00:00:00 IGIHE NETWORK KN KINYARWANDA EN ENGLISH FR FRANCAIS

Korali Shalom yasohoye amashusho y’indirimbo yatunganyirijwe muri Afurika y’Epfo

Yanditswe na Ishimwe Israel
Kuya 19 Mutarama 2021 saa 08:32
Yasuwe :
0 0

Korali Shalom ikorera ivugabutumwa rinyuze mu ndirimbo muri ADEPR Nyarugenge yasohoye indirimbo nshya yise “Ijambo Rirarema” ikubiyemo ubutumwa bugaragaza ko icyo Uwiteka yavuze ku muntu byanze bikunze gisohora.

“Ijambo Rirarema” ni indirimbo y’iminota ine n’amasegonda 25; ikozwe mu buryo bwihariye bugaragaza ko mu buzima bwa buri munsi abantu banyuramo, ijambo bavuzweho rirema ibintu bikomeye.

Amashusho yayo yafashwe agaragaza abaririmbyi ba Korali Shalom, bari mu mirimo itandukanye, irimo iyo mu rugo nko kurera abana, ubucuruzi n’iyo mu biro.

“Ijambo Rirarema” ni yo ndirimbo ya mbere Korali Shalom yashyize hanze kuva umwaka wa 2021 watangira. Iheruka yitwa “Mfite ibyiringiro” yagiye hanze mu mpera z’umwaka wa 2020.

Shalom iri muri korali zikunzwe mu ruhando rw’abakunzi b’umuziki uhimbaza Imana by’umwihariko mu bakirisotu bo muri ADEPR ndetse igikundiro cyayo cyanageze mu yandi matorero.

Iyi korali imaze imyaka 35 itangijwe yamenyekanye mu ndirimbo zihembura imitima ya benshi zirimo “Nzirata’’, “Abami n’abategetsi’’, “Nzamamaza”, ‘‘Nyabihanga’’ n’izindi.

“Ijambo Rirarema” ni iya mbere yashyizwe hanze mu mushinga wagutse wa Korali Shalom wo gusohora nibura indirimbo imwe buri kwezi, mu kurushaho kwegerana n’abakunda ibihangano byayo.

Perezida wa Korali Shalom, Ndahimana Gaspard, yabwiye IGIHE ko indirimbo nshya irimo ubutumwa bwihariye ku bantu bose.

Yakomeje ati “Ubutumwa twashatse gutanga ni ukubwira abantu ko hari umumaro ukomeye mu ijambo ry’Imana kuko ari ryo rihindura ibintu rigatanga ubuzima.’’

Amashusho y’indirimbo “Ijambo Rirarema” yafatiwe mu Rwanda ndetse amajwi yayo ni ho yafatiwe yoherezwa muri Afurika y’Epfo aho yatunganyijwe na Producer Siyabonga.

Ndahimana yijeje abakunzi ba Korali Shalom ko bahishiwe byinshi mu minsi iri imbere bijyanye n’ibihangano bitandukanye biri gutunganywa.

Yakomeje ati “Tumaze iminsi turi gusenga, turi no mu nganzo twandika indirimbo nshya. Abakunzi bacu bashonje bahishiwe.’’

Korali Shalom yiyemeje gukomeza kwamamaza ubutumwa bwiza no kugarura abantu benshi kuri Yesu.

Korali Shalom igizwe n’abaririmbyi barenga 100 hatabariwemo ababa hanze y’u Rwanda, ni ubuheta mu makorali y’i Nyarugenge nyuma ya Hoziana yayitanze mu ivugabutumwa ry’indirimbo.

Yashinzwe mu 1986 ari korali y’abana bato, yitwaga “Umunezero”. Icyo gihe muri ADEPR Nyarugenge hari korali nkuru imwe ariyo Hoziyana. Mu 1990 yemerewe kwitwa izina, ifata “Shalom” rimaze gushinga imizi. Iyi korali imaze gukora album enye z’amajwi n’ebyiri z’amashusho.

-  Reba indirimbo nshya ya Korali Shalom yise ‘Ijambo Rirarema

Korali Shalom yo muri ADEPR Nyarugenge yasohoye amashusho y’indirimbo "Ijambo rirarema" yatunganyirijwe muri Afurika y’Epfo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .