Hari ingamba zihariye abona zaca impanuka zikomeje guhitana benshi

Yanditswe na
Kuya 19 Kanama 2014 saa 07:38
Yasuwe :
0 0

Ubwo Nyakubahwa Perezida wa Repubulika y’u Rwanda yakiraga indahiro za bamwe mu bayobozi bakuru b’igihugu kuwa mbere, tariki ya 18 Kanama 2014, kimwe mu bibazo yagarutseho mu ijambo yavuze ni kibazo cy’impanuka zimaze iminsi zitwara ubuzima bw’Abanyarwanda cyangwa se zikabamugaza. Nibyo koko, icyo kibazo gihangayikishije benshi kandi hagomba gufatwa vuba ingamba zikomeye kugira ngo, nubwo bwose bitashoboka ko gikemuka burundu, ariko harebwe uburyo bushoboka bwose kugira ngo impanuka (...)

Ubwo Nyakubahwa Perezida wa Repubulika y’u Rwanda yakiraga indahiro za bamwe mu bayobozi bakuru b’igihugu kuwa mbere, tariki ya 18 Kanama 2014, kimwe mu bibazo yagarutseho mu ijambo yavuze ni kibazo cy’impanuka zimaze iminsi zitwara ubuzima bw’Abanyarwanda cyangwa se zikabamugaza. Nibyo koko, icyo kibazo gihangayikishije benshi kandi hagomba gufatwa vuba ingamba zikomeye kugira ngo, nubwo bwose bitashoboka ko gikemuka burundu, ariko harebwe uburyo bushoboka bwose kugira ngo impanuka zigabanuke.

Birazwi nta gushidikanya ko impanuka ziba ku mihanda hafi ya zose ziba zikomotse ku makosa aba yakozwe, ku buryo butaziguye cyangwa se buziguye, n’umuntu cyangwa n’abantu. Mu yandi magambo, haba hari umuntu (umwe cyangwa benshi), byanze bikunze, uba yagize uruhare (ruto cyangwa runini) mu gutuma impanuka iba.

Ubwo ikibazo cy’impanuka ku mihanda kigaragara rero, ndetse ku buryo bukabije, ni ngombwa ko tugerageza, ku buryo no mu bushobozi bunyuranye, kugifatira ingamba zihamye kugira ngo turebe ko twagabanya ingaruka mbi zacyo.

Ni muri uru rwego nkeka ko ibitekerezo binyuranye kandi by’abantu batandukanye bishobora kuzuzanya kugira ngo ababishinzwe, ku buryo bw’umwihariko, babe bafata ingamba zikwiye mu gushakisha umuti w’icyo kibazo.

Ku ruhande rwanjye, mbona hari hakwiye gufatwa ingamba zikurikira kandi zireba abantu banyuranye n’inzego zitandukanye. Twavuga ko, mu gusuzuma akamaro kazo, byasaba ko izaboneka ko ari ngombwa zose, muzo tugiye kuvuga, zashyirirwa mu bikorwa icyarimwe. Ibi ni ngombwa kubera ko ikibazo cy’impanuka z’ibinyabiziga kireba, ku buryo bw’umwihariko, inzego zitandukanye, ndetse icyemezo kimwe cyangwa bibiri byafatwa n’urwego rumwe cyangwa ebyiri gusa, bikaba bitashobora gukemura byonyine no ku buryo buhamye icyo kibazo.

1. Abashoferi

* Abashoferi batwara za tagisi bagomba kwirinda cyangwa se kubuzwa kugira umuvuduko urenze urugero rwemewe ku mihanda uba washyizweho hakurikijwe uko umuhanda uteye. Ahenshi ku mihanda hari ibyapa byerekana umuvuduko ntarengwa, ndetse n’aho bitari bikaba byajyaho vuba kandi bigakoranwa ubushishozi.

* Abashoferi bagomba kwirinda ibishobora kubarangaza igihe batwaye abantu. Aha twavuga, nk’uko twagiye tubibona kenshi, nko kugenda bavugira kuri telefoni zigendanwa, kugenda baganiriza abagenzi cyane cyangwa babara amatiki (n’amafaranga), kurebe inyuma mu modoka ngo bamenye imyanya isigaye (cyangwa umugenzi waba atishyuye), n’ibindi.

* Umuntu akurikije uko bamwe mu bashoferi b’imodoka zitwara abantu bakora, yabona umunaniro uturutse ku kazi bakora waba inkomoko ya zimwe mu mpanuka ziba ku mihanda. Ntabwo umuntu yabyuka saa cyenda cyangwa saa kumi z’igitondo ngo yirirwe atwaye imodoka kugeza saa ine z’ijoro, ibyo akabikora buri munsi, ngo abure kunanirwa bikabije. Uko umunaniro wiyongera ni nako uburyo bwo kugenzura ibyo akora bugabanuka!

* N’ubwo bwose umushoferi w’imodoka ikora tagisi asabwa kugira uruhusa rwo gutwara ibinyabiziga rwabugenewe (driving license), nkeka ko hari hakwiye n’irindi suzuma (test psychologique) rigamije kureba ubushishozi n’ubushobozi bw’umushoferi mu gufata ibyemezo bikwiye no mu gihe gikwiye, cyane cyane iyo asabwa gufata ibyemezo byihuse cyane mu gihe gito. Hari bamwe mu bashoferi bashobora guta umutwe cyangwa bagafata ibyemezo bidakwiye mu gihe baba batunguwe n’impanuka.

* Byaba byiza, mbere y’uko umushoferi yemererwa gutwara imodoka ikora tagisi, ababishinzwe bagiye basuzuma ubumenyi rusange afite mu byerekeye imiterere n’imikorere y’imodoka. Hari ubwo umushoferi ashobora kutamenya uburwayi imodoka yaba ifite cyangwa se agakora ibitari bikwiye mu gihe imodoka igenda bikaba byakurura impanuka, kubera ubumenyi bucye aba afite kubirebana n’imikorere n’imiterere y’imodoka aba atwaye.

* Ikindi kandi cyakwitabwaho ni ukwambura uburenganzira bwo gutwara imodoka zikora tagisi umushoferi wese wakomeza kugaragaza imyitwarire mibi ku muhanda no kutikosora ku makosa aba akora ku muhanda kandi atwaye abagenzi.

2. Abafite imodoka zikora tagisi

Ku ruhande rw’abantu batunze imodoka zikora akazi ko gutwara abantu twavuga ko nabo hari ibyo bakagombye kwitaho, ku buryo bw’umwihariko:

* Gusuzumisha neza imodoka zabo (technical control) kugira ngo barebe ko ari nzima, kandi bakihutira kuzikoresha vuba mu gihe hari icyo zirwaye, mbere yo kuzisubiza mu muhanda ngo zikomeze gukorera amafaranga.

* Gushyira kuri buri modoka abashoferi barenze umwe kugira basimburane, bityo uwakoze abone igihe cyo kuruhuka (byashoboka uwakoze guhera kare mu gitondo yageza saa sita akaruhuka, hakaza umusimbura kugeza umunsi w’akazi kabo urangiye).

3. Polisi y’Igihugu

Ku ruhande rwa Polisi y’Igihugu hari ingamba mbona zafatwa zikaba zagira icyo zifasha mu gukemura ikibazo cy’impanuka z’ibinyabiziga ku mihanda. Muri zo twavuga nk’izi zikurikira:

* Abapolisi bashinzwe umutekano w’ibinyabiziga ku muhanda bakwiye kuhagera kare cyane kandi bakava mu muhanda bitinze. N’igihe imvura iguye bagomba gushakirwa ibya ngombwa byose ku buryo bashobora gukomeza akazi.

* Birakwiye ko hakongerwa mu mihanda za moto cyangwa imodoka z’abapolisi (mobile control) zireba uko abashoferi bitwara ku mihanda kugira ngo abitwara nabi bafatirwe ibyemezo hakiri kare.

* Kubyerekeye igenzura ry’imodoka (contrôle technique) rikorerwa ibinyabiziga, hakwiye kunozwa uburyo ikorwa ku buryo bitavuna abantu cyane. Nk’uko nabibonye i Kigali, kuko nanjye byambayeho, hari ubwo umuntu abyuka nka saa cyenda z’ijoro nyamara akaza gutaha batayimukoreye kubera ubwinshi bw’imodoka. Nta buryo abantu bajya biyandikisha mbere bagahabwa nimero n’umunsi n’isaha baziraho bikurikije ubushobozi buhari ariko bagataha kontoroli ikozwe? Iyo bigoranye cyane bishobora gutuma bamwe mu batunze imodoka bashobora kuzisuzumisha bakererewe cyangwa se bagashaka guca mu nzira zitaboneye kugira ngo babone icyemezo kivuga ko imodoka zabo zidafite ibibazo by’uburwayi.

* Gusuzuma abashoferi bashobora kuba batwara imodoka banyweye ibisindisha cyangwa se ibindi byashobora gutuma mu mutwe hadakora neza.

* Gukomeza gushyira imbaraga nyinshi mu gutahura no guhana abapolisi baba birengagiza, kubera impamvu zinyuranye, amakosa y’abashoferi bamwe na bamwe ku mihanda.

* Gushyira abapolisi batambaye imyenda ya gipolisi muri tagisi zimwe na zimwe kugira ngo barebe amakosa abashoferi bakora kandi batume bafatwa bahanwe. Ibyo bishobora gukorwa mu bihe bimwe na bimwe bigaragara ko ari ngombwa. Amafaranga yakoreshwa mu ngendo n’abo bapolisi yava mu mande (fine) acibwa abashoferi bakora amakosa.

4. Abagenzi

* Ni ngombwa ko mu gihe cyose abagenzi bari mu modoka babonye umushoferi agenda nabi batinyuka kumubuza. Mu gihe hari ugerageje kuvuga umushoferi akamubwira nabi, ntabwo abandi bagenzi bagomba kwicecekera ahubwo bamwunganira. Umushoferi aramutse atisubiyeho abagenzi bose bagomba kugira ubutwari bwo kumusaba guhagarika imodoka bagasohoka cyangwa se bakaba bakwitabaza Polisi.

Mu gusoza twavuga ko, muri iyi nyandiko twashatse gutanga, ku buryo bwihuse, umusanzu wacu w’ibitekerezo kugira ngo turebe uko impanuka zihitana abantu zakumirwa cyangwa zikagabanuka. Birumvikana ko ibyo twavuze bishobora gukenera irindi sesengura ryimbitse cyangwa ubushakashatsi bwafata igihe. Ariko ni ngombwa ko, mu buryo bwihuse hagomba kugira igikorwa, nk’uko Umukuru w’igihugu yabivuze, kugira ngo abantu bo gukomeza gupfa bazira ubusa.

Ikindi kandi, ibyemezo byaramuka bifashwe biraboneka ko byasaba n’ubundi bufatanye bw’izindi nzego zinyuranye z’igihugu kugira ngo bishobore kujya mu bikorwa.

Dr GASANA Sébastien
Sociologue
INATEK (Institute of Agriculture, Technology and Education of Kibungo)


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza