Ibihe turimo birusheho gutuma twiyegereza Imana

Yanditswe na Padiri Victor Amerika
Kuya 22 Werurwe 2020 saa 09:03
Yasuwe :
0 0

Turi mu rugendo tutabona neza icyerekezo n’iherezo ari ko kandi hari icyizere cyo gutabarwa. Tumeze nk’Aburahamu igihe yari mu nzira ajya gutura umwana we Izaki, umwana akamubaza ati “Dawe! Ko mbona umuriro n’inkwi, intama yo gutamba irava he” ? Aburahamu akamusubiza ati“Imana iri burebe aho yibonera intama yo gutamba, Mwana wanjye” (Reba Intg 22, 6-8).

Natwe, turibaza tuti ko Icyorezo cya Coronavirus gikomeje kurimbura imbaga, igisubizo kizava he!

Isi iri mu bihe bikomeye byo guhangana n’icyorezo cya Coronavirus. Ibintu byose byahagaze! Abantu bikingiranye mu nzu zabo. Bamwe babonye akanya ko gutekereza ku buzima muri iyi si, ubuzima twakira ariko kandi bukaducika tubureba! Abandi nabo bahugiye mu gushaka inkomoko y’iki cyorezo babaye nk’abigishwa ba Yezu, bo bamubajije igihe bahuraga n’umuntu wavutse afite ubuhumyi, bati “Mwigisha, uwacumuye ni nde! Ni uyu muntu cyangwa ni ababyeyi be”( Yh 9, 2)! Natwe muri ibi bihe dushobora kubaza Imana tuti “Ni nde waduteje iki cyorezo koko! Ni nde Nyirabayazana?”

Bavandimwe, icy’ingenzi si uguhugira mu kwibaza icyateye iyi ndwara. Ahubwo icy’ingenzi ni ukuyirwanya uko dushoboye no kuyikuramo isomo rikomeye ndetse rishobora guhindura imyumvire n’imibereho yacu, imbere y’abandi n’imbere y’Imana.

Twari dusanzwe tubona igihe cyo gusenga tukagikoresha nabi, Imana tukayiburira umwanya, Umunsi w’Imana tukawusimbuza ibindi twaburiye umwanya cyangwa ibindi byo kwinezeza! None rero iki gihe tugarukire Imana no kuyihungiraho kuko ari yo yonyine mutabazi. Tumurikirwe n’iri jambo riri mu gitabo cy’umuhanuzi Hozeya rigira riti “Nimuze tugarukire Uhoraho. Niwe wadukomerekeje kandi niwe uzatuvura, niwe wadukubise, ni nawe uzomora ibikomere byacu” (Hoz 6, 1).

Twari tuzi ko abahanga n’abanyabwenge n’iyi si ntacyabasoba kuko bakoze n’ibindi byinshi byiza tugatangara! Nk’uko Zaburi ya 23 ibidusaba dukurikire ibyo Nyagasani adusaba kuko ari we mushumba wacu. Niwe dukwiye kwiringira aho kwiringira umwana w’umuntu.

Bamwe bibwiraga ko bari hejuru y’abandi kubera ubutunzi bw’isi barushanywa icyubahiro, ubwiza bw’isura, inkomoko, amavuko n’ibindi! None twabonye ko hari igihe ibiremwa byose bireshya, usumba abandi akaba ari uzi guca bugufi imbere y’Imana. Nibyo koko Imana ntireba nk’abantu.

Imana ntireba nk’abantu. Ibyo tubona bisa nk’ibikomeye imbere y’Imana biroroshye. Ibyo tudafitiye igisubizo Nyagasani aragifite. Erega iyo Nyagasani tumusabye ntahite aduha icyo tumusabye aba agira ngo asuzume Ukwihangana kwacu! Nk’uko umuhanuzi Ezekiyeli abivuga ahumuriza abantu bo mu gihe cye ati “Nimuhumure, uhoraho arahibereye” . (Ezk 48, 35)!

Igihe turimo ni igihe cyo kuba maso. Nk’uko Pawulo mutagatifu abitubwira mu ibaruwa yandikiye abanyefezi agira ati ‘Kanguka wowe usinziriye! Haguruka uve mu bapfuye maze Kristu akumurikire” (Ef 5, 14). Abapfuye Pawulo yavugaga ni ababaho mu mwijima bagahunga urumuri rwa Kristu rugaragazwa n’ibikorwa byiza.

Turasabwa kugenza nk’abana b’urumuri. Tukava mu byaha n’ibindi byose bidutandukanya n’Imana kuko aribwo tuzaronka ubutungane nyakuri. (Ef 5, 8-12).

Nyagasani ntiyazanywe no gukiza intungane ahubwo yazanywe no kiza abarwayi n’abanyabyaha. Nka wa Muntu wari waravutse afite ubuhumyi, dupfukamire Imana, tuyinginge kandi duhamye ukwemera kwacu. (Yh 9, 35-38).

Dusenge: “Nyagasani, icyi Cyumweru cyari icy’ubucengezanema ku bitegura kubatizwa ari bakuru. Natwe turapfukamye ngo uducengezemo inema zawe, tumenye neza ugushaka kwawe muri ibi bihe, maze icyo ushaka abe aricyo gikorwa.

Nyagasani, turakwinginze ngo udukize ibyago byose, ibi bihe turimo ubisakazemo amahoro aturuka iwawe. Impuhwe zawe niziturengere, zidukize icyaha cyose, ziturinde amakuba yose, Mu gihe tugitegereje ya mizero mahire n’ukuza k’Umukiza wacu Yezu Kristu. Kuko ubwami n’ububasha n’ikuzo ari ibyawe iteka ryose. Amen”.

Nyagasani Yezu nabane namwe!

Padiri Victor AMERIKA


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza