00:00:00 IGIHE NETWORK KN KINYARWANDA EN ENGLISH FR FRANCAIS

Padiri Amerika yamuritse igitabo ‘Muzabamenyera ku mbuto bera’, Past Mpyisi agaya abo amadini yagize ‘kasuku’

Yanditswe na Ferdinand Maniraguha
Kuya 2 Gicurasi 2021 saa 07:51
Yasuwe :
0 0

Padiri Amerika Victor yamuritse igitabo ‘Muzabamenyera ku mbuto bera’ kivuga ku buyobe bumaze igihe bwigaragaza mu madini aho benshi bamaranira mu bibatanya, aho kureba ibibahuza bijyanye n’icyo ijambo ry’Imana rivuga.

Ni igitabo Padiri Amerika avuga ko yanditse nyuma yo kubona ko buri munsi amadini yiyongera ariko umusaruro uyavamo ntugaragarire mu mbuto abayarimo bera.

Mu gikorwa cyo kumurika iki gitabo cyabaye kuri uyu wa Gatandatu muri muri Centre Saint Paul i Kigali, Padiri Amerika yavuze ko abigisha mu madini bakwiriye guhindura imikorere, bagaharanira kwigisha abayoboke babo ibituma berera bagenzi babo imbuto batagendeye ku myemerere, ahubwo bishingiye ku bumuntu.

Ati “Burya umuntu utemera n’iyo wamwigisha ntacyo yafata ariko nanone kuvuga ngo uremera gusa ukemera ibintu utabisobanukiwe, ni bwa bujiji.Uwigisha ijambo ry’Imana ntakwiriye kuvugira mu rwihishwa , akwiriye kuvugira ahabona kugira ngo ikidasobanutse gisobanuke.”

Yavuze ko mbere na mbere umuntu kugira ngo yemere, akwiriye kubanza kwigishwa kugira ngo amenye ishingiro ry’ukwemera kwe, bimuyobore mu kwerera abandi imbuto nziza, aho kuba imbata y’idini nk’umufana.

Ati “Turagira ngo wa muntu aho ari ajijuke hanyuma niyera imbuto azamenye n’imbuto ategereje. Ntabwo wakwera imbuto utazi aho uhagaze. Twigisha abantu kugira ngo bajijuke hanyuma bere imbuto.”

Pasiteri Ezra Mpyisi, umudivantiste w’umunsi wa karindwi akaba umwe mu bifashishijwe mu gutanga inyigisho muri iki gitabo, yavuze uburyo na we akijya mu idini, ibyo bamubwiraga byose yabimiraga bunguri, nta bushishozi ashyizemo.

Ati “Ijambo ry’Imana naryakiraga nkuko abapasiteri babimbwiraga, nkaryakira nka kasuku. Icyo bavuze nkavuga icyo, icyo bambwiye kwanga nkacyanga icyo bambwiye gukunda nkagikunda, mbifata ntyo mba umukiristo wirinda, ukomeye kugira ngo Imana izanjyane mu ijuru.”

“Nabaye mwarimu, igihe kiragera mba pasiteri , ariko pasiteri kasuku uvuga ibyo abwiwe. Mba umukiristo w’intangarugero ariko ufite ubwoba. Nakora icyaha nkajya ku mavi nkasenga ngo ngiye kubura ijuru. Barambwiye ngo gusenga no kwiyiriza nibyo bizatuma ubona ijuru. Icyacumi n’amaturo nkabyitondera. Mpindura imibereho myiza ikiguzi cyo kuzajya mu ijuru, kandi baratubwiraga bati iby’Imana ntibibazwa, ubyemera uko ubibwiwe. Nkabikora ariko sinyurwe.”

Pasiteri Mpyisi avuga ko yagiye kwiga iyobokamana mu mahanga ngo arebe ko yagira ubumenyi bwisumbuye kubwo yari azi, agaruka uko yagiye.

Ati “Njya mu mahanga niga théologie imyaka ine, mvamo ndi kasuku, nzi ko idini ry’Imana ari abadivantisiti b’umunsi wa karindwi, abandi bose ntumbwire ibyiza bakora, nti barayobye kuko niko nabwirwaga. Igihe kiragera nza gusanga Bibiliya tuyisoma bunyuguti kandi bunyuguti iricisha.”

Pasiteri Mpyisi yavuze ko abayoboke b’amadini, bakwiriye gusoma neza ibyanditswe, bagasaba guhabwa ubwenge bwo guhishurirwa no kumenya neza icyo bishatse kuvuga.

Ati “Uba ukwiriye kumenya icyanditswe kiri muri icyo cyanditswe cyo kitanditswe […] Mbere nubahaga ikimpa umugati, igihe kiragera nsanga ibyo byose ari ubusa.”

Mu gitabo ‘Muzabamenyera ku mbuto bera’, umwanditsi agaragaza uburyo abantu bafite inyota yo kumenya cyane ibyo bemera, ndetse agahera muri Kiliziya Gatolika abarizwamo ashingiye ku bibazo yabajijwe ubwo bateguraga iyogezabutumwa rivuguruye mu 2017.

Ibibazo byabajijwe muri iryo yogezabutumwa, rigaragaza ko hari abatereye icyizere amadini cyangwa se bayarimo ariko nta musaruro.

Soeur Jacqueline Mukesharugo, umwe mu batanze inyigisho ziri muri icyo gitabo, yavuze ko nubwo haba hari abatereye icyizere amadini, badakwiriye kwivumbura kuko kugira neza bifitiye inyungu ubikora n’ubikorerwa.

Ati “Ntabwo bakwiriye kwivumbura ku Mana cyangwa se aho basengera. Burya muri kamere muntu ntabwo umuntu ashobora kuva ku Mana burundu. N’iyo yava mu madini akavuga ati nta dini ngira nsengeramo ariko yabyemera atabyemera, Imana iba imurimo.

Yakomeje agira ati “N’izo mbuto batabona, byaba ari kwa kundi umukobwa aba umwe agatukisha bose, ntabwo ari uko imbuto zabuze hose, n’uko nta muryango ubura ikigoryi, uziburiye ibumoso ntiwaziburira iburyo.

Musenyeri Havugimana André yavuze ko ibikorwa byiza umuntu akora bidakwiriye gushingira ku idini cyangwa irindi vangura, ahubwo ko gukora neza bikwiriye kuba umukoro wa buri wese.

Yavuze ko uwerera abandi imbuto aho yaba aherereye hose, abera urugero rwiza abandi.

Ati “Abantu bemezwa n’ubuhamya butangwa n’abantu b’Imana iyo babereye imbuto. Aho uzamusanga hose yerera abandi imbuto nziza, bazakurizamo gusingiza Imana data.”

Padiri Amerika Victor amaze gushyira hanze ibitabo bitatu birimo ‘Nzi uwo nemeye’, ‘Urarwubake cyane’ na ‘Muzabamenyera ku mbuto bera’.

Padiri Amerika yavuze ko umuntu kugira ngo yemere, akwiriye kubanza kwigishwa kugira ngo amenye ishingiro ry’ukwemera kwe
Umunyamakuru Cleophas Barore wari uyoboye umuhango wo kumurika igitabo
Padiri Dr. Alexandre Uwizeye wakurikiranye imirimo yo kwandika igitabo "Muzabamenyera ku mbuto zabo"
Iki gitabo kigamije gufasha abemera gusobanukirwa n'ibyo bemera ngo bere imbuto nziza
Pasiteri Mpyisi yavuze ko abayoboke b’amadini, bakwiriye gusoma neza ibyanditswe, bagasaba guhabwa ubwenge bwo guhishurirwa no kumenya neza icyo bishatse kuvuga
Musenyeri Havugimana André yavuze ko ibikorwa byiza umuntu akora bidakwiriye gushingira ku idini cyangwa irindi vangura
Mukansanga, umwe mu bitabiriye imurika ry'igitabo 'Muzabamenyera ku mbuto bera'
Soeur Jacqueline Mukesharugo yavuze ko nubwo haba hari abatereye icyizere amadini, badakwiriye kwivumbura kuko kugira neza bifitiye inyungu ubikora n’ubikorerwa
Mukantagara Anastasie, umubyeyi wa Padiri Amerika yitabiriye uyu muhango
Sibomana Oscar, umwe mu bafasha Padiri Amerika gutunganya ibitabo bye
Igitabo 'Muzabamenyera ku mbuto bera' cyagizwemo uruhare n'abandi bantu barimo abo mu madini atari Kiliziya Gatolika

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .