Korali Maranatha yo muri ADEPR Rukiri igiye kumurika album ya gatatu

Yanditswe na IGIHE
Kuya 10 Ukwakira 2019 saa 09:58
Yasuwe :
0 0

Korali Maranatha ikorera umurimo w’ivugabutumwa ry’indirimbo mu Itorero rya ADEPR Paruwasi ya Rukiri I mu Mujyi wa Kigali yateguye igitaramo izamurikiramo album yayo ya gatatu y’indirimbo zatunganyijwe mu buryo bw’amajwi.

Iki gitaramo cyiswe “Ibuye rizima Album Launch’’ giteganyijwe kubera kuri ADEPR Rukiri I ku Cyumweru, tariki ya 13 Ukwakira 2019.

Korali Maranatha izaba inafata amashusho ya album yayo ya gatatu izashyira hanze mu mpera z’umwaka wa 2019.

Abazitabira iki gitaramo bazataramirwa n’umuhanzi Danny Mutabazi wamamaye mu ndirimbo “Calvary” n’amakorari arimo Abakorerayesu ya ADEPR Rukurazo, Jehovaniss, Ijwi ry’Impanda na Siloam yo ku Mudugudu wa ADEPR Rukiri I. ijambo ry’Imana rizigishwa n’Umuvugabutumwa Dr Byiringiro Samuel.

Umuyobozi wa Korali Maranatha, Nteziryayo Simeon, yabwiye IGIHE ko imyiteguro irimbanyije bategereje umunsi w’igitaramo.

Yagize ati “Umuzingo tugiye kumurika uzaba ugizwe n’indirimbo umunani. Twizeye kuzagirana ibihe byiza n’abakunzi b’ibihangano byacu n’iby’umusaraba muri rusange.’’

Korali Maranatha yatangiye umurimo w’ivugabutumwa mu 1996 ari itsinda ry’abantu batarenze 10 baririmba mu materaniro y’umudugudu mushya wari umaze igihe gito uvutse.

Nyuma y’imyaka isaga 23 iyi korali ibonye izuba ubu abaririmbyi bayo babarirwa muri 80. Bamwe mu bayinyuzemo Imana yabaciriye inzira babona imirimo itandukanye irimo iy’ivugabutumwa n’iyindi mu bice bitandukanye by’Isi.

Korali Maranatha yanyuzemo abantu batandukanye bari n’abo amazina yabo azwi mu Itorero rya ADEPR nk’Umuvugabutumwa Fred Kalisa, umuhanzikazi Nsabimana Gisèle Precious na Umuhoza Aurélie Ushinzwe Ubutegetsi n’Imari muri ADEPR

Iyi korali yakoze album ya mbere y’amajwi mu mwaka wa 2009, iya kabiri isohoka mu mwaka wa 2014.

Korali Maranatha yo muri ADEPR Rukiri igiye kumurika album ya gatatu
Danny Mutabazi yamamaye mu ndirimbo zirimo ’Binkoze ku mutima’, ’Ufite uwo mwana’, ’Calvary’, ’Getsemani’, ’Ineza yawe’, ’Ntiyasinziriye’ na ’Ntiwanyihakanye’
Korali Maranatha yatumiye umuhanzi Danny Mutabazi mu gitaramo izamurikiramo album yayo ya gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza