Ku bibazo by’agahinda n’umuhangayiko: Hari serivisi y’abikorera yabiboneye igisubizo

Mu gihe abenshi bari bamenyereye ko serivisi zijyanye n’iby’ubuzima bw’imitekerereze zitangwa n’inzego za Leta gusa, hatangiye gushyirwaho n’uburyo bwo kuzigeza ku bazikeneye binyuze muri serivisi z’abikorera. Ni muri urwo rwego Life in fullness Ltd ari kimwe mu bigo by’abikorera bifite inzobere mu gutanga izo serivisi (professional counselors). Biyemeje gutanga umusanzu wabo mu guhangana n’ibibazo byibasira imitekerereze y’umuntu ndetse n’ingaruka za byo mu mibereho ya buri munsi y’abaturarwanda kuko ari ibibazo bikomeje kuzahaza benshi.

Ikibazo cy’ibikomere byo ku mutima, ihungabana n’agahinda ni bimwe mu bibazo biremereye imitima y’abatuye isi ya none. Umuryango mpuzamahanga wita ku buzima (OMS) ugaragaza ko abarenze miliyoni 264 ku isi n’abagera kuri miliyoni 20 muri Afurika bafite ikibazo cy’indwara y’agahinda (depression), ari na yo ikomokaho ikibazo cyo kwiyahura kigenda gifata intera ndende hirya no hino ku isi.

Abatiyahura ngo baveho, biyahuza ibindi byinshi birimo ibiyobyabwenge by’ubwoko bwose, bigenda bikica imitekerereze n’imyifatire y’ababikoresha ku buryo bishyira imibereho yabo mu kaga ko kugerwaho n’ingaruka mbi nyinshi zitandukanye ku buryo byagera aho umuntu abaho nta cyo yimariye nta n’icyo yamarira abandi.

Ubushakashatsi (RMHS 2018) buherutse gukorwa n’abagize ishami rishinzwe ubuzima bwo mu mutwe mu kigo cy’igihugu gishinzwe ubuzima, bwagaragaje ko 12% by’abaturage b’u Rwanda muri rusange bafite ikibazo cy’agahinda gakabije. Bwanagaragaje ko abarokotse Jenoside yakorewe Abatutsi 35% bafite ikibazo cy’agahinda gakabije, naho 28% muri bo bafite ikibazo cy’ihungabana.

Inkomoko y’ibibazo by’imitekerereze ni iyihe?

Ibyo byose bituruka ku bibazo by’imibereho n’amakimbirane mu miryango, ku mateka ababaje abantu baba baranyuzemo, yaba ay’ibiza, ay’ubuhunzi, ay’intambara, aya za Jenoside n’ingaruka zayo zitandukanye zigaragariza ku bantu ku giti cyabo, zikigaragariza mu mibanire mu ngo, mu miryango no mu mibanire kandi zikagira n’ingaruka ku bihugu.

Mu rwego rwo guhangana n’ibibazo nk’ibi, igihugu cyacu cyakoze ibishoboka byose kugira ngo gifate ingamba zihamye, hashyirwa mu bitaro bitandukanye no mu bigo nderabuzima, serivisi zo gufasha abafite ibibazo twavuzeho bibatera guhora bahangayitse.

Life in Fullness Ltd yo, nk’uko tubihamirizwa na Emmanuel Nyampatsi uyihagarariye, ije ari kimwe mu bigo by’abikorera cyiyemeje gutanga umusanzu wacyo mu kunganira serivisi z’ubuzima bw’imitekerereze aho inzobere ku bibazo bihangayikisha abantu ziteguye kubakirana yombi zibatega amatwi kinyamwuga, kugira ngo mufashwe kubona ibisubizo bihamye ku bibazo bwite bibabangamiye.

Mu gihe waba wisanga mu myifatire no mu bibazo bikurikira: Gukunda kubura ibitotsi cyangwa gusinzira igihe gito cyane mu ijoro no gukunda kurota ibintu biteye ubwoba; guhorana umunaniro mu mubiri n’iyo waba waruhutse bihagije; guhora ubabara umutwe n’iyo waba wanyoye imiti; kubabara umugongo cyane ukabimarana igihe kirekire; kugira ibishishi byinshi mu maso, kuzinukwa ibiryo cyangwa kurya no kunywa cyane;

Kunanuka bikabije cyangwa kubyibuha bikabije; guhora wumva ufite agahinda n’amarira ya hato na hato; kugira ubwoba bwinshi umutima ugatera cyane kandi nta kintu gifatika cyagukanze; kumva nta cyo umaze, kumva wiyanze kandi utifitiye icyizere; kumva wakwiyahura; kumva udashishikariye gukora umurimo uwo ari wo wose ukumva wahora wiryamiye; kwigunga, gutinya kujya aho abandi bari no kumva udashaka kugira umuntu n’umwe uvugisha; guhorana inkomanga ku mutima no kubura amahoro y’umutima ku buryo bukabije; guhorana umujinya n’inzika rimwe na rimwe utibuka aho bituruka; n’ibindi byinshi bishingiye ku muhangayiko uhora wiyumvamo, uri umwe mu bo serivisi za Life in Fullness zagirira akamaro.

Ikindi gishishikaje abo muri Life in fullness ni ugutanga umusanzu wabo mu gukemura amakimbirane agaragara mu ngo z’iki gihe akomeje kwigaragariza mu rugomo n’amahohotera bigenda byiyongera, ku buryo byatumye ubutane bufata intera ndende hagati y’abashakanye, ku buryo bibera abana bamwe gukurira mu gahinda ndetse na bamwe mu rubyiruko bikababera impamvu yo gutinya gushinga ingo.

Life in fullness irashishikariza abashakanye bafite ibibazo baburiye umuti kubagana, cyane cyane ibishingiye ku burere bw’abana, ibijyanye n’ubwumvikane buke nko mu micungire y’umutungo ndetse n’ibifitanye isano n’imibonano mpuzabitsina. Serivisi icyo kigo gitanga zifasha umugabo n’umugore kwigira hamwe uburyo bwo gukemura mu mahoro ayo makimbirane yose atera amakaraza mu mibanire.

N’ubwo inzego za Leta n’iz’abikorera zahagurukiye gufasha Abanyarwanda guhangana n’ibibazo by’ubuzima bw’imitekerereze, ntibibujije benshi gukomeza gutinya kwegera inzobere ngo zibibafashemo.

Kuki Abanyarwanda batinya kuganira ku bibazo byabo?

Abanyarwanda bakeneye ubufasha ku bibazo bafite ni benshi, ariko abatinyuka kwegera serivisi zibibafashamo baracyari mbarwa. Bwa bushakashatsi twavuzeho, bwasanze 62% mu bafite ibyo bibazo ari abazi ko izo serivisi zibaho, ariko abatinyuka kuzigana bakaba 5% gusa. Hari impamvu ebyiri zikunze kugaragazwa n’ababasha kuvuga icyo babitekerezaho.

Icya mbere ni uko hari Abanyarwanda benshi bishyizemo ko kwegera serivisi zifasha abafite ibibazo by’imitekerereze byatuma bafatwa nk’abataye umutwe cyangwa abafite uburwayi bwo mu mutwe kera bitaga: “abasazi”. Ibyo bitera bamwe kumva bazegereye byaba ari impamvu yo gutesha agaciro isura n’icyubahiro bafite mu bandi, kuko hari abatinya ko bimenyekanye bajya bafatwa nk’abarwayi bahoraho, bityo bakumva byabaviramo guhabwa akato, gusuzugurwa no gutereranwa.

Nyamara imyumvire nk’iyi, abantu bakwiye kuyirenga, kuko uburwayi bufata imitekerereze y’umuntu ari uburwayi busanzwe nk’uko umuntu afatwa ibice bitandukanye by’umubiri. Impamvu ni uko igihe cyose umuntu ahuye n’ikimutera guhangayika cyane, ariko akabura igisubizo gihwitse ku kibazo afite, birasanzwe ko uwo muhangayiko ukabije ugira ingaruka mbi ku mitekerereze no ku marangamutima bye.

Uburwayi bwibasira imitekerereze n’imyifatire y’umuntu ntibwatangiranye na Jenoside yakorewe Abatutsi muri 1994 nk’uko bamwe babyibwira, ni uburwayi abantu bagize kuva bagitangira kubaho, kuko aho abantu bari hatabura ibibazo, imihangayiko n’amakimbirane. Gusa Jenoside yakorewe Abatutsi mu 1994, ni imwe mu mpamvu zatumye ibibazo nk’ibi bifata intera ndende cyane.

Icyakora mbere ya Jenoside yakorewe Abatutsi, u Rwanda rwari rutaragira serivisi zihagije zita ku bibazo bitandukanye by’ubuzima bwo mu mutwe ugereranyije n’uko bihagaze ubu. Nk’uko rero tutagira ipfunwe ryo kwivuza indwara z’umubiri, ni na ko tutari dukwiye kugira ipfunwe ryo kwivuza izituruka ku mitekerereze no ku marangamutima y’umuntu.

Indi mpamvu ikunze kuvugwa ni uko hari benshi bibwira ko kubwira ibibazo byawe uwo utazi byaba ari ukwivamo cyangwa kwimena inda. Kugira ibanga ni byiza, ariko hari igihe uhisha ikibazo kigakomeza kugukuriramo, ukazajya gusaba ubufasha warazahaye kandi warashoboraga kugifatirana hakiri kare. Abibwira ko gusaba ubufasha ari ukwimena inda, banazirikane ko n’isoni zirisha uburozi! Birazwi ko hari abifungurira ba magendu, abandi bakifungurira ababumva ariko badafite ubushobozi, ubuzobere n’ubunyamwuga byafasha mu gutuma ikibazo gihari gishobora kwigwaho no gusesengurwa giherewe mu mizi. Nyamara umurwayi ufite ikibazo gisanzwe cy’umubiri ntatinya kukibwira muganga ndetse akaba yamwereka ibice by’umubiri ubusanzwe biba bihishe, agamije ko muganga amufasha.

Kuki se adataha yumva ko muganga ashyira ku karubanda ibyo yeretswe, abandi badasanzwe babona? Nk’uko kugira ibanga biri mu nshingano za muganga, ni ko n’abafasha abafite ibibazo by’imitekerereze bagirira ibanga ababagirira icyizere bakabasaba ubufasha ku bibahangayikishije. Kugira ibanga ry’umwuga ni cyo cya mbere inzobere ku buzima bw’imitekerereze bashingiraho serivisi zabo, kuko uwabizera akavuga ibye nyuma akazabisanga hanze, yaba impamvu ituma izo serivisi zitakarizwa icyizere.

Abagize Life in fullness bakorera mu mujyi wa Kigali mu Karere ka Kicukiro, mu murenge wa Kicukiro (KK515, No 5). Muri gahunda y’igihe kirekire, bateganya kuzafungura amashami mu zindi ntara, ariko kugeza ubu baracyakorera gusa mu Mujyi wa Kigali.

Bakora iminsi yose y’akazi kuva i saa mbili za mu gitondo kugera i saa kumi n’imwe n’igice za nimugoroba. Abakeneye serivisi zabo cyangwa ibindi bisobanuro, mwahamagara kuri Telefone ngendanwa 0788420625 cyangwa mukabandikira kuri [email protected], mugahabwa umunsi n’isaha yo kubonaniraho n’ababafasha mu bibazo mufite. Mushobora no gusura urubuga rwa life in fullness: www.healingbridgerwanda.com.

Ubujyanama ku cyakiza umubabaro, agahinda n'umuhangayiko, Life in Fullness nicyo ibereyeho

Special pages
. . . . . .