Covid-19: Umwanya ku miryango yari yarazahajwe n’amakimbirane

Yanditswe na Pastor Desire Habyarimana
Kuya 31 Werurwe 2020 saa 10:38
Yasuwe :
0 0

Muri iki gihe isi yugarijwe n’icyorezo cya Covid-19, zimwe mu ngamba zafashwe ni ugukaraba intoki hifashishijwe amazi meza ndetse n’isabune, ariko by’umwihariko, abantu bose basabwa kuguma mu ngo nka kimwe mu bisubizo byo guhashya iki cyorezo, dore ko nta muti cyangwa urukingo gifite.

Ingamba zo kuguma mu ngo kwa buri wese, zatumye ubishaka n’utabishaka, bose bisanga bari mu rugo. Ibi byaje kandi mu gihe hari hashize igihe kitari gito hari ingo nyinshi zifite amakimbirane, ndetse no mu nkiko hari ibirego byinshi bya gatanya.

Nk’uko bimenyerewe, zimwe mu mpamvu zakururaga ubwimvikane buke hagati y’abagabo n’abagore ndetse bikaganisha kuri gatanya harimo kutabonera umwanya ibiganiro biboneye, gucana inyuma, ikoreshwa nabi ry’umutungo, kwikunda n’ibindi.

Mu bihe bisanzwe, umwe mu bafitanye amakimbirane yabonaga ubuhungiro mu kazi, mu nsengero, mu baturanyi cyangwa muri bene wabo. Ariko ubu bombi bategetswe kugumana. Uwo gahunda yo kuguma mu rugo yatangajwe ari iwe, yahise ategekwa kuhaguma.

Ese muri iki gihe abantu bose basabwe kuguma mu ngo, abagize umuryango babanye bate? Reka turebere hamwe bimwe mu bintu byari byarazambye, ariko bishobora kuzarushaho kuba byiza bitewe na gahunda yo kuguma mu rugo.

Abana batahabwaga umwanya n’ababyeyi

Abana cyane cyane abakomoka mu miryango yo mu mijyi, ntibabonaga ababyeyi mu buryo buhagije. Ibi byaterwaga n’uko ababyeyi babyukaga bajya gushakira ingo imibereho, bakagera imuhira bananiwe, ku buryo batabasha guha abana umwanya uhagije.

Igisubizo cya covid-19:

N’ubwo ababyeyi bamwe na bamwe basabwe gukorera mu rugo, ariko wakwirirwa mu rugo uri gukora cyangwa utari gukora, abana bababona hafi, barabaganiriza, bakabisanzuraho. Ababyeyi bari gufasha abana gusubira mu masomo no gukora uturimo tworoheje nko kubigisha kwikarabya, kwigaburira, gusasa uburiri bwabo n’ibindi.

Abashakanye batahanaga umwanya uhagije

Nk’uko twabivuze hejuru, zimwe mpamvu zikurura amakimbirane mu ngo, harimo kutabonera umwanya uwo mwashakanye. Abantu bakazahura ibibazo byaragiye byiyongeraho ibindi, kandi bitabanje gukemuka.

Igisubizo cya covid-19:

Icyorezo cya coronavirus gitumye abashakanye birirwana mu rugo. Amafunguro y’umunsi yose bari kuyasangira. N’ubwo hari abirirwa mu kazi, ariko burya agera aho agasoza. Hari abirirwa mu mbuga nkoranyambaga, ariko burya agera aho akarambika terefone hasi. Ubwo rero bombi bari kumwe, kandi bafite umwanya wo kuganira ku cyerekezo cy’urugo cy’igihe kirekire n’ibindi batabashije gukemura mu gihe kizaza. Ubu nta wakwireguza umunaniro!

Abagabo bashinjaga abagore kwangiza umutungo w’urugo

Hari abagabo benshi usanga bashinja abagore gukoresha nabi amafaranga. Yagera mu rugo bakamwaka amafaranga y’amakara, akabuka inabi ngo “ayo nabahaye aka kanya arashize?”

Igisubizo cya covid-19:

Burya iyo abagabo babwira abagore ko bakoresha amafaranga yo mu rugo nabi, iteka abagore baba bifuza ko umugabo yazisanga mu buzima butuma amenya uko amafaranga akoreshwa. Ubu abakozi bo mu ngo barasaba nyirabuja amafaranga, sebuja yumva akabona neza icyo agiye gukoreshwa. Ubu barabona mu bubiko bw’ibiryo, amata n’ibindi bikoresho uko bigenda bishira. Ubu ikibazo cy’ikoreshwa ry’ibyo mu rugo kirareba buri wese.

Abantu bari barasabye gatanya

Hari abantu benshi bari baratanze ibirego bisaba gatanya. Nk’uko bimenyerewe, iyo usabye gatanya ntabwo uhita uyihabwa uwo munsi. Ahubwo leta ibaha umwanya wo kubanza kugerageza ubundi buryo bwose bushoboka, ngo ahari wenda byakemuka mutabanje gutandukana.

Igisubizo cya covid-19:

Ubu abashakanye bahawe umwanya wo kwicara, bakareba ibyatumaga badahuza. Ngaho nimufate umwanya mubiganireho, buri wese arebe ububabare bwa mugenzi we. Nta mahirwe ahari yo guhamagara umuturanyi, parrain cyangwa marraine ngo baze kubafasha gukemura ibibazo byanyu, oya! Ahubwo nimwiganirire ubwanyu, mushake umuti w’ikibazo, ariko ikiruta byose, buri wese acire bugufi mugenzi we, uwababaje mugenzi we amusabe imbabazi.

Imico itari myiza yaregwaga abakozi bo mu rugo

Hari abagabo n’abagore baganira ukumva barabwirana ibibazo bafitanye n’abakozi mu ngo zabo. Bamwe babarega agakungu, kuzana abahungu mu rugo (mu gihe ari abakobwa), kwiba ibiribwa, kwangiza n’ibindi.

Igisubizo cya covid-19:

Umwanya wo kuguma mu rugo ni umwanya wima benshi mu bakora amakosa avuzwe haruguru amahirwe yo gukomeza ayo makosa. Ubu ni umwanya mwiza wo kwisubiraho, ukamenya inshingano zawe ko ari ukubaha no gukora akazi ushinzwe neza. Ni n’umwanya w’abakoresha wo kongera kwereka ubumuntu abo bakoresha binyuze mu gusangira nabo, kubabaza amakuru y’imiryango yabo n’ibindi.

Ese Bibiliya itanga izihe nama ku mubano n’inshingano z’abagize umuryango?
Mu by’ukuri Bibiliya irerura ikabwira buri wese uko akwiriye kwifata kugira ngo abashe kubana na mugenzi we neza. Iyi mirongo yo muri Bibiliya iributsa buri wese mu bagize umuryango, uko akwiriye kwitwara kugira ngo abungabunge umubano we n’abandi.

“Bagore, mugandukire abagabo banyu nk’uko bikwiriye abari mu Mwami wacu. Bagabo, namwe mukunde abagore banyu ntimubasharirire. Bana, mwumvire ababyeyi banyu muri byose, kuko ibyo ari byo Umwami ashima. Ba se, ntimukarakaze abana banyu batazinukwa. Mbata, mwumvire ba shobuja bo ku mubiri muri byose, ntimubakorere bakibareba gusa ngo muse n’abanezeza abantu, ahubwo mubakorere mutaryarya mu mitima yanyu mwubaha Imana. Ibyo mukora byose mubikore mubikuye ku mutima, nk’abakorera Shobuja mukuru badakorera abantu, (Abakorosayi 3:18-23).

Mwese tubifurije ubuzima buzima, dukomeze dukarabe intoki neza kandi tugume mu rugo, turushaho kuzahura umubano hagati y’abagize umuryango.

Ibi bihe imiryango ibanye nabi yari ikwiriye kwisuzuma, igakemura amakimbirane ifite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .