Afurika ntiyatsinda Coronavirus ibyifashije

Yanditswe na Teddy Kaberuka
Kuya 29 Werurwe 2020 saa 10:50
Yasuwe :
0 0

Isi yugarijwe n’icyorezo cya COVID-19 cyatangiye mu kwezi kwa kumi na kumwe mu 2019 mu Mujyi wa Wuhan mu Bushinwa, kimaze gufata ibihugu birenga 140 ku Isi, harimo 44 byo muri Afurika n’u Rwanda rurimo; ibihugu byose bishishikajwe no guhagarika ikwirakwizwa ryacyo.

Nk’uko imibare ibigaragaza, abantu bamaze kwandura ku Isi barenga ibihumbi 620 , naho mu Rwanda ni 60. Nyuma y’aho umuvuduko w’icyorezo cya COVID-19 ukomereje mu bihugu by’i Burayi, Amerika na Afurika; ubu ibihugu bya Afurika byafashe ingamba zitandukanye zo guhagarika ikwirakwizwa ry’icyorezo cya COVID-19.

Ingamba zafashwe zirimo gufunga imipaka y’ibihugu, guhagarika ingendo zo mu kirere, gusaba abaturage kuguma mu ngo, kwigisha abaturage gukaraba intoki n’isabune n’ibindi.

Iyi ndwara imaze guhitana abantu bagera ku bihumbi 30 ku Isi, abenshi ni abo mu Butaliyani kuko barenga ibihumbi 10, Espagne n’u Bwongereza naho mu Rwanda nta muntu n’umwe urahitanwa nayo.

Iyi virus ihangayikishije cyane kubera ko indwara ya COVID-19 itagira umuti cyangwa urukingo. Kuva icyorezo cyatangira, Ishami ry’Umuryango w’Abibumbye ryita ku Buzima, OMS, ryatangiye gufasha za leta zo muri Afurika kubona ibikoresho byo gupima COVID-19, guhugura abaganga no kunoza uburyo bwo gukurikirana ibyorezo.
Kuri ubu, ibihugu byose bya Afurika bishobora gupima COVID-19, mu gihe iki cyorezo kigitangira, ibihugu bibiri gusa nibyo byari bifite ubushobozi bwo kupima.

Nubwo COVID-19 idafite umuti cyangwa urukingo, ibihugu bikize byamaze gutangira ubushakashatsi butandukanye bugamije kuvumbura imiti cyangwa urukingo.

Ku wa Kane itariki 26 Werurwe 2020, inama y’ibihugu bikomeye mu bukungu G20 yarateranye ikoresheje iyakure, iganira ku ngamba zafatwa zigamije gukemura ikibazo cya COVID-19 n’ingaruka zacyo.

Mu myanzuro yafashwe, harimo gutanga amadolari ya Amerika miliyari ibihumbi bitanu ($5 trillion). Aya mafaranga agamije kurwanya icyorezo haboneka ibikoresho bihagije, hakorwa ubushakashatsi kandi n’ibikorwa by’ubukungu bitezwa imbere hagamijwe kwirinda icyahungabanya ubukungu nyuma y’icyorezo cya COVID-19.

Uretse ingamba zafashwe n’ibihugu byo muri G20, ibihugu bitandukanye byashyizeho ingamba zo guhangana n’ingaruka za COVID-19; muri byo harimo nka Amerika aho Inteko Ishinga Amategeko yatoye itegeko rigena miliyari ibihumbi bibiri z’amadolari zizakoreshwa mu guhangana n’ingaruka za COVID-19 mu bukungu.

Naho mu Bwongereza, leta yatangaje ingamba enye zijyanye n’ingengo y’imari yo guhangana n’ingaruka za Covid-19. Umuryango w’ibihugu by’i Burayi (EU) washyizeho ingamba zorohereza imisoro mu guhangana n’ingaruka za Covid-19.
Kuva icyorezo cyagera muri Afurika, nta bikorwa biratangazwa n’Umuryango wunze Ubumwe bwa Afurika (African Union) cyangwa imiryango y’uturere yo muri Afurika nka COMESA, SADC, EAC na ECOWAS igaragaza ingamba zifatika zo kurwanya icyorezo cya Covid-19.

Uko guceceka kw’ibihugu n’imiryango ya Afurika bituma umuntu yibaza niba igusubizo cyo guhashya COVID-19 cyaturuka muri Afurika.

Kuba nta gahunda kugeza ubu igaragara ifatwa n’ibihugu bya Afurika ku bijyanye n’ubushakashatsi bugamije kuvumbura umuti cyangwa urukingo, byiyongeraho ko no mu busanzwe, ibihugu bya Afurika bifite ibikorwa by’ubuvuzi bikiri hasi cyane kandi bigenerwa ingengo y’imari iri hasi.

COVID-19 izasiga ingaruka zikomeye ku bukungu bwa Afurika bwari busanzwe bucumbagira. Zimwe mu ngaruka twavuga ni ubukerarugendo n’amahoteli azahungabana, ubucuruzi n’ishoramari hamwe n’ubushomeri buziyongera cyane ku rubyiruko n’abagore.

Kuri izo ngaruka, hiyongeraho ikibazo cy’ibihugu byinshi bya Afurika bisanganywe imyenda iremereye bibereyemo ibihugu bikize hamwe n’ibigo mpuzamahanga by’imari.

Kugira ngo ibihugu bibashe kwikura mu bibazo by’ubukungu bizaterwa n’icyorezo cya COVID-19, bizasaba ko haba ingamba z’ubukungu zihambaye ziteza imbere ubukungu bw’imbere mu gihugu.

Izo ngamba zigomba gushingira kuri politiki y’umusoro yorohereza ibikorwa by’ubucuruzi n’ishoramari, gufasha ibigo by’imari gutanga inguzanyo ku buryo bworoshye no gufasha abaturage batishoboye kubona ibikenerwa by’ibanze mu mibereho yabo.

Uretse gushyiraho ingamba zo gukaraba intoki n’isabune, gusaba abaturage kuguma mu ngo no gufunga imipaka y’ibihugu; nk’uko bikorwa n’indi migabane, Afurika ikeneye no gushyira ingengo y’imari mu bushakashatsi bw’imiti n’urukingo kugira ngo icyorezo cya COVID-19 gihagarare noneho ubukungu bwongere buzamuke.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .