00:00:00 IGIHE NETWORK KN KINYARWANDA EN ENGLISH FR FRANCAIS

Amateme 12 ateye amabengeza ku isi; harimo rimwe ryo mu Rwanda

Yanditswe na

Ange Mukaneza

Kuya 6 May 2016 saa 11:28
Yasuwe :

Turi mu isi y’imisozi miremire n’imigufi, ibibaya, amashyamba, inzuzi n’imiturirwa miremire, ikoranabuhanga rikataje rigena uburyo bwo kubyambukiranya kuva hamwe ujya ahandi, hakanahangwa inzira mu buhanga bwo buhanitse kandi mu buryo bwitondewe.

Abahanga mu bwubatsi bashyizeho uburyo bambukiranya ibyo byiza byose bitatse Isi, harimo amateme yubatswe mu kinyejana cya 13 mbere ya Yezu n’ubu akiriho mu Bugereki, hakifashishwa amabuye, imigano n’ibiti bikomeye. Mu rwa Gasabo ho hahanzwe iteme urambagiraho witegereza ibyiza bitatse Pariki y’Igihugu ya Nyungwe.

Ku rutonde rw’amateme ibihumbi yubatse ku Isi kuva mu mateka yo hambere, nubwo higanzamo ay’ i Burayi na Aziya, washyiramo n’iryo mu Rwanda rifite umwihariko muri Afurika y’u Burasirazuba.

Puente Laguna Garzon

Puente Laguna Garzon ni iteme rihereye mu gace ka Garzón mu Majyepfo ashyira uburasirazuba bwa Uruguay, muri Amerika y’Epfo.

Iri teme ryashushanyijwe na Rafael Viñoly ryubatse nk’uruziga (circular brigde) aho hagati umuntu aba abona amazi.

Iri teme rihuza imijyi ya Rocha na Maldonado ricaho imodoka zisaga 1000 ku munsi ndetse n’abanyamaguru. Mbere y’uko ryubakwa abantu bambukaga bifashishije ibiti.

Sarajevo Bridge

Iteme rya Sarajevo (Sarajevo Brigde) riri kubakwa mu Mujyi wa Barcelone muri Espagne. Ryashushanyijwe kandi imirimo yo kuryubaka iri gukorwa na BCQ Arquitectura Barcelona mu rwego rwo gusimbura iryari rihasanzwe.

Agashya kiri teme ni uko rizashyirwaho utubuye duto twaka (photoluminescent stones) mu rwego rwo kumurikira abazarinyuraho hatiriwe hakoreshwa umuriro w’amashanyarazi.

Ikindi kizakorwa ni uko hazashyirwaho uburyo bwo guhindura imyanda mu bindi bintu bidafite icyo byangiza.

Cirkelbroen

Iryo teme rya Cirkelbroen riherereye i Copenhagen muri Denmark.

Olafur Eliasson warishushanyije avuga ko yakuye inganzo ku mateka y’uyu mujyi yo kuba uzwi nk’icyambu. Iyo witegereje iki kiraro neza ubona ari nk’amato menshi ari ku cyambu.

Zhangjiajie Canyon Bridge

Irindi teme ritangaje rigaragara kuri uru rutonde ni iteme rya Zhangjiajie Canyon (Zhangjiajie Canyon Bridge) riherereye mu Bushinwa.

Iri teme ryubatse mu Mujyi wa Zhangjiajie ryashushanyijwe na Haim Dotan riteganyijwe kuzura neza muri uku kwezi ni ryo rya mbere ku Isi rifite indiba ifite igice kinini kigizwe n’ibirahure (glass-bottomed bridge).

Uretse kuba ryitezweho kuzajya risurwa n’abantu batandukanye, rifite metero zisaga 21 z’ubugari n’izisaga 218 z’uburebure rizajya rikoreshwa mu kumurika imideli no gusimbuka imigozi.

Nine Elms Bridge

Ku rutonde rw’amateme atangaje kandi hazaho iteme rya Nine Elms (Nine Elms Bridge) riherereye mu Mujyi wa Londres mu Bwongereza.

Rizubakwa mu gace ka Pimlico kari mu majyepfo ya Londres n’ikigo cy’ubwubatsi cyo muri Danemark cyitwa Bystrup.

Nubwo iri teme ritangaje bitewe n’uburyo inzira z’abanyamaguru zizubakwa zimeze nk’izihese (curving structure) hari impungenge ko imirimo yo kuryubaka izangiza ubusitani bwa Pimlico kandi ari ho honyine hagaragara ibyatsi bitoshye muri aka gace.

Garden Bridge

Iteme rya Garden naryo rizubakwa ku mugezi wa Thames mu Mujyi wa Londres mu Bwongereza.

Thomas Heatherwick wakoze igishushanyo mbonera cyaryo avuga ko inganzo yayikuye muri film ya Titanic yabiciye bigacika, mu gice kigaragaza Jack ajyana Roza imbere ku bwato areba mu mazi neza ubundi akavuga ko ari umwami w’isi.

Iri teme rizatangira kubakwa muri uyu mwaka rikazuzura muri 2018, ryitezweho gukurura abakundana bifuza gukora nk’ibyakozwe na Jack na Roza.

Danjiang Bridge

Danjiang Bridge n’iteme ryatangiye kubakwa mu Murwa Mukuru wa Taiwan, Taipei.
Ryashushanyijwe na Zaha Hadid Architects. Nirimara kuzura rizaba ari wo munara muremure ku isi ufashwe n’imigozi.

Lucky Knot Bridge

Uru rutonde kandi rugaragararo iteme rya Lucky Knot ryubatswe mu mujyi wa Changsha mu Bushinwa.

Iri teme ryubatswe n’ikigo Next Architects biteganyijwe ko rizatangira gukoreshwa mu mpera z’uyu mwaka. Izina n’imiterere yaryo bituruka ku buryo Abashinwa bakora imiteguro mu mapfundo bijyana n’amahirwe.

Sölvesborg Bridge

Sölvesborg Bridge naryo n’irindi teme rigaragara kuri uru rutonde rikaba ryubatse i Sölvesborg muri Suède.

Iri ryashushanyijwe na Ljusarkitektur ni ryo rya mbere rifite inzira y’abanyaguru ngali kuko ifite metero zisaga 755.

Umwihariko waryo ni uburyo urumuri rwaryo ruboneka hifashishijwe amatara ahinduranya amabara (Light Emitting Diode, LED).

Helix Bridge

Kuri uru rutonde kandi hazaho iteme rya Helix (Helix Bridge) rihereye Marina Bay muri Singapore. Ryatangiye gukoreshwa mu 2010, icyo gihe nicyo kiraro cyari cyubatse ku buryo ubona kigenda kisubiramo (double helix).

Uburyo cyubatse byashakaga gusobanura ubuzima, kongera kwiyuba no gutera imbere.

Køge North Station

Køge North Station naryo n’irindi teme riri kubakwa mu Mujyi wa Køge muri Denmark.
Iri teme ryashushanyijwe na COBE Architects Dissing ifatanyije na Weitling na COWI rifite inzira za Gari ya moshi, imodoka n’inzira z’abanyamaguru.

Biteganyijwe ko rizatangira gukoreshwa mu 2018.

Nyungwe Canopy Walk

Ntabwo dushobora gusoza urutonde rw’ibiraro byiza kandi bitangaje tutavuze ikiraro cyo mu kirere giherereye muri pariki ya Nyungwe (Nyungwe canopy walk) mu Burengerazuba bw’u Rwanda.

Iki kiraro cyo mu kirere giherereye kuri metero zisaga 70 uvuye hasi ku itaka nicyo cya mbere kirekire muri Afurika y’Uburasirazuba.

Uburebure n’imiterere yacyo bituma ukigendaho arushaho kunezerwa kuko aba yumva ari bishya ndetse akabasha no kwitegera ibyiza bitatse iri shyamba ribitse ubwoko bw’inyoni busaga 280.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .