00:00:00 IGIHE NETWORK KN KINYARWANDA EN ENGLISH FR FRANCAIS

Ku Kirenge cya Ruganzu, hafunguwe ikigo ndangamuco

Yanditswe na

Mihigo Jean Baptiste

Kuya 27 September 2015 saa 07:34
Yasuwe :

Mu Karere ka Rulindo mu Murenge wa Rusiga ahazwi nko ku Kirenge, hatashywe ku mugaragaro ikigo ndangamuco, Rulindo Cultural Center, kitiriwe ‘Ikirenge cya Ruganzu’, hakaba hakubiyemo ibikoresho n’inzu biranga umuco nyarwanda.

Kuri uyu wa 27 Nzeli, ku munsi mpuzamahanga wahariwe ubukerarugendo ku Isi hose, ku bufatanye n’Ikigo cy’Igihugu gishinzwe Iterambere, RDB, Akarere ka Rulindo kafunguye ku mugaragaro ikigo ndangamuco cyubatse mu Murenge wa Rusiga, ahitwa ku Kirenge, aho bavuga ko umwami Ruganzu yakandagiye ku rutare ikirenge cye gisigara kishushanyijeho.

Minisitiri w’Umuco na Siporo, Uwacu Julienne, niwe wafunguye ku mugaragaro iki kigo.

Muri uyu muhango, Kangwage Justus, umuyobozi w’Akarere ka Rulindo yavuze ko iki kigo kigaragaza amwe mu mateka y’aka karere.

Yagize ati: “Rulindo ni akarere kabumbatiye amateka y’u Rwanda kuko umwami Ruganzu ari ho yakandagiye ku rutare ikirenge gisigara kishushanyijeho. Ikindi kandi kuri uyu musozi hari ibiti byitwa “Ibiti by’Imana” bimaze imyaka irenga 200, turasaba RDB ko yadufasha ikahamenyekanisha, ba mukerarugendo bakajya bahasura bityo tukinjiza amadevize.”

Minisitiri w’umuco na siporo, Uwacu Julienne, yasabye uturere twose two mu Rwanda ko twakwigira ku ka Rulindo, natwo tukubaka ibigo ndangamuco, kuko ngo hafi ya hose mu Rwanda hari ahantu henshi hafite amateka akomeye.

Kariza Belise, Umuyobozi ushinzwe ubukerarugendo muri RDB, yavuze ko iki kigo ndangamuco cya Rulindo cyashyizwe ku rutonde rw’ahantu nyaburanga bashishikariza ba mukerarugendo gusura, bityo bikazafasha aka karere kwinjiza amadevise.

Yagize ati: “Nka RDB twihaye intego yo guteza imbere ahantu nyaburanga hashingiye ku muco, ni kubera iyo mpamvu rero twaje kwifatanya n’akarere ka Rulindo gutaha iki kigo ndangamuco ari nako twizihiza umunsi mpuzamahanga wahariwe ubukerarugendo ku Isi.”

Kangwage Justus, Umuyobozi w’Akarere ka Rulindo, yasabye RDB na Minisiteri y’Umuco na Siporo ko babafasha bakagarura urwo rutare rwishushanyijeho ikirenge cya Ruganzu, kuri ubu ruri mu ngoro y’umurage y’i Huye.

Minisitiri Uwacu Julienne na Kariza Belise, Umuyobozi ushinzwe ubukerarugendo muri RDB bamusubije ko bazabyigaho bakareba ukuntu barugarura aho rwavuye mu Karere ka Rulindo mu rwego rwo kugira ngo n’abazajya basura iki kigo, bajye babasha kubona aho icyo kirenge cya Ruganzu kishushanyije.

Iki kigo ndangamurage cyitiriwe ‘ikirenge cya Ruganzu’ cyubatswe mu Murenge wa Rusiga, ahazwi nko ku Kirenge.

Iki kigo kiri ku buso bungana na hegitari 6, ariko kikaba kicyagurwa uko ubushobozi buzagenda buboneka.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .