Ncuti Gatwa ari guhatanira igihembo cy’umukinnyi witwaye neza mu bihembo bya sinema bikomeye muri Écosse

Yanditswe na Uwiduhaye Theos
Kuya 26 Nzeri 2019 saa 10:42
Yasuwe :
0 0

Ncuti Gatwa ukomoka mu Rwanda yashyizwe mu bari guhatanira ibihembo bya British Academy Scotland Awards [BAFTA], abikesheje filime yakinnyemo yitwa Sex Education.

Itangwa ry’ibi bihembo bitangirwa muri Écosse rigiye kuba ku nshuro ya 72. BAFTA igamije guha agaciro imirimo y’abahanga mu ruganda rwa sinema, imikino ndetse n’ibiganiro kuri televiziyo byigaragaje umwaka ushize.

Ibihembo by’uyu mwaka bizaba ku wa 3 Ukwakira 2019, ahitwa DoubleTree by Hilton Hotel Glasgow Central, biyoborwe na Edith Eleanor Bowman usanzwe akora kuri radiyo nka DJ akaba n’umunyamakuru kuri televiziyo, yanakoze kuri BBC.

Ibirori byo guca ku itapi itukura bitangira saa kumi n’imwe z’umugoroba muri Écosse ndetse guhera saa moya binyuzwa kuri Facebook imbona nkubone.

Saa yine z’ijoro itangwa ry’ibihembo byihariye muri BAFTA rizanyuzwa kuri BBC ishami ryayo muri Écosse no kuri BBC iPlayer.

Filime y’uruhererekane inyuzwa kuri televiziyo yitwa ‘The Cry’ ndetse n’indi ndende yitwa ‘Wild Rose’ nizo ziyoboye aho buri imwe iri guhatana mu byiciro bitatu muri ibi bihembo.

Jude MacLaverty, ukuriye BAFTA, yavuze ko bishimiye cyane gutangaza abazahatana uyu mwaka.

Ati “Twishimiye mu buryo bukomeye ibihembo by’uyu mwaka, gutangaza abahatana bizagaragaza ubukunga bwihishe mu guhanga ibidasanzwe mu ruganda rwa sinema muri Écosse.”

Edith Bowman uzayobora ibi birori yavuze ko BAFTA ifite umwihariko, ndetse avuga ko ababitegura bafite uruhare rukomeye mu iterambera ry’impano zihanga udushya ndetse ikaba urubuga rwo kumenyekaniraho.

Mu cyiciro Gatwa Ncuti ukomoka mu Rwanda arimo cya ‘Actor Television’ ahatanye n’uwitwa Alex Ferns wakinnye muri Chernobyl ndetse na Richard Madden wakinnye mu yitwa Bodyguard.

Ncuti ni umusore w’imyaka 26 wamamaye kubera filime y’uruhererekane yitwa Sex Education yerekanwa na Netflix.

Uyu musore utari ufite ubunararibonye buhambaye yakunzwe na benshi aho akina yitwa Eric uba ari umutinganyi.

Uyu musore wavukiye mu Rwanda, we n’umuryango bimukiye muri Écosse mu gihe cya Jenoside yakorewe Abatutsi mu 1994 akaba yarize ibijyanye no gukina ikinamico. Kuri ubu batuye mu Mujyi wa Tottenham mu Bwongereza.

Uretse Sex Education, Ncuti yagaragaye muri filime irimo abakinnyi nka Kim Cattrall na Nick Frost yakozwe muri Nyakanga uyu mwaka.

Yari aherutse kandi gushyirwa mu bahatanira ibihembo bikomeye bya MTV Movie & TV Awards mu byiciro bibiri; mu bakinnyi bari kuzamuka neza [Best Breakthrough Perfomance] ,no mu cyiciro cy’abasomanye neza [Best Kissing] aho ari kumwe n’uwo bakinana Connor Swindells uba witwa Adam Grof.

Muri Gicurasi 2019 ikinyamakuru gikomeye cya Elle cyamushyize ku rutonde rw’abanyempano 50 bari kugaragaza impinduka kurusha abandi [50 Game-changers].

Ncuti Gatwa ari mu bari guhatanira ibihembo bya BAFTA bikomeye muri Ecosse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza