U Bwongereza bwasabye EU kongererwa igihe mbere ya Brexit

Yanditswe na IGIHE
Kuya 20 Ukwakira 2019 saa 09:26
Yasuwe :
0 0

Minisitiri w’Intebe w’u Bwongereza Boris Johnson, yandikiye Umuryango w’Ubumwe bw’u Burayi, EU, asaba ko igihugu cye cyongererwa igihe cyo kuva muri uyu muryango, mu gihe byari biteganyije ko itariki ntarengwa ari iya 31 Ukwakira uyu mwaka.

Icyatunguranye ni uburyo Minisitiri w’Intebe Johnson yanze gushyira umukono we kuri iyo baruwa, ahubwo iherekezwa n’ibaruwa ya kabiri noneho yasinyeho, bwo avuga ko ku ruhande rwe bwite, kongera igihe byaba ari ikosa, nk’uko BBC yabitangaje.

Gusaba iki gihe Minisitiri w’Intebe Johnson yabikoreshejwe n’itegeko abadepite batoye muri Nzeri, ko agomba gusaba EU ko u Bwongereza bwagutse bwongererwa igihe cyo kwitegura kuva muri EU, igihe cyose itariki ya 19 Ukwakira yagera hataremezwa bizadusubirwaho amasezerano y’imikoranire yabwo na EU, cyangwa ngo habe hafashwe umwanzuro ko nta masezerano azabaho.

Iyo baruwa hari aho igira iti “U Bwongereza bwagutse bwifuza ko icyo gihe cyarangira ku wa 21 Mutarama 2020 saa tanu z’ijoro GMT. Mu gihe impande bireba zaba zimaze kwemeranya ku masezerano mbere y’iyo tariki, Guverinoma yifuza ko icyo gihe cyarangizwa mbere y’iyo tariki.”

Perezida wa Komisiyo ya EU, Donald Tusk yanditse kuri Twitter ko yakiriye ibaruwa y’ubwo busabe. Yavuze ko agiye kuvugisha abayobozi b’ibihugu bya EU, ku gisubizo gikwiye.

Ibaruwa ya Johnson ivuga ko Guverinoma y’icyo gihugu igiye guhita ikurikirana ko ibigize amasezerano u Bwongereza buheruka kwemeranyaho na EU, byahita bihindurwa umushinga w’itegeko rikanatorwa, kandi ko bigomba gukorwa mbere y’itariki 31 Ukwakira, u Bwongereza bukava muri EU nyuma y’ubusabe abaturage banyujije muri Kamarampaka mu 2016.

Johnson yaherukaga kuvuga ko azakora uko ashoboye kose u Bwongereza bukava muri EU bidasabye kongera kongererwa igihe, ku buryo ku bwe, yari yiteguye ko bwava muri uyu muryango nta n’amasezerano y’imikoranire yemejwe. Ni ibintu abadepite bakomeje kurwanya.

Bimwe mu by’ibanze Johnson yemeranyijeho na EU mu masezerano yo gutandukana kw’impande zombi, bijya gusa n’ibyo Theresa May yasimbuye yagezeho mu mwaka ushize, uretse impinduka zigaragara ku ikoreshwa ry’umupaka wa Ireland ya Ruguru.

Biteganywa ko u Bwongereza buzakomeza kugendera ku mategeko ya EU kugeza mu mpera za 2020 ndetse bishobora no kurengaho, kugira ngo ibikorwa by’ubucuruzi bihabwe umwanya uhagije wo kwitegura.

U Bwongereza kandi buzishyura nibura miliyari £33 yo gutandukana na EU, ndetse uburenganzira bw’abaturage ba EU baba mu Bwongereza cyangwa ubw’Abongereza bari muri EU, buzakomeza kubahirizwa.

Bimwe mu byahindutse ni ikoreshwa ry’umupaka Ireland ya Ruguru (iri mu Bwongereza bwagutse) ihuriraho na Repubulika ya Ireland (iri muri EU). Biteganywa ko nyuma ya Brexit, ari wo mupaka rukumbi uzaba uhuza u Bwongereza bwagutse na EU ukoresheje inzira y’ubutaka.

Uwo mupaka uzakomeza kugendera ku mategeko agenga isoko rusange rya EU; mu gihe Ireland ya Ruguru izakomeza kugendera ku mategeko y’u Bwongereza bwagutse agenga za gasutamo, ikazagenda ininjizwa mu masezerano yose y’ubucuruzi u Bwongereza buzasinya nyuma ya Brexit.

Biteganywa kandi ko komisiyo ihuriweho izemeza ibicuruzwa byemerewe kujya ku isoko rusange, u Bwongereza bukazajya bwakira imisoro yabyo mu izina rya EU.

Boris Johnson yasabye EU ko u Bwongereza bwongererwa igihe cyo kuva muri uyu muryango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza