Umunsi mwiza w’ubwisanzure bw’itangazamakuru: Umunsi wa twese

Yanditswe na Rwabuneza Anastase
Kuya 3 Gicurasi 2020 saa 01:51
Yasuwe :
0 0

Tariki ya 3 Gicurasi buri mwaka isi yose yizihiza umunsi mpuzamahanga w’ubwisanzure bw’itangazamakuru. Mu Rwanda kimwe n’ahandi henshi ku isi, uyu munsi wizihijwe mu gihe abantu bari iwabo mu ngo, basabwa kubahiriza amabwiriza ajyanye no kwirinda ikwirakwizwa ry’icyorezo cya Coronavirus.

Mu byo twese tutemerewe harimo guterana turi benshi. Ni yo mpamvu kwizihiza uyu munsi mu busabane busesuye dusanganywe bitadukundiye.

Nyamara ariko uyu munsi tuwizihije mu gihe inkuru zigitarwa zikanatangazwa. Inkuru, ibitekerezo n’ibiganiro biracyahabwa ababyumva, ababireba n’ababisoma ku bwinshi. Uretse ibitangazamakuru dusanganywe nka radiyo, Televiziyo, ibyo kuri murandasi n’ibyo ku mpapuro, Guma mu rugo kuri bamwe n’akato ku bandi byaduhaye umwanya wo kwakira no guhanahana amakuru binyuze no ku mbuga nkoranyambaga. Benshi basa n’ababaye abanyamakuru n’ubwo atari wo mwuga ubatunze cyangwa bizwi ku mugaragaro ko ari wo bakora dukurikije uko itegeko ribiteganya. Ubu ni ubwisanzure.

Uyu munsi rero njye ndasanga ari uwa twese, tukaba tugomba kuwuzirikana twese. Ni na yo mpamvu nifurije umunsi mwiza w’ubwisanzure bw’itangazamakuru abanyamakuru ubwabo, abatanga amakuru n’abahabwa amakuru bose.

Abanyamakuru

Muri ku isonga y’amakuru, muritanga ahashoboka n’ahagoranye mugatara, mugatunganya mukanatangaza ibibera hirya no hino. Murabyuka mukicara mugatekereza, mukaduha ibitekerezo byanyu ku ngingo cyangwa ikibazo runaka cyugarije rubanda, bityo mugafasha abayobozi kubona igisubizo no gutanga umurongo w’ibyo tubamo buri munsi.

Mu bo Coronavirus yasagariye namwe murimo. Yabagabanyirije ubushobozi, kuko mutakigendagenda nk’uko mwabikoraga mbere [namwe mwambaye umubiri, mugomba kwirinda], nyamara ariko ntitwahwemye gusoma ibyo mwandika no kumva ibyo muvuga. Mwahitwaye neza. Mukomeze muhagarare neza kuri uru ruhembe murasaniraho, murusheho kuba abanyamwuga, umusanzu wanyu ni ntagereranywa.

Ababaha amakuru
Banyamakuru, itegeko ribemerera gusaba kandi mugahabwa amakuru ya ngombwa mukeneye gutangariza rubanda. Ababaha amakuru ni benshi cyane. Ni abayobozi mu nzego za Leta, iz’abikorera, abanyamadini, abo mu miryango itari iya Leta, abo hirya no hino mu mashyirahamwe, amakoperative no mu bimina, abanyabukorikori n’abahanzi, abavumvu, abahinzi, aborozi n’abandi.

Mwe mwese mwemera kwakira ubusabe bw’abanyamakuru, bakabasanga namwe mukabasangiza ayo mufite, mukabamara amatsiko yabo ubwabo, n’ayo bafitiye abasomyi, turabashima. Barababaza mugasubiza, maze bakadusangiza byinshi twe tutari kwibonera ubwacu. Mwe mwese mutanga amakuru, mbifurije umunsi mwiza.

Abagenerwamakuru

Banyamakuru twizihizanya uyu munsi none, ̋kugosorera mu rucaca ̋ ntibikababeho, ̋guta inyuma ya Huye ̋ biragatsindwa. Ibyo mwandika, ibyo muvuga n’ibindi byose mutangaza hari ababisoma, hari n’ababatega yombi. Murandika bigasomwa, muravuga bakabumva.

Abumva n’abasoma rero ni abantu b’ingenzi mu ruhererekane rwo gutara, gutunganya no gutangaza amakuru. Muri abatangarizwa amakuru mukayumva, mukayasoma ndetse mukanagaragaza icyo muyatekerezaho. Itegeko ryo kubona amakuru ryadufunguriye inzira yo kwishiririra amatsiko, none twese tunasigaye twemerewe urubuga rwo kugira icyo tuvuga ku makuru n’ibiganiro itangazamakuru ritugenera. Umunsi mwiza ku bagenerwamakuru.

Twisanzure nta we duhutaje twubake ihererekanyamakuru ry’umwuga.

Ibikubiye muri iyi nyandiko ni igitekerezo cya Anastase Rwabuneza (ANARWA), Impuguke mu Itumanaho akaba n’Umusomyi wa IGIHE.com}

Itangazamakuru ni rumwe mu nzego zifasha benshi hirya no hino ku isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .