Uwera Sarah wo muri Ambassadors Of Christ yinjiye mu muziki nk’umuhanzi wigenga (Video)

Yanditswe na Ishimwe Israel
Kuya 27 Ukwakira 2020 saa 09:00
Yasuwe :
0 0

Uwera Sanyu Sarah uririmba muri Ambassadors of Christ yo mu Itorero ry’Abadiventisiti b’Umunsi wa Karindwi mu Rwanda, yatangiye umuziki nk’umuhanzi ku giti cye, atangirira ku ndirimbo yatuye umwana we w’imfura.

Uyu muririmbyi ni umwe mu bamenyekanye cyane muri iyi korali imaze gushinga imizi mu bihugu byinshi nubwo ikorera mu Rwanda.

Uwera Sarah yakunzwe cyane kubera indirimbo nyinshi za Ambassadors agaragaramo ariwe uziyoboye; ijwi rye ryizihira abaryumva rikaryohera ugutwi.

Nyuma yo kubisabwa n’abakunzi be benshi, Uwera yahisemo kuririmba ku giti cye. Ni umushinga yize neza ashimangira ko utazagongana n’umuhamagaro wo kuririmba muri Ambassadors of Christ.

Urugendo rwo gukora umuziki nk’umuhanzi wigenga, Uwera Sarah yarutangiriye ku ndirimbo yise “Mwana Wanjye”.

Sarah Sanyu mu kiganiro yagiranye na IGIHE yavuze ko kuririmba ku giti cye yabitekereje biturutse ku buryo yaririmbiye umugabo we mu bukwe bwabo benshi bakanyurwa bakamusaba ko yatanga ubutumwa ku giti cye.

Yavuze ko agiye kuririmba ubutumwa bufasha benshi kugandukira Imana ariko azanatanga ubutumwa bwiza bugamije kubaka umuryango Nyarwanda.

Yagize ati “Ntabwo bituma mpinduka, ngo mbe uwo ntari we [...] ngo bitume ngira uburyo mpindukamo. Nzaguma ndi Sarah muzi muri Ambassadors, umwe uzi hano hanze uko umbona. Niko ndi bugume.”

Ku bijyanye no kuba gukora umuziki nk’umuhanzi wigenga byazabangamira uko asanzwe aririmba muri Ambassadors of Christ, yagize ati “Sintekereza ko hazabaho kugongana, kubera ko korali yo ntabwo nayivamo. Ni umuryango nkunda, ngomba kuwubamo kandi nabwo ntibyambuza kuba naririmba ku giti cyanjye mu buryo bwo gutanga ubutumwa, hari ubutumwa nshobora gutanga, inganzo ivuye muri njyewe nkaba nabutanga ku giti cyanjye. Nta makimbirane bizateza”

Sarah Sanyu yavuze ko muri korali batababuza gukoresha impano zabo ngo batange ubutumwa mu buryo bubanyuze. Indirimbo ye ya mbere yayise “Mwana wanjye”. Ni indirimbo yakoreye umwana we w’imfura nyuma y’imyaka ibiri arushinze na Kayumba Aimé [Bakoze ubukwe ku wa 29 Nyakanga 2018] bahuriye ku rusengero akaba ari na we wazamuye icyo gitekerezo.

Ubutumwa buri muriiyi ndirimbo bugusha ku gukangurira ababyeyi bose gufata neza no kwita ku bana kuko ari abatware kandi aribo bahanzwe amaso mu mpinduka zikenewe ku Isi no kuyubaka neza.

Sarah Sanyu azwi cyane muri Ambassadors of Christ kubera ijwi rye ryuje ubuhanga kandi rikundwa n’abatari bake bafashwa n’indirimbo z’iyi korali, aririmbana na musaza we Nelson Manzi.

Sarah Sanyu yamenyekanye cyane atera mu ndirimbo zirimo “Birakwiye gushima”, “Yesu we” n’izindi; yatangiye kuririmba muri Ambassadors of Christ mu mpera za 2006 akiga mu mashuri yisumbuye.

-  Reba ikiganiro kirambuye Sarah Sanyu yagiranye na IGIHE

-  Indirimbo ya mbere ya Sarah Sanyu yayise “Mwana Wanjye”

Uwera Sarah wo muri Ambassadors Of Christ yinjiye mu muziki nk’umuhanzi wigenga
Uwera Sanyu Sarah asanzwe azwi nk'umwe mu baririmbyi bafite ijwi ryiza riryohera abaryumva
Uwera Sanyu Sarah afashwa n'umugabo we Kayumba Aimé nk'umujyanama mu muziki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .