Kizito Mihigo na Ngabonziza basubiyemo indirimbo “Sugira usagambe Rwanda”

Yanditswe na Uwiduhaye Theos
Kuya 30 Nzeri 2019 saa 12:06
Yasuwe :
0 0

Kizito Mihigo na Ngabonziza Augustin basubiyemo indirimbo “Sugira usagambe Rwanda” yamamaye mu bihe byo hambere, ivuga ku bwiza bw’u Rwanda.

Iyi ndirimbo irimo amagambo agira ati “Rwanda rwiza, Rwanda rw’abanyarwanda, Rwanda rwatubyaye, Rwanda rw’amahoro, Rwanda rw’ibiyaga, Rwanda rw’ibirunga gahoreho”

Iyi ndirimbo yahimbwe na Ngabonziza Augustin mu 1983. Muri iyo myaka Ngabonziza yaririmbaga muri Orchestre Irangira yari ikunzwe cyane mu Rwanda, naho Kizito Mihigo ari uruhinja rw’imyaka ibiri.

Abanyarwanda benshi cyane bazi iyi ndirimbo itaka ibyiza by’u Rwanda. Abakunze kumva indirimbo za burakeye mu gitondo kuri Radio Rwanda, bavuga ko itakundaga kuburamo.

Muri Gashyantare 2019, nyuma y’imyaka 36 iyi ndirimbo imaze ihimbwe, Kizito Mihigo nibwo yafashe umugambi wo gushaka nyirayo kugira ngo bafatanye kuyinononsora ndetse bayikorere n’amashusho.

Kizito yavuze ko Ngabonziza akimara kumva icyo gitekerezo yagishimye, bahera ubwo batangira akazi.

Ngabonziza azwi mu zindi ndirimbo nka ‘Ancilla’, ‘Yewe mwari’, n’izindi zagiye zigira igikundiro mu buryo bukomeye mu Rwanda.

Kizito we azwi mu ndirimbo zirimo izivuga ku butumwa bwo komora inguma abagizweho ingaruka na Jenoside yakorewe Abatutsi mu 1994 ndetse n’iziganisha ku iyobokamana nka ‘Inuma’, ‘Aho kuguhomba yaguhombya’ n’izindi nyinshi.

Amajwi y’iyi ndirimbo yahuriyemo na Ngabonziza yafashwe na Producer Nicolas, naho amashusho afatwa na Producer Faith Fefe usanzwe ukora amashusho y’umuhanzi Kizito Mihigo.

Muri iyi ndirimbo kandi, haragaragaramo bamwe mu babyinnyi b’itorero Inyamibwa bakunze kubyina mu mashusho y’indirimbo za Kizito Mihigo.

Ngabonziza na Kizito Mihigo mu ndirimbo Sugira usagambe Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza