Twandike, tugure, dusome ibitabo kuko utamenya iyo ava ntamenya iyo ajya!

Yanditswe na Hategekimana Richard
Kuya 22 Gicurasi 2020 saa 07:57
Yasuwe :
0 0

Gusoma ibitabo biraryoha cyane, uzi kurambura urupapuro ukiyongeza urundi !Gusoma ibitabo ni ukuganira n’ abatuye isi , Gusoma ni ukuganira n’abahanga, ni ukuganira n’ abanyabwenge, ni ukuganira na ba sogokuruza. Kandi bavuga ko utaganiriye na se atamenya icyo sekuru yasize avuze.

Ibihugu byinshi ku isi byateye imbere kubera abaturage babyo bafite ubumenyi bakomora mu gusoma ibitabo. Gusoma ibitabo ni umusingi w’iterambere rirambye ry’imiyoborere myiza, iterambere ry’ubukungu ,Ubutabera n’ imibereho myiza. Gusoma ibitabo ni isoko yo kugira ubuzima bwiza haba ubuzima bw’imitekerereze, imikorere ndetse n’imyifatire.

Iyo usomye igitabo uraruhuka, ubwonko burushaho gukora neza, gusoma ibitabo biraryoha, byongera umunezero, byongera ibyishimo, byongera urukundo, byongera imibanire myiza, byongera indangagaciro na kirazira mu mikorere y’umuntu, byongera urukundo rw’igihugu.

Gusoma ibitabo byongera ubunararibonye, byongera ubuhanga, byongera ubwenge cyane cyane iyo usoma igitabo cyiza cyuzuyemo indangagaciro na kirazira mu iterambere ry’u Rwanda n’Afurika, ibitabo byungura ubumenyi mu miyoborere myiza, iterambere ry’ubukungu, iterambere ry’imibereho myiza, ubuvanganzo ndetse n’ibivuga iterambere ry’ubutabera.
Burya umuntu udasoma ibitabo asaza vuba, arananirwa cyane mu mutwe, rimwe na rimwe ntamenya aho isi igeze. Udasoma ibitabo aba ari mu gihombo gikomeye, udasoma ibitabo biroroshye kuyobagurika, kutamenya icyerekezo.

Perezida Kagame Paul iteka adushishikariza kwandika amateka yacu y’ukuri kuko ayo batwandikiye bayagoretse. Hari abavuga bati “ ushaka guhisha umunyafurika amuhisha mu gitabo”(Ibi tugomba kubyanga). Tujye mu ngamba, twandike ibitabo, tugure ibitabo ndetse tunasome ibitabo bizadufasha kugira ubuhanga bwo kubaka u Rwanda ndetse n’ Afurika twifuza.

Twandike ibitabo birata Intwari z’iwacu, ibitabo bifasha abana n’urubyiruko kumenya aho u Rwanda ruva n’aho rujya, ibitabo byongerera abana ubumenyi mu ikoranabuhanga, ibitabo bishimangira indangagaciro na kirazira, ibitabo bitwereka icyerekezo kibereye Intore z’u Rwanda, ibitabo bivuga amateka yacu y’ibihe byose.

Mureke twandikire u Rwanda, twandikire KEZA NYIRAMAJYAMBERE, turate intwari zacu binyuze mu bitabo, turate u Rwanda. Dusome ibitabo twunguke ubwenge n’ubuhanga bizafasha abazadukomokaho kumenya aho ababyeyi babo bavuye, bibarinde gusubira inyuma.

Tugure ibitabo kuko kugura ibitabo ni ukugura zahabu, ni ukugura ikintu cy’agaciro, ni ukugura ubukire burambye !

Iki ni igitekerezo cya HATEGEKIMANA Richard,
Umuyobozi w’urugaga rw’Abanditsi mu Rwanda


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .