Iterambere ry’ Umujyi wa Kigali rikwiye kujyana n’ubwiyongere bw’ibikorwa remezo

Yanditswe na
Kuya 29 Nzeri 2014 saa 01:03
Yasuwe :
1 0

Nk’uko bigaragarira buri wese mu bageze mu Murwa Mukuru w’u Rwanda ari wo Kigali, cyane cyane ku bari bazi uwo mujyi mbera ya 1994, isura yawo yarahindutse cyane. Kigali iratera imbere ku buryo butagibwaho impaka. Amazu yo mu rwego rwo hejuru yarubatswe n’andi arimo arubakwa, imihanda myiza iriyongera ubutitsa, umuriro w’amashanyarazi usa n’uwageze kuri bose, n’ibindi n’ibindi. Akarusho ka Kigali, ni uko ubu ari umujyi umaze kumenyekana hirya no hino ku Isi nk’umujyi urangwa n’isuku.
Nk’uko (...)

Nk’uko bigaragarira buri wese mu bageze mu Murwa Mukuru w’u Rwanda ari wo Kigali, cyane cyane ku bari bazi uwo mujyi mbera ya 1994, isura yawo yarahindutse cyane. Kigali iratera imbere ku buryo butagibwaho impaka. Amazu yo mu rwego rwo hejuru yarubatswe n’andi arimo arubakwa, imihanda myiza iriyongera ubutitsa, umuriro w’amashanyarazi usa n’uwageze kuri bose, n’ibindi n’ibindi. Akarusho ka Kigali, ni uko ubu ari umujyi umaze kumenyekana hirya no hino ku Isi nk’umujyi urangwa n’isuku.

Nk’uko abahanga mu byerekeranye n’imibanire y’abantu mu mijyi (Sociologie urbaine) babivuga, bimwe mu biranga umujyi, muri rusange, harimo umubare munini w’abantu baba batuye ku buso buto; ni ukuvuga ko ubucucike buba buri hejuru, abatuye umujyi ahanini baba batunzwe n’ibyo bakora bitari ubuhinzi n’ubworozi, ahubwo bishingiye kuri za serivisi, kuba haboneka ibikorwa remezo byinshi, ugereranije n’ibindi bice by’igihugu, n’ibindi umuntu atakwirirwa arondora.

Iyo umuntu arebye imijyi minini yo mu bihugu byateye imbere mu bukungu no mu majyambere, usanga nk’ibibazo by’imihanda, amazi meza, umuriro w’amashanyarazi, itumanaho bisa n’aho byakemutse burundu. Nyamara na ho ukahasanga, muri rusange, ibindi biterwa n’ibura ry’amacumbi ahagije (ndetse n’abonetse akenshi akaba ahenze cyane), imodoka nyinshi ku masaha amwe n’amwe zikabyiganira mu mihanda, hatirengagijwe n’ibibazo bya parking n’ibindi nk’ibyo.

Kigali nayo iragenda iturwa cyane. Mu myaka 20 ishize, Umurwa Mukuru w’u Rwanda usa n’uwakubye inshuro hafi eshanu abaturage wabarirwaga mbere y’i 1994; kuko imibare itangwa ubu yemeza ko Kigali ituwe n’abantu bangana cyangwa barenze miliyoni imwe.

Kimwe n’ahandi, uretse impamvu zihariye zijyanye n’amateka y’u Rwanda, abantu bakururwa n’uko mu mijyi, na Kigali irimo, haba habarirwa imirimo myinshi kandi inyuranye, bityo bigakurura abakozi (uretse ko hari n’abatabona akazi, kubera impamvu zinyuranye umuntu atasesengura muri iyi nyandiko ngufi), kuba umujyi ari isoko ry’ibintu byinshi kandi binyuranye, kuko umujyi uba utuwe n’abantu benshi bava ahantu hatandukanye, ndetse baturutse mu bice binyuranye by’imibanire n’imibereho y’abantu (icyo twakwita catégories socio-professionnelles/ socio-professional categories), tutibagiwe n’uko abantu baba bashaka no kwiyorohereza ubuzima, bakoresha bimwe muri ibyo bikorwa remezo bikunze kuboneka ahanini mu mijyi kuruta mu byaro, hakiyongeraho n’ibyerekeranye no kwidagadura (loisirs/ leisure) nabyo, muri rusange, bikunze kwiganza mu mijyi cyane kurusha ahandi.

Uko ibintu bimeze rero, kuko Kigali iboneka nk’umujyi urimo gukura vuba (kandi ugikomeza), hari byinshi mu bibazo bigenda bikemuka, ariko hari n’ibindi bitaratungana burundu, ndetse n’ibindi bizakomeza kwiyongeraho, uko umubare w’abatuye, n’abagenda Kigali uzakomeza kwiyongera.

Muri aka kanya ntabwo tugambiriye gusesengura birambuye ibyo byose, ariko muri macye, twagira icyo tuvuga ku byerekeye kubona amazi meza, gutwara abantu (transport) muri Kigali, ndetse n’ikibazo cy’imiyoboro y’amazi y’imvura, muri iki gihe.

Amazi meza...

Ku byerekeye iboneka ry’amazi meza muri Kigali y’ubu, ntawe utabona ko yiyongereye kubera ko n’umubare w’abatuye Kigali wiyongereye. Ariko biragaragarira buri wese ko amazi adahagije na gato. Hari ibice byinshi by’umujyi abaturage batabona amazi mu bihe binyuranye. Igihe cy’izuba biboneka ko amazi nyine aba yabaye make, ariko kandi n’iyo imvura igwa nabwo amazi akabura bitewe n’uko ngo, nk’uko ababishinzwe bakunze kubivuga, isuri iba yangije imiyoboro y’amazi. None se ubwo amazi ahagije yaboneka mu bihe bihe by’ikirere cy’u Rwanda?!

Ni ngombwa rwose ko ikibazo cyo kubona amazi meza kandi ahagije cyakemurwa vuba, ari muri Kigali n’ahandi, kuko amazi meza ari isoko y’ubuzima. Byagorana kuvuga no kugira isuku, ku mubiri, aho dutuye no ku byo dukoresha, tudafite amazi meza.

Ikindi kandi rero, ayo mazi ntatangwa ku buntu, ahubwo arishyurwa. Bikaba bivuze ko n’uwashora imari ye mu kubonera no guha abantu amazi meza tutashidikanya ko, mu gihe giciriritse cyangwa kirambye, yabibonamo inyungu (cyane cyane ko nta gihe amazi azaba adakenewe).

Iyo amazi yabuze, mu gice iki n’iki cy’umujyi, abantu bagafata ibivomesho bakajya kuyashaka aho ari bitanga isura mbi kuri Kigali nk’umujyi ukaba n’Umurwa mukuru w’u Rwanda ndetse bikanabangamira, muri rusange, imibereho myiza y’abatuye mu bice bitabonekamo buri gihe amazi ahagije.

Ikibazo cyo gutwara abantu ku buryo bwa rusange (transport public)

Ikibazo cyo gutwara abantu muri Kigali, cyane cyane ku masaha imirimo itangirira cyangwa irangiriraho ku munsi w’akazi, nacyo kiri mu bihangayikisha benshi. Uko abatuye Kigali biyongera ni nako umubare w’imodoka z’abantu ku giti cyabo wiyongera.

Ibi rero bitera ibibazo mu gutwara abantu kuko imihanda idashobora kwiyongera nk’uko abaturage n’imodoka ziyongera. Iki ariko si ikibazo cy’umwihariko k’ u Rwanda, kuko kiboneka n’ahandi henshi ku Isi, mu mijyi itandukanye.

Umuntu yavuga ko mu gushaka umuti wakemura cyangwa wagabanya ubukana bwacyo bisaba kubanza kugisesengura neza bihagije kuko uretse ubwinshi bw’imodoka zihariye z’abantu ziba zihuriye mu mihanda ku masaha amwe, ubucye bw’izitwara abantu ku buryo bwa rusange, n’ibindi, hashobora kuba hazamo n’uburyo butanoze cyane bwo gushyira izo modoka kuri gahunda, ndetse n’ibindi.

Kubona igisubizo gihamye kandi kirambye ku kibazo cyo gutwara abantu n’ibintu mujyi wa Kigali ntabwo byoroshye, kuko nta wabuza abantu kugura imodoka zabo bwite no kuzikoresha igihe bashakiye, ariko hari bimwe byakorwa kugira ngo ubukana bwacyo bugabanuke.

Muri byo harimo...

Gushishikariza abantu gukoresha imodoka za rusange zitwara abantu (ariko bigasaba ko iyo gahunda ikora neza); Kongera imihanda ikoze neza mu duce tunyuranye tw’umujyi (kugira ngo abantu badahurira mu bihe bimwe ku mihanda imwe imenyerewe cyane); Gushyira za parikingi zinyuranye mu mpande nyinshi z’inkengero z’umujyi (kugira ngo abantu bahasige imodoka zabo bwite bakoreshe iza rusange); Gushishikariza ibigo na serivisi zinyuranye gushyiraho gahunda yo gutwara abakozi mu modoka rusange z’ibyo bigo (igihe abakozi baza cyangwa bava ku kazi), n’ibindi.

Gufata no kuyobora amazi y’imvura biracyari ikibazo...

Bitewe n’uko umujyi waguka vuba (nabyo ariko birasaba ubushishozi kuko ubutaka bugenda buba bucye), amazu n’imihanda bikiyongera, ndetse hagakubitiraho n’imiterere-kamere y’ahantu umujyi uri dore ko Kigali yubatse ahanini ku dusozi tunyuranye; ibi byose bituma igihe cy’imvura amazi aba menshi cyane kandi akamanuka ari menshi, ndetse afite ingufu nyinshi ku buryo yangiza byinshi, akaba yanahitana abantu.

N’ubwo hari ibikorwa, ni ngombwa gukomeza kunoza imyubakira mu duce twose tw’umujyi. Abantu ntibagomba kubaka amazu meza ariko ngo bibagirwe kwita kuri icyo kibazo cy’amazi y’imvura.

Gukora imiyoboro y’amazi y’imvura biri mu byihutirwa kuko uretse n’ibyo yangiza, uko igihe kigenda ni ko imivu y’amazi atemba igenda yaguka kugeza ubwo iba ruhurura usanga hamwe na hamwe ziteye ubwoba.

Kubera ko Abanyarwanda bifuza ko Umurwa mukuru w’igihugu cyabo ukomeza kuba irembo ry’u Rwanda ni ngombwa gukomeza kuwuteza imbere no kuwusukura kugira ngo ukomeze kubatera ishema no kubahesha agaciro. Ese buriya uwakwifashisha umuganda w’Abanyarwanda na cya kigega cy’Agaciro bishyiriyeho ntibyafasha kugenda hakemurwa nk’ibyo bibazo by’ibura ry’amazi muri Kigali. Ndibwira ko, mu gihe kirambye, uwo mushinga Abanyarwanda ndetse n’abatuye u Rwanda bose bawungukiramo.

Mu gusoza iyi nyandiko, twavuga ko twifuje kuvuga ku birebana n’ikura ryihuta rya Kigali, Umurwa Mukuru w’u Rwanda, ndetse na bimwe mu biranga Kigali nk’umujyi, ndetse na bimwe mu bibazo biboneka kandi bigomba cyangwa birimo gushakirwa ibisubizo ku buryo bwihutirwa cyangwa burambye.

Dr Gasana Sébastien
Umwarimu muri Kaminuza


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza