Ncuti Gatwa yahishuye uko yagowe no gukina ari umutinganyi muri filime ‘Sex Education’ ica kuri Netflix

Yanditswe na Uwiduhaye Theos
Kuya 31 Nyakanga 2020 saa 03:04
Yasuwe :
0 0

Umunyarwanda Ncuti Gatwa umaze kwamamara cyane mu ruganda rwa sinema yahishuye ko yagowe no gukina umwanya yahawe muri filime ‘Sex Edution’ ariko agafunga umwuka akabikora.

Uyu musore w’imyaka 27 akina muri filime Sex Education ica kuri Netflix. Akina yitwa Eric Effiong. Muri iyi filime akinamo ari umusore w’umutinganyi ndetse hari aho agaragara afite imyitwarire nk’iy’abagore aho aba yambaye ‘umusatsi w’umukorano, yiteye ibirungo by’ubwiza yambaye n’inkweto ndende.’

Mu kiganiro yahaye Radio Times, yavuze ko ari ibintu byamugoye akibitangira. Yagize ati “Naratekerezaga nti Mana yanjye; umuryango wanjye, inshuti zanjye zose zo muri Tottenham nta muntu n’umwe urambona na rimwe mbere meze ntya!”

Yakomeje agira ati “Byari ikintu kigoye cyane ariko byamfashije kuba umukinnyi udasanzwe. Nagombaga kwigobotora ibyatumaga numva ntatekanye no gutekereza uko abantu bandi bazancira urubanza kandi niyumvisemo ko ndi igitangaza. Sinari narigeze niyumvamo ubwo butwari mu buzima bwanjye.”

Uyu musore aherutse kuvuga ko kuba umwe mu bakinnyi b’imena ba Sex Education kari agahigo gakomeye.

Ati “Kugira imyaka 25 y’amavuko uri umusore ariko nta mafaranga cyangwa akazi byangizeho ingaruka mu mitekerereze n’agaciro niha. Ubwo nabaga ndi ku muhanda mfite ivarisi yanjye, hari igitekerezo kigeze kunzamo mu mutwe wanjye, ndavuga nti ndi inzererezi.”

Yakomeje avuga ko iyo atagira inshuti ebyiri nziza atari kuba ageze aho ari ubu, kuko umwe yamufashe bakabana undi akajya amuha amafaranga yo kumutunga buri cyumweru.

Avuga ko ubwo buzima bwamugoye kugeza ubwo yatangiye kurwara agahinda. Ati “Nageze aho ndwara agahinda ariko sinigeze ntuma abantu bamenya uko niyumva kuko wari kuba ubaye undi mutwaro ku nshuti zanjye. Ubwenge bwanjye bwabaye umwanzi wanjye ukomeye.”

Gatwa yavukiye muri Nyarugenge mu Mujyi wa Kigali ku wa 15 Ukwakira 1992. Avuka kuri Dr. Tharcisse Gatwa, umunyamakuru akaba n’umwanditsi ukomeye ufite impamyabumenyi y’ikirenga mu by’iyobokamana ufite inkomoko i Karongi mu Burengerazuba bw’ u Rwanda.

Gatwa Ncuti n’umuryango we bimukiye muri Écosse mu gihe cya Jenoside yakorewe Abatutsi mu 1994 ndetse ni naho uyu musore yakuriye. Yize ibijyanye no gukina filime muri kaminuza ya Royal Conservatoire of Scotland, yahawe impamyabumenyi y’icyiciro cya kabiri cya Kaminuza mu ishami ryo gukina filime mu 2013.

Kuri ubu we n’umuryango we batuye mu mujyi wa Londres mu Bwongereza.

Yatangiye kwigaragaza mu 2014 akina muri filime yitwa ‘Bob Servant’ mu gace kamwe kayo, mu 2015 yongera gukora amateka mu yitwa ‘Stonemouth’ nayo agaragara mu bice bibiri byayo byonyine gusa.

Ku wa 11 Mutarama 2019 nibwo yahamije ibikorwa bye, ubwo filime y’uruhererekane yitwa ‘Sex Education’ yatangiraga kwerekanwa kuri NetFlix, ari mu bakinnyi b’imena.

Muri iyo filime aba akina ari umusore w’umutinganyi witwa Eric Effiong ukomoka mu muryango w’abihaye Imana muri Afurika.

Gatwa ari mu bakinnyi bashimisha benshi muri Sex Education
Ncuti Gatwa yavuze ko kujya muri Sex Education byari ibintu bikomeye kuri we
Ncuti muri Sex Educationa aba afite imyitwarire idasanzwe, yitwara nk'uryamana n'abo bahuje igitsina
Uyu musore ni umwe mu banyarwanda bake muri sinema bamaze kubaka izina ku rwego mpuzamahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .