Simva mu muryango ukomeye, aho ndi ni igihugu cyiza- Ikiganiro na Kamanzi uhagarariye urubyiruko mu Nteko (Video)

Yanditswe na Habimana James
Kuya 21 Gashyantare 2020 saa 09:33
Yasuwe :
0 0

Kamanzi Ernest na Maniriho Clarisse ni bo badepite bahagariye urubyiruko mu Nteko Ishinga Amategeko y’u Rwanda kuva mu 2018.

Mu matora yabaye muri uwo mwaka, abakandida 26 nibo bashakwagamo babiri bagombaga guhagararira urubyiruko muri manda y’imyaka itanu izageza mu 2023.

Kamanzi Ernest yabonye amajwi 66.8%, Maniriho Clarisse abona amajwi 52.9%.

Kamanzi w’imyaka 30, avuka mu karere ka Kamonyi mu Majyepfo y’u Rwanda, ni umusore.

Uyu umusore iyo muganiriye bigaragara ko aba acishije make, akavuga ko umwanya ariho uyu munsi nubwo ari umwanya ukomeye, we awufata nk’ikirango cy’imiyoborere myiza igihugu giha abakiri bato.

Avuga ko nubwo abenshi bashobora kwibwira ko yaba akomoka mu muryango ukomeye, bikaba aribyo byamugize uwo ariwe uyu munsi, ibi ngo sibyo kuko ava mu muryango utifashije cyane.

Mu kiganiro yahaye IGIHE, Depite Kamanzi yavuze byinshi ku buzima bwe, uko agira uruhare mu kubaka igihugu n’uburyo abona ikibazo cy’ubushomeri mu rubyiruko.

Ikiganiro na Depite Kamanzi Ernest

IGIHE: Ukiri muto inzozi zawe wumvaga wifuza kuzakora iki?

Kamanzi: Burya umwana wese agira inzozi, hari uvuga ati nzaba muganga, umusirakari n’ibindi, ariko uko ugenda ukura inzozi wari ufite zigenda zihinduka, njye rero nkiri muto numvaga nzaba umusirikari, ibi nabiterwaga n’amateka y’igihugu kuko nagiye mbona ko muri uru rugendo tumazemo imyaka 25, urubyiruko rwagize uruhare rukomeye ngo igihugu cyacu kibe kiri aho kiri uyu munsi, njye nabonye ko abasirikari aribo babigizemo uruhare mu kukibohora kugeza aho turi uyu munsi.

Nubwo ibi byose nabyumvaga nkiri muto ariko byatumaga numva nzaba umusirikari, ariko uko ugenda ukura bitewe n’amahirwe igihugu gitanga numvise hari n’ubundi buryo nagikoreramo, ni uko naje kwisanga muri politike.

IGIHE: Kuba depite abantu bashobora kwibwira ko biterwa n’umuryango ukomeye uvukamo, niko bimeze?

Kamanzi: Amateka ya mbere ya Jenoside yakorewe Abatutsi, abakiri bato ntabwo bahabwaga amahirwe ngo batange umusanzu ariko ubu byarahindutse, uyu munsi bareba ubushobozi umuntu afite bitari aho uturuka. Nanjye rero nkomoka mu muryango utifashije cyane.

IGIHE: Ni gute watekereje kwiyamamariza kuba umudepite?

Kamanzi: Kuri njye nakuze numva hari icyo ngomba igihugu cyanjye, burya uko ugenda ugira inshingano kandi ukazikora neza uba wumva ugomba gutera intambwe, igihe cyo gutanga kandidatire cyarageze numva nanjye ndi umwe mu bagomba kuzitanga ndetse ndayitanga, ariko ntibihagije kuko uba guhangana n’abandi ukagaragaza ibyo uzamarira abaturage, mu guhitamo rero nsanga bampisemo.

IGIHE: Umaze gutorwa aho uvuka babyakiriye gute?

Kamanzi: Birumvikana buri muntu wese aho akomoka iyo umwana wabo yateye intambwe barishima, navuga ko banejejwe n’uko umwana wabo yateye intambwe ariko ntibyabatunguye cyane kuko muri kwa kundi umuntu ashaka icyo amarira igihugu cye, akenshi abantu baba bakubona mu bikorwa bitandukanye, ntabwo batunguwe cyane ahubwo banejejwe n’ibyo nagezeho.

IGIHE: Wumvaga ari iki wagombaga gukorera urubyiruko ugeze mu Nteko?

Kamanzi: Iyo ugiye kwiyamamaza kujya mu Nteko uba ugomba kubanza kumenya inshingano zayo, harimo gutora amategeko, kugenzura ibikorwa bya guverinoma no guhagararira abaturage.

Iyo ugiyemo nk’uhagarariye urubyiruko mbere y’uko ugeramo uba wumva uzavuganira urubyiruko, ukareba niba amategeko atorwa ababereye, ukareba niba uko gahunda zigenerwa urubyiruko koko zibateza imbere, ibyo nibyo twumvaga tuzakorera urubyiruko. Iyo tugiye mu Nteko tureba niba gahunda igihugu cyihaye ariyo irimo gushyirwa mu bikorwa, ariko iyo ugezemo usanga n’abandi mukorana mufite izo nshingano mukagendera muri wa murongo.

IGIHE: Ese koko abadepite bakorera abaturage uko bikwiye?

Kamanzi: Inteko Ishinga Amategeko ntidukwiye kuyireba nk’urwego ruri ku ruhande rudashinzwe gufasha abaturage, iyo turi hariya Inteko icyo ikora ni ukureba niba icyerekezo guverinoma yihaye aricyo gishyirwa mu bikorwa, dufashe nk’urugero nk’abaturage bagombaga kuva mu manegeka, iriya ntabwo yari gahunda yo kubangamira abaturage ahubwo ni ukugira ngo bibarengere.

Iyo umuturage ari hariya aba yabura ubuzima , icyo gihe Inteko tuba tugomba kureba uko bava mu manegeka. Mwarabibonye ko nyuma yo kuhabakura imvura yaraguye itwara amazu yabo, twe nk’abadepite iyo tubonye ko ibyo leta ikora biri mu nyungu z’umuturage, duhama muri uwo murongo.

IGIHE: Mugeze mu Nteko nta gihe mwigeze kugira ubwoba bwo kuvuga?

Kamanzi: Burya tugira umugisha kuko tugira ubuyobozi butanga umwanya ku bakiri bato nabo bakagaragaza icyo bashoboye. Mbere twumvaga kuzakorana nabo bizagorana ariko twaje kwishimira gukorana n’abantu bafite uburambe. Ibyo ariko biba bisaba ko ukora ubushakashatsi kugira ngo ibitekerezo utanga koko bitaba bihabanye n’ibyabo.

IGIHE: Ikibazo cy’ubushomeri ukibona gute mu rubyiruko?

Kamanzi: Kuba tuvuga ubushomeri uyu munsi ni uko mbere ya Jenoside bitavugawga, uyu munsi turabivuga kuko igihugu cyatanze amahirwe, ayo mahirwe ni uko iyo tuvuze uburezi kuri wese, umuntu wese ugejeje imyaka yo kwiga yiga, iyo yize biba bivuze ko dufite abantu benshi bize ariko bitari ugusaba akazi leta ahubwo kugahanga.

Iki ntabwo rero ari ikibazo gikomeye, icyo twita ikibazo dukwiye kukibyazamo amahirwe, ayo mahirwe ya mbere ni uko igihugu cyakwigishije mbere ntibyari biriho.

Ikindi abantu bakwishimira ni uko urubyiruko tubona uyu munsi ruratanga icyizere. Nk’ubu tugiye mu ikoranabuhanga imishinga myinshi irimo guhangwa ni urubyuko rurimo, muri Made in Rwanda abakiri bato nibo barimo kugaragaramo, abantu barangije Kaminuza barimo kubyaza ubuhinzi amafaranga menshi.

Depite Kamanzi avuga ko icyo abakiri bato bakwiye kureba ari ayo mahirwe igihugu cyabahaye bakayabyaza umusaruro, kuko guverinoma ngo yiteguye kubafasha.

Depite Kamanzi yavuze ko aho amaze kugera ari ukubera igihugu cyiza gitanga amahirwe kuri bose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .