Umuryango w’ivugabutumwa wa Pst Julienne Kabanda wahurije amatsinda y’ibigwi mu giterane gikomeye

Yanditswe na Uwiduhaye Theos
Kuya 19 Ukwakira 2019 saa 09:12
Yasuwe :
0 0

Umuryango w’ivugabutumwa wa Grace Room Ministries washinzwe na Pasiteri Julienne K. Kabanda wateguye igiterane cy’imbaturamugabo cyahawe inyito ‘‘Your Glory Lord’’ kizahuriramo amatsinda yo kuramya n’abashumba bafite amazina akomeye mu murimo w’ivugabutumwa mu Rwanda.

Iki giterane cyatumiwemo abashumba barimo uw’Itorero Angilikani muri Paruwasi ya Remera, Pasiteri Antoine Rutayisire; Apôtre Mignone Alice Kabera uyobora Women Foundation Ministries na Noble Family Church; Apôtre Sostene Serukiza; Pasiteri Muhire Fidèle; Umugabo wa Pasiteri Julienne Kabanda; Kabanda Stanley n’abandi.

Abazacyitabira kandi bazasusurutswa n’amatsinda amaze kwamamara mu muziki wo kuramya Imana arimo True Promises, Gisubizo Ministries na Healing Worship Team.

Mu kiganiro Pasiteri Julienne Kabanda yagiranye n’itangazamakuru, yavuze ko iki giterane ari Imana yakimushyize ku mutima, akaba ari isezerano ryayo rigiye gusohozwa.

Avuga ko iki giterane kigamije gusenga, abantu bagatakambira Imana bayisaba ko icyubahiro cyayo cyongera kuzamurwa.

Yagize ati “Iki giterane ni Imana yakinshyize ku mutima, hashize igihe kinini ngifite. Muri iki giterane abantu bagiye gutaka bazamura amajwi yabo batakira Imana basaba ko icyubahiro cyayo gikomeza gukwira no kugera mu Rwanda.”

Pasiteri Kabanda yavuze ko batekereje gutumira abashumba bafite amazina akomeye kandi benshi kugira ngo bahuze imbaraga mu gusaba Imana kongera kuzana icyubahiro cyayo.

Iki giterane kizaba mu minsi itatu, kuva ku wa 1 kugeza ku wa 3 Ugushyingo 2019 muri Petit Stade i Remera mu Mujyi wa Kigali.

Umunsi wa mbere kizatangira saa kumi n’imwe z’umugoroba gisozwe saa mbiri, mu minsi ikurikiyeho ni ukuvuga ku wa Gatandatu no ku Cyumweru kizajya gitangira saa munani gisozwe saa mbiri z’ijoro.

-  Inkomoko ya Grace Room Ministries

Grace Room Ministries ihuza abantu bavuye mu matorero atandukanye bagamije gusenga no kurushaho kwiyegereza Imana, ubu irimo ababarirwa muri 800 biganjemo urubyiruko.

Uyu muryango w’ivugabutumwa umaze umwaka ushinzwe waturutse ku iyerekwa Pasiteri Julienne K. Kabanda yagize ubwo yari mu nzozi maze ku wa 6 Gicurasi 2018 Imana isohoza umugambi ubwo habaga ibirori byo kuyitangiza ku mugaragaro.

Yavuze ko uyu muryango w’ivugabutumwa yawutangije kubera ihishurirwa yagize mu nzozi aryamye.

Ati “Itangizwa rya Grace Room Ministries navuga ko ari iyerekwa Imana yanshyize ku mutima. Nabyiyumvagamo ariko ntarabasha kubisobanura neza. Ijoro rimwe nari mpagaze ahantu nkikijwe n’abantu benshi buri wese afite ikintu kimubabaje, nasaga n’uri hejuru yabo bo bari hasi.’’

“Nkitangaye cyane mbura uko mbigenza. Nkibareba mbona ijambo ryanditswe hejuru yabo rya ‘My Grace’ bishatse kuvuga ngo ‘Ubuntu bwanjye’, nahise mbihuza n’ijambo ryo muri Bibiliya ngo Ubuntu bwawe burampagije.”

Avuga ko nyuma y’izo nzozi yakangutse yahise atekereza ko agomba gutangiza ivugabutumwa rya Grace Room Ministries.

Avuga ko Imana yamutumyeho umubyeyi waje iwe mu rugo amusanga mu ruganiriro ubwo yari ari gusengana n’abandi hanyuma amubwira ko Imana yamubwiye ko agiye kugira abantu benshi bahuye banyuze mu bintu bikomeye amusaba gutinyuka agashyira mu bikorwa ibyo Imana yamubwiye mu nzozi.

Icyo gihe yahise atangiza uyu muryango w’ivugabutumwa, abantu batandukanye bamwiyungaho. Ubu ntabwo barabona aho bakorera, ariko bamaze kugura ikibanza ndetse bakaba bateganya kubaka.

Pasiteri Kabanda asanzwe afatanyije n’umugabo we Pasiteri Kabanda Stanley kuyobora Jubilee Revival Assembly Church, itorero rifite icyicaro i Remera.

Pasiteri Kabanda ni umwe mu bavugabutumwa bafite amavuta bigisha benshi bagahembuka, bakongera gusubizwamo ibyiringiro
Pasiteri Julienne Kabanda yateguye igiterane cy'imbaturamugabo yatumiyemo abavugabutumwa bakomeye mu Rwanda
Pasiteti Julienne Kabanda ni we washinze Umuryango w'Ivugabutumwa wa Grace Room Ministries nyuma y'iyerekwa yagize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza