Ibaruwa ifunguye yandikiwe Kabuga Félicien

Yanditswe na Mukagasana Yolande
Kuya 19 Gicurasi 2020 saa 04:29
Yasuwe :
0 0

Ubwanditsi: Iyi nyandiko ni ibaruwa yanditswe na Yolande Mukagasana warokotse Jenoside yakorewe Abatutsi mu 1994, ikaba igenewe Félicien Kabuga ukekwaho uruhare muri Jenoside uheruka gutabwa muri yombi.

Bwana Felisiyani Kabuga,

Byanga bikunda ntabwo wowe unzi kuko kuri wowe ntacyo ndicyo. Nyamara njye ndakuzi kimwe n’abantu bose babaye mu Mujyi wa Kigali igihe kimwe nawe. Nakwibutsa gusa ko Abatutsi bari babayeho mu bwoba bukabije bwo guhora biteguye gufungwa no kwicwa nta yindi mpamvu uretse gusa ko bari Abatutsi.

Twese tuzi uruhare rwawe mu itegurwa n’ishyirwa mu bikorwa bya Jenoside yadukorewe mu 1994. Ubu nasigaye njyenyine, nkaho ntigeze ngira aho mvuka, nta bavandimwe, nta mugabo nta n’abana. Simvuze abaturanyi bashize. Ibyo byose wabigizemo uruhare rukomeye.

Uri rero mu bo ndega banteye gusigara gutya kugeza n’uyu munsi. Byose wabifatanyije n’Akazu mwari mwarubatse mwese hamwe. Mwacuze umugambi wo gukora Jenoside, mwica Abatutsi barimo n’umuryango wanjye.

Wanshenguye umutima urawushegesha burundu, wanyishe mpagaze umunsi wica abanjye bose, ubaziza gusa ko ari Abatutsi. Nyuma yaho ubaho mu munezero imyaka 26 widegembya nyuma y’icyaha nka kiriya. Ngo warazereraga? Sinabyemera na gato, ariko n’ababyemera ndabumva.

Hari n’abashobora kuvuga ibyo bari bafite umugambi wo kuguhisha no kuguhishira gusa kugira ngo bace intege abagushakishaga. Biramutse ari byo, wabishobojwe n’umwanda w’amafaranga wari ufite wicishije Abatutsi basaga miliyoni.

Twe abakurokotse twamaze amezi atatu tuzerera tuguhunga n’Interahamwe zawe, naho wowe uri kumwe n’abawe mu mahoro n’umunezero. Ubana n’umuryango wawe, mu mahoteli ahenze naho twe ayo mezi atatu twayamaze mu ruzerero rwo guhunga urupfu, izuba n’imvura bituri ku mugongo inzara n’inyota aribyo twiririrwa tukararira, duhigwa n’Interahamwe zawe wahembaga n’imbwa zabo ku mugambi wo kutwica urubozo mu gashinyaguro. Uraba ukoze nungereranyiriza ukwiryka kwawe n’ukwacu.

Bwana Kabuga,

Uri mu bo ndega ibyo nabayemo mu 1994 kugeza uyu munsi. Impamvu numvise ko wafashwe nkanezerwa ni uko wabaye umwicanyi ruharwa muri Jenoside yadukorewe.

Ntiwibeshye kandi ko uko kwishima ari ukubura ubumuntu. Utumye abajyaga batwita abasazi n’ababeshyi twe abakurokotse n’ingabo zawe bibonera ukuri tuvuga. Kugira ngo kandi umunsi wawe nugera kimwe na buri wese muri iyi Si ugende ntawe ukwitiranya. Ugende uri umwicanyi wahamwe n’icyaha natwe tugende turi inzirakarengane zakurokotse, Isi yose idashidikanya.

Abakurokotse tumaze imyaka 26 turiho tutariho, tugerageza gusana imitima n’ubuzima bwacu washenye, ariko bamwe byarabananiye ndetse muri bo hari abo byahitanye, bicwa n’ingaruka basigiwe na Jenoside yakorewe Abatutsi, ntibakituri hagati. Kubera izo mpamvu rero mfite inshingano nk’ukiriho yo kugukurikirana mu mwanya wabo nkabusiriza ikivi utatumye busa.

Njye sinibeshya uwo ndega, kuko ntari za nkiko zicira imanza abafashe imihoro mu ntoki gusa, bakirengagiza ubwonko bwatekereje Jenoside cyangwa bakarekura abayobozi bayo nk’abagome b’abaminisitiri, abasirikari n’abandi bateguye bakanayoborera Jenoside ku rwego rwo hejuru.

Nubwo kandi uburushyi bwo kurokoka njyenyine mu bwigunge nta muryango mbumenyereye, umenye ko ndi umunyamahirwe kurusha abarokotse benshi. Igitangaje nta rwango na mba ngufitiye, ahubwo njya numva uteye nk’impuhwe. Nkazigirira abana n’abuzukuru bawe bazagukurikiza mu rwango no kubura ubumuntu kubera ko uri umubyeyi gito ku bw’uburere wabahaye. Ku bwanjye abagufashe bari bakwiye no gukomeza gufata abicanyi bose nka Madamu Habyarimana Agatha Kanziga. Ariko bazatubwira ko batazi aho atuye. Nyamara nibabishaka koko bazatubaze tuzabajyane tubageze imbere y’umuryango we. Ariko nawe wabona bavuze ko azerera cyangwa ko yisaziye. Impamvu baduha zo kutamufata zo ni nyinshi.

Ndizera nkomeje ko abagufashe bazakomeza uko batangiye bakanafata abandi mwafatanyije nka Padiri Wenceslas Munyeshyaka, Dogiteri Munyemana Sostène, Eugène Rwamucyo, Lawurenti Bucyibaruta, n’abandi bubatse paradizo ku butaka bw’u Bufaransa n’ahandi i Bwotamasimbi.

Bwana Kabuga,

Njye nakugira inama yo gusaba urukiko ukaburanishirizwa mu Rwanda. U Rwanda rwa none si rwa rundi muzi mwasize mu 1994. Cya gihugu mwifuje kurema mu buryo bwanyu mugisenyesha ingengabitekerezo y’urwango.

Nta gihano cy’urupfu kikibaho, ariko unamenye ko cyabaye igihugu kitarangwamo ingeso yo kudahana, kitakibamo Umuhutu, Umututsi n’Umutwa kibamo Abanyarwanda bagikunda koko kandi bafite uburenganzira n’inshingano bingana.

Ku bw’ibyo byose rero nakugira inama yo gusaba urukiko kuburanira iwanyu, wahagera ukemera icyaha kuko twese tuzagushinja, ugasaba imbabazi abarokotse Jenoside, abagore bafashwe ku ngufu rimwe na rimwe n’abagabo benshi, n’abana bavutse kubera icyo cyaha, batazagira irangamimerere yindi uretse iyo wabahaye y’uko bavutse kubwo gufatwa ku ngufu kw’abababyaye.

Niwicisha bugufi byose bizakorohera kandi bizashoboka. Erega u Rwanda ntirukiri rwa rundi utekereza. Kandi ureke gutinya abarokotse, burya bwa bumuntu bwacu mwagerageje gusenya turacyabufite kuko akamuri kabwo ntimwabashije kukageraho ngo mukazimye karacyaka. Uhumure kandi dukeneye ubutabera ntidukeneye kwitura inabi.

Ahubwo mfite ikibazo kimba ku mutima numva nakubaza. Ko hano mu Rwanda tubwiza abana ukuri kuri Jenoside yakorewe Abatutsi mu burere tubaha, wowe waba warigeze ugira ubutwari bwo kubwiza abawe ukuri?

Wabwiye ukuri kose abana n’abuzukuru bawe ku byaha by’ubwicanyi wakoze mu mateka ya Jenoside yakorewe Abatutsi? Kubabwira ukuri nta mbereka ku byaha wakoze ni ingirakamaro, cyangwa se ukabakura mu mitwe urwango rw’Abatutsi wabahanye n’uburere, ubabwira Umututsi n’uko wabiyumvishaga.

Nakugira inama yo kubibabwira mbere y’uko babyumvira mu nkiko. Ibyari byo byose nabo bazi ibyo wakoze wenda bumvaga ari byiza. Bazi RTLM n’iremwa ryayo, bazi ikinyamakuru Kangura n’amategeko icumi y’Abahutu, bazi ‘réseau zéro’, ‘Akazu’ mwarimo n’ibindi byose washyizeho ndetse n’ubufasha wagiye utanga mu binyamakuru binyuranye byakwirakwizaga urwango rw’Abatutsi.

Bazi ibigega wagiye ushyiraho byo gushyigikira Jenoside kandi n’ibihumbagiza by’imihoro waguze yamaze Abatutsi harimo barimo umuryango wanjye wose. Ndizera kandi ko ubucamanza mpuzamahanga buzatekereza kimuntu ntibwizimbe mu kugucira urubanza bukakohereza gucirwa urubanza mu Rwanda.

Uhumure ntuzaba uri wenyine kandi ntuzaba unabaye uwa mbere uciriwe urubanza mu Rwanda.

Ariko n’ubundi ni ubushake bwa politiki bw’ibyo bihugu by’ibihangange.

Mu gusoza uru rwandiko nkwandikiye, ndifuza kukubwira wowe Bwana Kabuga Felisiyani ko ku nshuro ya mbere mfite icyizere ko nzashobora kuba mu mubare w’abagushinja Jenoside yakorewe Abatutsi nkakurega miliyoni isaga y’Abatutsi bazize Jenoside, Abahutu batemeranwaga n’umugambi w’Akazu warimo wo kumara Abatutsi.

Ndifuza kuba mu mubare w’abarokotse Jenoside yakorewe Abatutsi, tuzagufasha kwiyubaka hakoreshejwe ubutabera ntitukwiture inabi wowe wadukoreye yo kuba waratwishe urubozo duhagaze, abacu kakajugunywa nk’umwanda mu byobo rusange mwacukuye mwaduhejeje mu nzu, naho twe abarokotse mukatwica duhagaze. Watwishije ingengabitekerezo y’urwango n’amafaranga, ariko jye nzirengagiza ibyo wankoreye nzagufasha kwicuza kugira ngo ubashe kwiyubaka ugire ubumuntu.

Ndizera gusa ko utazaruhanya uhakana ibyo wakoze tuzi twese, kugira ngo utere inkunga y’ibitekerezo igihugu cyacu mwashenye gikomeze cyiyubake, kandi utange n’umusanzu mu buhamya tubashe kurwanya ihakana n’ipfobya bya Jenoside yakorewe Abatutsi mu Rwanda kuko uzi kuturusha ingengabitekerezo, itegurwa n’ishyirwa mu bikorwa byayo.

Bikorewe mu Rwanda, tariki ya 17 Gicurasi 2020

Yolande Mukagasana

Uwarokotse Jenoside yakorewe Abatutsi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .