Amatora y’abakuru b’ibihugu yitezwe mu bihugu bya Afurika muri 2020

Yanditswe na Joy Monique Dukuze Umutesi
Kuya 2 Mutarama 2020 saa 05:13
Yasuwe :
0 0

Politiki ni kimwe mu bivugwaho cyane ku isi, guhera umwaka utangiye kugeza urangiye. Abakuru b’ibihugu ni bamwe mu bagena imirongo migari yayo ku buryo uwo mwanya uba urebwa n’abatari bake, hagakoreshwa inzira zose zaba imbi n’inziza ngo bicare kuri iyo ntebe icurirwamo ibitekerezo biyobora ibihugu bitandukanye.

Uyu mwaka muri Afurika hateganyijwe amatora mu bihugu bitandukanye, azasiga bamwe mbahagurutse muri izo ntebe nkuru mu bihugu byabo, bagaha umwanya abandi bafite ibyerecyezo bishya bijyanye n’ibyo abaturage bifuza.

Muri rusange, ibihugu 22 bya Afurika nibyo bifite amatora muri uyu mwaka ariko icyenda muri byo nibyo bizabamo amatora y’abakuru b’ibihugu.

IGIHE yakusanyije iby’ingenzi ukwiriye kumenya kuri ayo matora ategerejwe na benshi.

Togo

Mu iki gihugu hateganyijwe amatora y’Umukuru w’igihugu, tariki 22 Gashyantare. Mu kwezi kwa cumi, ishyaka ritavuga rumwe n’ubutegetsi ryavuze ko Jean Piere Fabre ari we mukandida waryo uzaba ahanganye na Perezida uriho Faure Gnassingbé. Nta gutungurana kwitezwe kuko amahirwe agihabwa Faure umaze ku butegetsi imyaka 15.

Burundi

Amatora ateganyijwe muri iki gihugu ni ay’Umukuru w’igihugu, Inteko rusange n’ay’Abadepite. Aya matora ateganyijwe tariki 20 Gicurasi uyu mwaka. Perezida Nkurunziza Pierre yatangaje ko ataziyamamariza indi manda. Aya matora yitezwe kuzandika amateka muri iki gihugu nyuma y’imvururu zadutse guhera mu 2015 ubwo Nkurunziza yiyamarizaga manda ya gatatu itaravuzweho rumwe.

Tanzania

Andi matora ateganyijwe tariki 4 Ukwakira 2020, ni ay’Umukuru w’igihugu. Perezia John Pombe Magufuli wayoboye Tanzania kuva mu mwaka 2015 yitezwe kuyobora indi manda. Nubwo anengwa ibirimo kubangamira ubwisanzure, ashimwa n’abaturage kuba yarabashije guhashya ruswa no kwirukana abayobozi badakora inshingano zabo.

Côte d’Ivoire

Amatora y’Umukuru w’igihugu ataganyijwe tariki 31 Ukwakira uyu mwaka. Perezida w’iki gihugu, Alassane Ouattara, wari waratangaje ko atazongera kwiyamamariza indi manda hejuru y’ebyiri amaze kuyobora, yavuze ko azagaragara muri ayo matora.

Burkina Faso
Hateganyijwe amatora y’Umukuru w’igihugu n’Inteko Ishinga Amategeko mu Ugushyingo 2020. Uwahoze ari Minisitiri w’intebe muri iki gihugu, Kadré Désiré Ouédraogo yamaze gutangaza ko aziyamamariza umwanya w’Umukuru w’igihugu akazaba ahanganye na Perezida uriho Roch Marc Christian Kaboré.

Ghana
Amatora ateganyijwe muri iki gihugu y’Umukuru w’igihugu azaba tariki 7 Ukuboza 2020.Ishyaka ritavuga rumwe n’Ubutegetsi, National Democratic Congress ryamaze gutangaza ko uwahoze ari Umukuru w’iki gihugu, John Mahama ari we uzaba arihagarariye ahanganye na Perezida uriho, Nana Akufo-Addo.

Niger

Muri iki gihugu hateganyijwe amatora y’Umukuru w’igihugu n’Inteko Ishinga Amategeko tariki 27 Ukuboza ndetse n’amatora y’abandi bayobozi batandukanye ateganyijwe mu Ukwakira.

Centrafrique

Amatora y’Umukuru w’igihugu ateganyijwe tariki 27 Ukuboza. Umuvugizi w’ishyaka "Kwa Na Kwa" ry’uwahoze ari Perezida w’iki gihugu Francois Bozizé, yatangaje ko aziyamamariza kuyobora iki gihugu.

Seychelles

Hateganyijwe amatora y’Umukuru w’igihu mu Ukuboza. Ishyaka ritavuga rumwe n’ubutegetsi, Seychelles National Party ryamaze gutanga Ramkalawan nk’umukandida ku mwanya wa Perezida aho azaba ahanganye na Perezida Danny Faure aziyamamariza indi manda.

Amatora yo mu Burundi ni amwe muyo benshi bahanze amaso nyuma y'uko Perezida Nkurunziza atangarije ko atazongera kwiyamamaza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .