baduha ingero zifatika z’ibyo baciyemo ndetse n’uko impano zacu twazibyaza umusaruro. Art Rwanda yaramfashije cyane.”

Muri Kanyana World bakora imyambaro y’ubwoko butandukanye haba iy’abagore ndetse n’abagabo. Kanyana avuga ko mu myambaro akora yibanda ku mateka n’umuco gakondo bya kinyafurika mu gusigasira aho akomoka.

Yagize ati “Nkora imyambaro yo kwambara mu buzima bwa buri munsi ariko ijyana n’ibintu bya kera ariko yerekana umuco w’Abanyafurika. Twibanda ku bintu bya kera kandi twemera ko ushobora kwikwiza ukaba wambaye neza.”

Yambika abanyacyubahiro…

Kanyana amaze gukora ubwoko bubiri bw’imyambaro kuva yatangira gukora. Yagiye yambika abantu b’abanyacyubahiro n’ibyamamare bitandukanye.

Mubo yambitse harimo Minisitiri w’urubyiruko n’umuco, Mbabazi Rose Mary, Depite Nyirahirwa Veneranda, Maniriho Clarisse n’abandi barimo abanyamakuru n’abahanzi bakomeye.

Nubwo afite aho amaze kugera ariko yanyuze mu bikomeye nko kubona amasomo byaramugoye ndetse aracyagorwa no kubona aho agura ibikoresho yifuza.

Ati “Imbogamizi ya mbere nagize ni ukubura aho nakura ubumenyi, narabikundaga ariko ntaho nabyiga, naho natangiriye kubikora kubona ibikoresho ntabwo biba byoroshye.”

Kanyana yifuza gutera intambwe ikomeye ku buryo azagira inzu y’imideli iserukira u Rwanda ndetse agashinga ikigo cyigisha abanyamideli bakiri bato.

Yaboneyeho n’umwanya wo guhanura abana b’abakobwa badakora bizeye abandi cyane abagabo, abibutsa ko kwigira aribyo bya mbere kandi bakwiye gukurikira inzozi zabo.

Imyambaro ya Kanyana World iboneka mu iduka rya Art Rwanda riherereye kuri KBC cyangwa akabandikira kuri Instagram ya https://www.instagram.com/kanyanaworld/.

Amakote akorwa na Kanyana ya Made in Rwanda
Imwe mu myambaro yakorerwe muri Kanyana world
Kanyana afite intego yo gushinga ishuri ryigisha imideli
Kanyana akora imyenda wajyana ahantu hatandukanye
Kanyana akora ubwoko butandukanye bw imyambaro cyane igaruka ku y Abanyafurika
Kanyana ari mubanyamideli bazwiho gukora kimono nziza
Kanyana yakuze yifuza gukora ahantu bamabara neza aza kwiyungura inama yo kujya akora iyo myambaro
Kanyana yifuza kugira inzu y imideli isohekera u Rwanda
Mu myambaro ikorerwa muri Kanyana world yibanda kuya Kinyafurika
Ubwoko butandukanye bwa kimono nibwo bukorwa na Kanyana
Umuhanzi Makembe mu mwambaro wa kanyana
Umukinnyi wa filimi Nana yambaye imyambaro ya Kanyana
Umukinnyi wa filimi uzwi nka Nikuze mu mwambaro wakozwe na Kanyana
Umunyamideli Aisha wanitabiriye Miss Rwanda na Miss suppranational Rwanda ari mu bakorana na Kanyana
Zimwe muri kimono zikorwa na Kanyana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .