Korali Yesu Araje yasohoye indirimbo “Amateka atazima” ikebura abahakana bakanapfobya Jenoside

Yanditswe na IGIHE
Kuya 11 Mata 2021 saa 08:29
Yasuwe :
0 0

Korali Yesu Araje ibarizwa kuri LMS Kamukina mu Itorero ry’Abadiventisiti b’Umunsi wa Karindwi yashyize hanze amashusho y’indirimbo “Amateka atazima” mu kwifatanya n’Abanyarwanda kwibuka ku nshuro ya 27 Jenoside yakorewe Abatutsi.

Iyi korali imaze kubigira umuco ko buri mwaka yifatanya n’Abanyarwanda aho isohora igihangano gikubiyemo ubutumwa bujyanye n’igihe cy’icyunamo no kwibuka Jenoside yakorewe Abatutsi.

Umuyobozi wa Korali Yesu Araje, Muhayimana Elisa Claude [Elsa Cruz] yabwiye IGIHE ko indirimbo yabo nshya ikubiyemo ubutumwa bwo kwamagana abahakana n’abapfobya Jenoside yakorewe Abatutsi.

Yagize ati “Ubutumwa nyamukuru buri mu ndirimbo “Amateka atazima” ni ukwamagana no kurwanya ipfobya rya Jenoside yakorewe Abatutsi mu 1994 mu nzira ryacamo iyo ariyo yose.’’

Nyuma yo gushyira hanze indirimbo yo gukomeza no kwifatanya n’Abanyarwanda muri ibi bihe byo kwibuka, Korali Yesu Araje, inakora ibindi bikorwa bitandukanye.

Elsa Cruz yakomeje ati “Dufite umuntu umwe tuzasura yaba incike cyangwa umupfakazi warokotse Jenoside tukamuremera (aho tumuha nk’itungo rigufi, ibyangombwa nkenerwa mu rugo cyangwa kumwubakira). Kuri iyi nshuro Imana nidufasha tuzabikora muri iyi minsi 100 yo kwibuka.’’

Yavuze ko amatsinda yo kuramya no guhimbaza Imana afite uruhare rukomeye mu kumva no kumvisha ukuri Abanyarwanda n’abanyamahanga bapfobya Jenoside.

Ati “Ni ukumenya ko ari amateka igihugu cyaciyemo atazasibangana bakabikora binyuze mu bihangano byabo biba byumvwa n’imbaga nyamwinshi ndetse bakifatanya n’Abanyarwanda bagizweho ingaruka na Jenoside binyuze mu majwi agera kure Imana yabahaye.’’

Yakomeje ahumuriza Abanyarwanda ko ibyabaye bitazongera kuko Imana iri mu ruhande rwabo.

Ati “Ubutumwa nagenera Abanyarwanda muri ibi bihe nibakomere, ibyabaye ntibizongera kuko Imana itubereye maso.’’

Korali Yesu Araje imyaka itanu ikora indirimbo zo kwifatanya n’Abanyarwanda mu bihe byo kwibuka. Mu 2017 yasohoye “Byari bigoye”, “Dufite ibihamya” mu 2018, “Intambwe ifite intego” yo mu 2019 na “Ni amateka’’ yakozwe mu 2020 ariko ikajya hanze muri uyu mwaka.

Iyi korali ifite abanyamuryango benshi babarizwa ku migabane itandukanye y’Isi kandi bari no mu madini n’amatorero atandukanye. Aba barimo abifashishijwe mu ndirimbo “Ni amateka’’ na “Amateka atazima”. Aba banyamuryango biyongeraho abandi badakoresha WhatsApp bose hamwe bahurijwe mu muryango wiswe “YESU ARAJE FAMILY GROUP.”

Korali Yesu Araje ubu igizwe n’abaririmbyi bane babarizwa mu Itorero ry’Abadiventisiti b’Umunsi wa Karindwi rya LMS Kamukina mu Ntara y’Ivugabutumwa ya Kacyiru. Ifite imizingo itandatu y’indirimbo z’amajwi n’itanu ikoze mu buryo bw’amashusho.

Korali Yesu Araje n'abakunzi bayo basohoye indirimbo “Amateka atazima” ikebura abahakana bakanapfobya Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .