00:00:00 IGIHE NETWORK KN KINYARWANDA EN ENGLISH FR FRANCAIS

Imvano y’idindira ry’Umudugudu Abanye-Goma bemerewe na Perezida Kagame

Yanditswe na IGIHE
Kuya 2 July 2022 saa 02:46
Yasuwe :

Abanye-Congo ntibumva kimwe umushinga w’Umudugudu bemerewe na Perezida Kagame ugenewe abaturage bagizweho ingaruka n’iruka ry’Ikirunga cya Nyiragongo mu mwaka ushize.

Uyu mudugudu Perezida Kagame yawemereye mugenzi we wa RDC muri Kamena 2021 ubwo yakoreraga uruzinduko i Goma, akareba uburyo iruka ry’Ikirunga ryasize abantu iheruheru.

Icyo gihe u Rwanda na RDC byari bibanye neza ku buryo byafatanaga nk’ibihugu by’ibivandimwe, bitabarana umunsi ku wundi, ijoro n’amanywa.

Perezida Kagame ubwo yari i Goma, Tshisekedi yashimiye "umuvandimwe" we [Kagame] ku bwo kumufata mu mugongo, mu gihe iruka ry’ikirunga cya Nyiragongo ryatwaraga ubuzima bw’abantu, rigasenya n’ibikorwaremezo.

Ati "Ndabanza gushimira umuvandimwe wanjye Perezida Paul Kagame ku bwo kudufata mu mugongo nyuma y’ibyabaye muri iki cyumweru."

"Ubwo Umujyi wa Goma wibasirwaga n’iruka ry’ikirunga, uwo munsi nahise muhamagara musaba kuduha ubufasha kuko abaturage bacu bashakaga ubuhungiro mu Rwanda, i Rubavu, natunguwe no kumva ambwira ko ahubwo amabwiriza yatanzwe mbere y’uko mbisaba."

Umukuru w’Igihugu mu gufata mu mugongo Abanye-Congo basizwe iheruheru n’umutingito, yabemereye umudugudu w’icyitegererezo urimo n’ibindi bikorwa remezo.

Nyuma y’iminsi mike avuye i Goma, bivugwa ko hari Intumwa za Repubulika Iharanira Demokarasi ya Congo zakoreye uruzinduko mu Rwanda, zisura Umudugudu wa Kinigi mu Karere ka Musanze ziri kureba uko umeze.

Byavugwaga ko uwo mudugudu uzubakwa mu kibaya kiri munsi ya Nyiragongo kigabanya u Rwanda na Congo ugatahwa uyu mwaka mu gihe u Rwanda ruzaba rwibohora.

Byari byitezwe ko nk’amatafari azubakishwa n’ibindi bikoresho bizava mu Rwanda. Amafaranga yose muri uwo mushinga yagombaga gutangwa n’u Rwanda, mu gihe hari n’amakuru yavugaga ko Inkeragutabara ari zo zizakurikirana imirimo yose yo kubaka uwo mudugudu nk’uko zibigenza ku yindi yo mu gihugu imbere.

Amakuru yizewe agera kuri IGIHE avuga ko kugeza ubu, hataremezwa aho uwo mudugudu uzubakwa. Byiyongeraho ko hari abanyapolitiki bo muri RDC batawiyumvagamo na mbere, bihutiye kujya mu matwi y’abaturage nabo batangira kuwamagana. Kugeza ubu nta kintu kirakorwa kuri uwo mushinga.

Hari abasesenguzi bavuga ko bisa n’aho uyu mushinga utazashyirwa mu bikorwa kuko nta bushake RDC ibifitemo “kandi ko u Rwanda rutakwihoma ku muntu utarushaka’.

Hari abavuga ko ari umudugudu utagamije ubutabazi ahubwo ko ari umugambi mugari u Rwanda rushaka wo kwigarurira ubutaka bwa RDC.

Mu mpera za Mutarama uyu mwaka, IGIHE yageze aho byavugwaga ko uzubakwa muri Teritwari ya Nyiragongo. Ni muri metero nke uvuye ku Mupaka w’u Rwanda ahahana imbibi n’Umurenge wa Busasamana muri Rubavu.

Muri icyo kibaya, hari inkambi irimo abasizwe iheruheru na Nyiragongo. Bashingiwe amahema mu gihe bagitegereje ko umudugudu wubakwa.

Hari abaturage ba RDC babwiye IGIHE ko banyotewe no kwakira umudugudu bemerewe na Perezida Kagame.

Umwe witwa James yagize ati “Ahantu tuba turi munsi y’ikirunga, turamutse tugiye hariya byadufasha. Aho dutuye ni amabuye cyane, wenda hariya handi umuntu yabona akarima ko guhingamo n’utuboga.”

Uyu mugabo avuga ko bahorana ubwoba ko isaha n’isaha Nyiragongo yaruka, dore ko ari kimwe mu birunga bike ku Isi bigifite ubuzima, bishobora kuruka igihe cyose.

Ati “Hariya bagiye kubaka umudugudu ni hafi y’u Rwanda, n’iyo cyajya kiruka umuntu yakwirukanka kikahagera yageze mu Rwanda.”

Yongeyeho ati “Umudugudu uramutse wuzuye twabyishimira cyane. Bari bavuze ko bagomba kuhashyira n’isoko kandi ntabwo ahantu hangana kuriya habura isoko. Isoko ni ngombwa n’amashuri abana bakiga.”

Ubwo Ikirunga cya Nyiragongo giheruka kuruka, byinshi mu bikorwaremezo mu Mujyi wa Goma byarangiritse umujyi wose uhinduka ikizima. U Rwanda rwatabaye umuturanyi mu buryo bwihuse maze Umujyi wa Goma wongera gucana ukoresheje amashanyarazi aturutse mu Rwanda.

U Rwanda nk’igihugu gihora cyifuza kubana n’ibindi neza kandi mu buryo burambye, cyahise gitangira kubaka umuyoboro mushya uzajya wifashishwa hagati y’Umujyi wa Gisenyi n’uwa Goma ku buryo igihe cyose bazajya bakenera amashanyarazi u Rwanda ruzajya ruyoherezayo. Kuva muri Nzeri u Rwanda rwohereza amashanyarazi muri Goma kandi abaturaga bishimira ko adacikagurika.

Muri Nzeri 2021, umwe mu bayobozi ba Serena Hotel y’i Goma utifuje ko amazina ye atangazwa, yabwiye IGIHE ko igihe bahabwaga amashanyarazi na REG babonye adacikagurika nk’uko ayo babonaga ameze.

Ati “Nkatwe nk’abantu bafite hotel tuba twifuza amashanyarazi adacika cyane kuko ubusanzwe aya hano aracikagurika bikadutwara amafaranga menshi ya mazutu dushyira muri “Générateur”, ariko ayo duhabwa ya REG nta kibazo cyabayeho ndetse byaradushimishije cyane, ubwo tugiye kujya tuyabona kenshi ni amahirwe tugize nk’abashoramari.”

U Rwanda rwubatse umuyoboro ufite ibilometero bisaga 11,3 bivana amashanyarazi kuri sitasiyo y’amashanyarazi ya Rubavu, bikanyura muri Mbugangari bigakomeza ku mupaka wa “Petite Barrière” kugera mu Mujyi wa Goma.

Umwuka mubi hagati y’u Rwanda na RDC ndetse n’urwango Abanye-Congo bafitiye u Rwanda, byangije gahunda nyinshi z’iterambere zari zigamije kuzahura ubuzima bw’abaturage ahubwo himikwa urwango rwo gushaka kugirira nabi Abanyarwanda.

Abasizwe iheruheru na Nyiragongo bavuga ko ikibazo gikomeye bafite ari icy'amazi
Ahazubakwa umudugudu hasanzwe inkambi y'abasizwe iheruheru n'iruka rya Nyiragongo
Ubwo Perezida Kagame yageraga i Goma yerekwa ibyangijwe n'Ikirunga cya Nyiragongo
Umudugudu Perezida Kagame yemereye Abanye-Congo uzaba wubatse nk'uyu wo mu Kinigi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .