Uko kwinangira kwa Habyarimana kongeye kwenyegeza umuriro w’urugamba rwo kubohora igihugu

Yanditswe na IGIHE

Kwinangira no gukomeza gutinza ishyirwa mu bikorwa ry’amasezerano ya Arusha k’uwahoze ari Perezida w’u Rwanda, Juvénal Habyarimana, biri mu byatumye ingabo zari iza RPA zisubukura urugamba rwo kubohoza igihugu zari zarahisemo guhagarika zitegereje inzira y’amahoro.

Umuyobozi Mukuru w’Urwego rw’Igihugu Ngishwanama rw’Inararibonye, Tito Rutaremara, akaba n’umwe mu b’imena batangije Umuryango FPR Inkotanyi ahagana mu 1987, mu kiganiro yagiranye na Televiziyo y’u Rwanda yavuze ko urugamba rwo kwibohora rwatijwe umurindi no kwinangira kwa Habyarimana.

Avuga ko iyo Habyarimana aza kubahiriza ibyari bikubiye mu masezerano nta ntambara yo kubohoza igihugu yari gukomeza mu Rwanda.

Yagize ati “Oya yajyaga gukomereza iki se? Iyo bemera tukagabana ubutegetsi nta ntambara yajyaga kuba ariko ntabwo bari kubyemera kuko batangiye babyaga.”

Amasezerano ya Arusha Habyarimana yakomeje kwinangira yavugaga iki?

Nyuma y’imyaka ibiri, ingabo zari iza RPA zitangije Urugamba rwo kubohora igihugu, Muri Kamena 1992, nibwo Leta ya Habyarimana yatangiye ibiganiro n’Intumwa za FPR bigamije gusinya amasezerano y’amahoro ya Arusha, ndetse byakurikiranwaga n’imiryango Mpuzamahanga n’ibihugu by’u Bufaransa, Amerika n’u Bubiligi.

Uyu mushinga w’amasezerano wari urimo ingingo zitandukanye zigamije gusaranganya ubutegetsi.

Ingingo ya gatatu y’aya masezerano yavugaga ko impande zombi zemeranyije ko Itegeko Nshinga ry’u Rwanda ryo mu 1991 hamwe n’aya masezerano aribyo bigize itegeko rikuru rigenga igihugu mu gihe cy’inzibacyuho kizamara amezi 22, nyuma hakaba amatora rusange.

Ingingo ya gatandatu yarebaga igabana ry’ubutegetsi, yemeje ko Faustin Twagiramungu aba Minisitiri w’Intebe mu nzibacyuho.

Aya masezerano kandi yavugaga ko muri minisiteri 21 zigize guverinoma, ishyaka ryari ku butegetsi MRND rihabwa minisiteri eshanu, FPR igahabwa eshanu, ishyaka ritavuga rumwe na Leta rikomeye MDR rigahabwa enye na minisiteri y’intebe, andi mashyaka agabanywa minisiteri zisigaye.

Ingingo ya gatanu yavugaga ko impande zombi ziyemeje gukora ibishoboka byose aya masezerano agashyirwa mu bikorwa, kandi zigaharanira ubumwe n’ubwiyunge bw’Abanyarwanda.

Tariki ya 4 Kanama 1993 aya masezerano yashyizweho umukono n’impande zombi, bikorerwa imbere ya Ali Hassan Mwinyi wari Perezida Tanzania akaba n’umuhuza muri ibi biganiro, Perezida Yoweri Museveni wa Uganda na Melchior Ndadaye w’u Burundi bari indorerezi, Faustin Birindwa wari Minisitiri w’Intebe wa Zaïre wari uhagarariye umuhuza Perezida Mobutu Sese Seko.

Abandi bari mu muhango w’isinywa ry’aya masezerano harimo Dr Salim Ahmed Salim, wari Umunyamabanga Mukuru wa OUA (ubu ni African Union) ndetse n’abari bahagarariye ONU aribo u Budage, u Bubiligi, u Bufaransa, Amerika, Nigeria na Zimbabwe.

Aya masezerano yagombaga gushyirwa mu bikorwa bitarenze iminsi 37 nk’uko ingingo ya karindwi yayo yabiteganyaga.

RPF yategereje ishyirwa mu bikorwa ryayo iraheba

Mu rwego rwo gushyira mu bikorwa ibyavugwaga n’aya masezerano ku wa 29 Ukuboza 1993 Batayo y’abasirikare 600 ba FPR yasesekaye i Kigali ije kurinda abanyapoliki bayo nk’uko byateganywa n’ayo masezerano.

Tito Rutaremara avuga ko baje biteguye kubahiriza ibyateganywaga n’amasezerano ariko barategereza baraheba.

Ati “Mu kwa 12 taliki ya 28 nibwo twageze muri CND [inyubako y’Inteko Ishinga Amategeko iri ku Kimihurura], tuza rero tuzi ko nibucya iyubahirizwa ry’ayo masezerano [procedures] zitangira, tuhageze rero birabura umunsi wa mbere bityo birakomeza birabura noneho dutangira kuganira n’amashyaka na za ambasade birongera bitangira kuzenguruka tuganira, tubaza tuti byagenze gute kuki bidakora?”

Habyarimana yatangiye kuvuga ko kugira ngo abayobozi b’inzibacyuho barahizwe ko n’ishyaka rya CDR naryo naryo rigomba gushyirwa muri guverinoma.

Tito akomeza avuga ko RPF yarwanyije iki cyemezo cyo gushyira CDR muri Guverinoma kuko “Icya mbere CDR ntitwayemera kuko amasezerano ya Arusha ntabwo yayashatse ntiyigeze iyasinya, icya kabiri irimo irigisha amacakubiri, icya gatatu irica abantu, tuti ntabwo twabyemera.”

Uku kudashyira mu bikorwa ibyavugwaga n’aya masezerano gusa n’ukutaratunguranye kuko na mbere hose Habyarimana yari yaragiye agaragaza amananiza mu biganiro arimo no kwanga guhurira mu cyumba kimwe na FPR, ibintu byatumaga bashyirwa ahantu hatandukanye, abahuza bakanyura muri buri cyumba bumva ibitekerezo bitangwa na buri ruhande.

Uretse ibi ikindi kigaragaza ko Habyarimana atari yishimiye aya masezerano ni uko mu 1992, yari yaratangaje ko amasezerano ari gutegurwa i Arusha "ari impapuro gusa" nk’uko bivugwa na André Guichaoua umuhanga muri ’sociologie’ wakurikiraga iby’Akarere k’Ibiyaga Bigari.

Kubera uku kugenda biguru ntege ku ishyirwa mu bikorwa ry’amasezerano ku wa 6 Mata 1994 habaye inama ijyanye n’ishyirwa mu bikorwa ryayo ibera Tanzania, Dar es Salam, yitabirwa n’abakuru b’ibihugu bihana imbibi n’u Rwanda wongeyeho uwa Kenya. Perezida Mobutu wa Zaïre we ntiyayibonetsemo.

Kubera kotswa igitutu Habyarimana yavuze ko imbogamizi zose zavuyeho zatumaga amasezerano y’amahoro ya Arusha adashyirwa mu bikorwa, ko ibiyakubiyemo bizatangira gushyirwa mu bikorwa akimara kugera i Kigali.

Mu ijoro ryo ku wa 6 Mata 1994 Ubwo Habyarimana yari mu nzira ava Tanzania indege yari arimo yarahanuwe, icyizere ku masezerano ya Arusha yari amaze amezi 10 asinywe kiyoyoka gutyo.

Nyuma y’ihanurwa ry’iyi ndege umugambi wo gutsemba Abatutsi watangiye gushyirwa mu bikorwa, maze ingabo za RPA nazo zisubukura urugamba rwo kubohora igihugu ari nako zihagarika Jenoside yakorerwaga Abatutsi.

Mu gihe u Rwanda rwitegura kwizihiza umunsi wo kwibohora ku nshuro ya 26, Tito Rutaremara yemeza ko urugendo rukiri rurerure, aho Abanyarwanda bafite umukoro wo kwibohora ibindi bibazo birimo ubukene no kumva ko batanganya ubushobozi kimwe n’abanyamahanga.

Kwinangira kwa Juvénal Habyarimana kongeye kwenyegeza umuriro w’urugamba rwo kubohora igihugu

IZINDI NKURU

Ishimwe rya Nduwayesu warokowe n’Inkotanyi muri gereza ya Ruhengeri, habura amasaha make ngo yicwe

+Soma Inkuru

U Rwanda nyuma yo Kwibohora, impanuro ku rubyiruko n’abashaka gukirira muri Leta -Ikiganiro na Protais Musoni

+Soma Inkuru

Tumaze kongera kubaka igihugu cyacu twese kitari icya bamwe- Perezida Kagame

+Soma Inkuru

IBITEKEREZO

  • Harihoo

    3-07-2020 à 17:25

    Ahubwo leta niyo iha abanyamahanga umwanya w imbere have rwose wibeshyera abanyarwanda kuko abafata ibyemezo nibo babyica baha akazi abanyamahanga nyamara abanyarwanda bagashoboye ubwo rero urumvako bipfira mu butegetsi si mu baturage, murebe abo muzana kubaka mujya kwemerera abashinwa gute hari abanyarwanda? Nonese umuturage niwe uha visa abo bashinwa n abahinde? Abategetsi ba Afrika basuzugura abaturage babo kuko nyine abo bategetsi baba bisuzugura bityo bakumvako bagakingurira imiryango abanyamahanga kandi abanyagihugu batabuze.

  • Kalibuni

    4-07-2020 à 00:17

    Kuyobora igihugu nibintu bikomeye.Uwagezeyo wese akora ibyiza agakora namakosa. Bose tuzajya tubavuga baramaze kuvaho kuko umuvuze akiriho ashobora kukunyuruza ugahita impitagihe.Mwene Ntibazilikana yakoze ibye.Rudahigwa yakoze ibye,Kigeri Ndahindurwa akora ibya Kayibanda yakoze ibye.Abandi nabo bazavugwa kubyabo bakoze.Umunyarwanda niwe uzahora ari umucamanza wa nyuma.

Andika igitekerezo