Bwa mbere Itorero ‘Impact Centre Chrétien’ rigiye gukorera igiterane gikomeye mu Rwanda

Yanditswe na Nkurunziza Ferdinand
Kuya 6 Werurwe 2020 saa 08:10
Yasuwe :
0 0

Nyuma y’igihe gito Itorero Impact Centre Chrétien (ICC) rigeze mu Rwanda ryatangaje ko rigiye gukora igiterane kizahuriza hamwe abavugabutumwa batandukanye barimo n’abakomoka ku Mugabane w’i Burayi.

Iki giterane kizamara iminsi itatu, kizatangira ku wa 19 kigere ku wa 21 Werurwe 2020, kuri Kigali Convention Centre, aho kwinjira bizaba ari ubuntu.

Abazacyitabira bazasobanurirwa byimbitse ‘Ijambo rya Yesu Kirisitu’ ndetse n’akamaro k’umubiri wa Kirisitu by’umwihariko ku Rwanda.

Umuyobozi ushinzwe Itumanaho mu Itorero ICC, Karen Mambiki, yavuze ko nta muntu uwo ari we wese n’imyemerere ye uzahezwa mu giterane kizitabirwa n’abavugabutumwa bahagarariye iri torero mu bice bitandukanye by’Isi n’abo mu Rwanda.

Yagize ati "Inyigisho zizahatangirwa zizafasha abantu kubohoka no kurushaho kumenya ‘Yesu Kirisitu.’’

Iri torero riyobowe na Pasiteri Yvan Castanou, na we uzaba ari i Kigali gusangiza ijambo ry’Imana abazitabira icyo giterane.

ICC imaze kugira amashami asaga 85 hirya no hino ku Isi by’umwihariko mu bihugu byose bivuga Ururimi rw’Igifaransa, Francophonie.

Inyigisho zizatangirwa muri iki giterane zizaba ziri mu rurimi rw’Igifaransa ariko zisemurwe mu Kinyarwanda. Abagiteguye bahamya ko kizaba ari n’umwanya mwiza wo gutangiza ku mugaragaro iri torero mu Rwanda.

Gahunda y’iki giterane iteganya ko ku wa Kane tariki ya 19 Werurwe no kuwa Gatanu tariki ya 20 Werurwe 2020, kizajya gitangira saa Kumi n’Ebyiri kugeza saa Tatu z’umugoroba. Ku wa Gatandatu tariki ya 21 Werurwe, igiterane kizatangira saa kumi kigeze saa Moya z’umugoroba.

Itorero rya Impact Centre Chrétien ryashinzwe mu 2002, rifite inkomoko i Paris mu Bufaransa, ari na ho hari icyicaro gikuru. Iri torero ryatangiye gukorera mu Rwanda mu mwaka ushize.

Buri cyumweru abayoboke baryo bakora amateraniro 106, agahuza abayoboke barenga 26 400.

Kubera inyigisho zifasha abatari bake zishingiye ku butumwa bw’Umwami Yesu Kirisitu, abayoboke ba Impact Centre Chrétien biyongera ku rugero rwa 27% buri mwaka.

Bwa mbere itorero ‘Impact Centre Chrétien’ rigiye gukorera igiterane gikomeye mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .