Amayobera ku gitabo cya Past Nsanzurwimo wahamijwe Jenoside gikoreshwa muri ADEPR

Yanditswe na Musangwa Arthur
Kuya 12 Ugushyingo 2019 saa 02:40
Yasuwe :
0 0

Ni amayobera! Ntabwo bisanzwe mu Rwanda kubona uwo inkiko zahamije icyaha cya Jenoside yakorewe Abatutsi igahitana abasaga miliyoni mu minsi 100 gusa, yandika igitabo yivuga ibigwi kigahabwa umwanya uhebuje n’umugisha wo gukorerwaho ubushakashatsi no kwigishirizwamo.

Ibi ntabwo ari umugani cyangwa ibitekerezo nka bya bindi bya Ruganzu kuko Past Nsanzurwimo Joseph, wahamijwe icyaha cya Jenoside akaba ari mu buhungiro mu Bubiligi, yanditse igitabo gishyirwa mu bisomwa bikanakorerwamo ubushakashatsi mu isomero rya ADEPR riri mu Kagarama ku Kicukiro.

Iki gitabo cyitwa “Histoire de l’Eglise de Pentecote au Rwanda”. Past Nsanzurwimo wacyanditse yayoboye ADEPR guhera mu 1984 kugeza muri Nyakanga 1994. Yacyandikiye mu buhungiro mu Bubiligi aho aba, agisohorera muri Suède mu 2009.

Uretse kugikoreraho ubushakashatsi, usanga muri iyi minsi kinashingirwaho mu kwandika izindi nyandiko zihabwa abayoboke ba ADEPR kandi ingero zirahari.

Past Nsanzurwimo mu cyasha cya Jenoside

Past Nsanzurwimo, Urukiko Gacaca rwa Gihundwe rwamukatiye igihano cy’igifungo cya burundu, aho yari mu rubanza rumwe n’uwari Depite Elysée Bisengimana (arafunzwe yakatiwe imyaka 19), bakaba barakoreye Jenoside muri GS Gihundwe.

Mu bafatanyije na Past Nsanzurwimo kandi harimo Remesha (Yapfuye avuye kuburana muri Gacaca), Ruhire Murwanashyaka (Arafunzwe) na Pasiteri Seromba (Yaracitse). Mu bandi bafatanyije harimo umuhungu wa Nsanzurwimo witwa Nsanzurwimo Jean Pierre wakatiwe imyaka 19 n’Urukiko rwa Kamembe.

Ugendeye kuri iki gitabo wakwibaza impamvu ubuyobozi bwa ADEPR buyobowe na Rev. Karuranga na Rev. Karangwa butiza umurindi ingengabitekerezo ya Jenoside, no guha agaciro abasize bahekuye u Rwanda.

Iki gitabo ugisesenguye neza usanga kijojoba ingengabitekerezo ya Jenoside no gusingiza ubutegetsi bwateguye bukanashyira mu bikorwa Jenoside yakorewe Abatutsi.

Ku rupapuro rwa 225 hagaragaraho ikirangantego cya Leta ya Habyarimana kandi igitabo cyaranditswe u Rwanda rufite ikirangantego gishya kuko kimaze imyaka 10 gusa gisohotse. Iki ni ikimenyetso simusiga cyatuma buri wese abona ko iki gitabo kidakwiye no gukandagira mu Rwanda.

Ku rupapuro rwa 235 hariho ifoto ya Habyarimana Yuvenali n’abandi bayobozi ba ADEPR, abenshi barahunze kubera Jenoside basize bakoze. Ku rupapuro rwa 208 hariho ibaruwa Nº 967/A/4-1 Nsanzurwimo Joseph yandikiye Perezida Habyarimana Yuvenali.

Amateka ya ADEPR, Nsanzurwimo yanditse muri iki gitabo cye, yashyizemo ayo kuva mu 1960 kugeza mu 1993 ndetse yirengagiza n’uruhare rwa bamwe mu ba Pasiteri bagize muri Jenoside yakorewe Abatutsi mu 1994, kandi icyo gihe cyose yari ahari ariko akabyirengagiza ntabyandikeho.

Kugera kuri Jenoside yakorewe Abatutsi ntiyandike uko ADEPR yitwaye ari we wari uyiyoboye na nyuma yayo ntagire icyo ayitangazaho, bigaragaza ingengabitekerezo ikomeye.

Uko iki gitabo gihabwa umugisha muri ADEPR

ADEPR yatungwa urutoki ku ruhare rukomeye rwo gukwirakwiza icyo gitabo kiri mu isomero rya Facultés de Théologie Evangelique de Kigali (FATEK), ishuri rya ADEPR riri mu Karere ka Kicukiro, mu Murenge wa Kagarama kuko cyashyizwemo 2017.

Ibi ni ukugira ngo abanyeshuri, abakora ubushakashatsi n’abandi bagana iryo somero bagotomere ingengabitekerezo ya Past Nsanzurwimo iri muri icyo gitabo.

Ubuyobozi bwa ADEPR kandi bufatira icyitegererezo kuri iki gitabo kuko mu gitabo cyasohotse tariki ya 16/03/2018 cyiswe “Inyigisho ku mwuka wera, abizera bashya n’umurimo w’uburirimbyi” cyashyizwe mu byifashishijwe mu kwandika.

Iki gitabo cyashyizweho umukono na Rev. Past Karuranga Ephrem na Rev. Karangwa John, bayobora ADEPR, kigaragaza ko zimwe mu nyandiko zikirimo zanditswe hashingiwe (Reference) ku gitabo cyanditswe na Nsanzurwimo Joseph.

Muri iki gitabo ‘Inyigisho ku mwuka wera, abizera bashya n’umurimo w’uburirimbyi’ ku rupapuro rwa 49 havugwamo ko ikibazo cyo kubyina no kuririmba Perezida w’u Rwanda cyagoye ADEPR mu 1987 nk’uko byanditswe na Nsanzurwimo kuva ku rupapuro rwa 129 kugeza ku rwa 130.

Aha ngaha Nsanzurwimo yavugaga uko abayoboke ba ADEPR bagomba kwirinda ibyo kubyina barata ibigwi by’abayobozi b’igihugu, akavuga ko mu 1987 hari ababizize bikazanira akaga itorero bityo abantu bajya babigiramo ubwenge.

Iki gitabo cya Nsanzurwimo hamwe n’ibindi bitabo birimo gukwirakwizwa mu bayoboke ba ADEPR bigishingiyeho, ntawahakana ko bifite ingaruka ku bumwe n’ubwiyunge by’Abanyarwanda.

ADEPR igikoresha cyarahagaritswe?

Mu kiganiro IGIHE yagiranye n’Umuvugizi Mukuru wa ADEPR, Rev Past Karuranga Ephrem, yavuze ko abizi ko hari igitabo cya Past Nsanzurwimo byemejwe ko kitakoreshwa ariko atazi neza niba ari ikivuga amateka ya Pantekote mu Rwanda cyangwa ikindi.

Ati “Icyo ngicyo ntabwo nkizi njyewe kubera ko hari igitabo cye byanzwe ko gikoreshwa kandi birananzurwa mu itorero ryacu ku buyobozi bwabanje. Ntabwo nzi ko ari icyo ngicyo ariko hari igitabo yigeze kwandika kivuga ku mateka y’u Rwanda.”

Abajijwe niba icyahagaritswe ari icyitwa ‘L’histoire de l’Eglise de Pentecôte au Rwanda’, yasubije ati “Icyo ngicyo ngira ngo mu nteko rusange yabaye icyo gitabo twanzuye ko tutagikoresha mu Rwanda. Ntabwo icyo gitabo tugifata nk’igitabo tugikoresha.”

Abwiwe ko mu isomero rya FATEK kirimo yavuze ko ibyo byabazwa abakuriye iryo somero ry’ishuri rya Tewolojiya rya ADEPR.

Gusa ibi biteye urujijo kuko hari amakuru agera kuri IGIHE y’uko iki gitabo cya Nsanzurwimo cyahagaritswe ariko mu 2017 kigahabwa agaciro n’ubuyobozi buriho bukagishyira muri FATEK ndetse mu 2018 bikagaragara ko cyifashishwa mu kwandika ibitabo byo kwigisha abayoboke ba ADEPR.

Umuntu yasoza yibaza niba ‘kwemera ko ADEPR ikoresha ibitabo bya Past Nsanzurwimo bitaniye he no guha ikiganiro Jean Kambanda?’.

Igitabo cya Past Nsanzurwimo cyasohotse mu 2009
Mu 2017 cyashyizwe mu Isomero ry'Ishuri ryigisha Tewolojiya rya ADEPR riri ku Kicukiro ryitwa FATEK
Cyandikiwe mu Bubiligi ariko cyasohokeye muri Suède
Muri iki gitabo ikarita y'u Rwanda iherekejwe n'ikirangantego cyo ku ngoma ya Habyarimana cyahinduwe mu myaka 16 ishize
Ibaruwa Past Nsanzurwimo yandikiye Perezida Habyarimana
Ifoto ya Habyarimana na bamwe mu bayobozi ba ADEPR
Igitabo ADEPR yasohoye mu 2018 harimo inyandiko yakuye mu cya Nsanzurwimo
ADEPR yafashe icyitegererezo mu gitabo cya Nsanzurwimo (Reba nimero 20)
Iki gitabo cyasinywe n'abayobozi bakuru ba ADEPR

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza