U Rwanda rwashyizwe ku rutonde rw’ahantu heza ho gusura mu 2019

Yanditswe na Mukaneza M.Ange
Kuya 27 Ukuboza 2018 saa 07:14
Yasuwe :
0 0

U Rwanda rwaje ku rutonde rwakozwe n’ikinyamakuru Forbes, rugaragaza ahantu heza buri wese akwiye gusura mu mwaka utaha wa 2019, akaba yizeye kugira ibihe atazigera yibagirwa.

Ni urutonde rwakozwe nyuma yo kugenzura ibirebana n’ibishya biri aho hantu, umutekano, ibikwiye gusurwa bitarakendera, ibizagusigira urwibutso n’impinduka zikomeye mu buzima bwawe.

Mu gukora uru rutonde umunyamakuru wa Forbes ufite ubunararibonye mu birebana n’inkuru zivuga ku bukerarugendo yanifashishije inararibonye zikora mu bigo bitegura ingendo, dore ko ari nabo baba bazi aho bahanze amaso bifuza ko ababagana berekeza.

Dore ahantu ukwiye gusura mu 2019

Ibirwa bya Azores

Ku mwanya wa mbere w’uru rutonde rukurikije itonde ry’inyuguti haza ibirwa bya Azores muri Portugal biherereye hagati mu nyanja ya Atlantique.

Melissa Biggs Bradley washinze ikigo Indagare yavuze ko kuri ibi birwa uhasanga ibiyaga biri hejuru y’ibirunga, inkengero z’inyanja zifite umucanga w’umukara, amashyuza n’ibindi byiza byinshi.

Uwasuye ibi birwa ashobora gukora ibikorwa bitandukanye birimo kurira imisozi, kwitegereza amafi manini yo mu bwoko bwa whale, kayaking, imikino yo kugendera ku mazi no kwibira mu mazi hifashishijwe imashini zabugenewe.

Ibirwa bya Azores muri Portugal bifite ibiyaga biri hejuru y'imisozi

Uburasirazuba bwa Bhutan

Nubwo abantu benshi bamaze kumenyera gusura ubwami bwa Bhutan buri mu majyepfo ya Aziya, wasangaga akenshi bigira mu bice bizwi biri mu Burengerazuba no hagati muri iki gihugu.

Kuri ubu ngo Uburasirazuba niyo mahitamo meza ku bifuza kugira ibihe ntagereranywa. Mu bikorwa ushobora gukora muri aka gace harimo gusura agace k’abasekuruza b’umuryango w’i bwami, n’uduce twa Merak na Sakten dutuwe n’abaturage bafite umuco wihariye.

Mu burasirazuba bwa Bhutan hari ibyiza byinshi birimo inyubako zibereye ijisho

Los Cabos

Kuri uru rutonde kandi hazaho agace ka Los Cabos muri Mexique, kagizwe n’inyubako nziza zigezweho zubatswe ku nkengero z’inyanja.

Cabo San Lucas na San José del Cabo, Imijyi ibiri y’aka gace imaze kumenyekana kubera uburyo isurwa n’abakerarugendo bashimishwa no kumara umwanya baroba, bitegereza amafi manini ya whale ndetse n’ibirori bitandukanye bikunda gutegurwa mu masaha y’ijoro.

Kwitegereza ibifi binini bizwi nka Whale ni bimwe mu bikurura ba mukerarugendo bajya mu gace ka Los Cabos muri Mexique

Colombia

Ibindi bihugu ushobora gusura mu 2019, ni Colombia itangiye gusurwa na ba mukerarugendo nyuma y’uko mu 2017, Juan Manuel Santos wari perezida ahawe igihembo cy’amahoro cyitiriwe Nobel, abantu bagatangira kwizera umutekano nyuma y’imyaka 52 hari intambara y’abasivili.

Nubwo ngo ba mukerarugendo bataritabira kuhasura cyane, mu bice bihanzwe amaso harimo umurwa mukuru Bogotá, uzwiho kugira umwihariko w’amaresitora menshi ategura amafunguro aryoshye kandi akundwa muri Amerika y’Amajyepfo n’inyubako zo mu bihe bya kera.

Katederali ya Las Lajas yubatswe nk'ikiraro iri mu byo wasura muri Colombia

Ethiopia

Nk’uko Biggs Bradley abishimangira, Ethiopia nayo ntukwiye gucikwa no kuyisura mu 2019 kuko uzarushaho kugira amahirwe yo gusobanukirwa byimbitse isano iri hagati y’Abakirisitu, Abayahudi n’Abayisilamu binyuze mu muco w’abatuye iki gihugu.

Muri iki gihugu kandi habarizwa insengero n’inyubako zubatswe mu kinyejana cya kane n’icya gatanu ndetse n’uduce dutuwe n’amoko y’abaturage bamaze ibinyejana byinshi babaho mu buryo bwihariye.

Uru rusengero rwubatswe mu gace ka Lalibela ni kimwe mu byiza bitatse Ethiopie ushobora gusura

Madagascar

Madagscar iza ku mwanya wa kane mu birwa binini ku Isi, igizwe n’ubwoko butandukanye bw’ibimera n’inyamaswa bituma uwahasuye agira ibihe bitazibagirana.

Mu bikorwa ushobora gukora muri iki gihugu harimo kurira imisozi igizwe n’ibibuye binini nka pariki ya Tsingy de Bemaraha, gusura inyamaswa zizwi nka ‘lemur’ zituriye mu mashyamba ya Madagascar n’ibindi.

Izi nyamaswa zizwi nka lemur ziri mu byo wasura muri Madagascar

Mongolia

Uru rutonde kandi rugaragaraho Mongolia igizwe n’imirambi n’abaturage bafite umuco wo guhora bimuka (nomade), ndetse ikaba izwi cyane kubera ibikorwa by’ubugeni bugaragaza amateka ya kera ashingiye ku ngoma za cyami.

Ikibumbano cya Genghis Khan washinze ndetse akaba Umwami w'abami wa Mongolia ni kimwe mu byiza bitatse iki gihugu

Pakistan

Ku rutonde rw’ahantu heza ho gusura umwaka utaha kandi haza Pakistan, by’umwihariko ibibaya bya Hunzam Shigar na Khaplu biherereye mu majyaruguru ashyira iburasirazuba bw’iki gihugu.

Ushobora kandi gusura inyubako ya Sheesh Mahal yubatswe mu 1632, yubatswe hifashishijwe amabuye atandukanye n’indorerwamo zagiye zishyirwa mu bikuta ariko mu buryo bunogeye ijisho.

Inyubako ya Sheesh Mahal ni imwe mu zisurwa muri Pakistan

U Rwanda

U Rwanda rutatswe n’imisozi 1000 irimo ibyiza nyaburanga bitandukanye rwaje kuri uru rutonde rw’ahantu heza hasurwa mu 2019 ahanini kubera imbaraga zashyizwe mu kubungabunga urusobe rw’ibinyabuzima.

Bradley avuga ko ibi byaje byiyongera ku buryo bwihariye bwo gusura inyamaswa zitandukanye ziba muri pariki zirimo ingagi zo mu birunga.

Mu Rwanda kandi hakomeje kubakwa hoteli n’amacumbi ari ku rwego rwo hejuru, afasha abarusuye kwirebera ibyiza birutatse bibereye aho bacumbitse.

Muri izi hotel twavuga nka Bisate Logde aho uyirimo aba yitegeye ibirunga neza, One&Only Nyungwe House yubatse mu nkengero z’ishyamba rya Nyungwe na Magashi izafungura imiryango mu minsi ya vuba muri Pariki y’Igihugu y’Akagera.

Bisate Logde yubatse ahitegeye ibirunga iri mu byishimirwa na ba mukerarugendo

Turikiya

Nyuma y’igihe abantu benshi badasura Turikiya kubera umutekano muke, kuri ubu ngo ba mukerarugendo batangiye kujyayo ku bwinshi aho mu bikorwa bishimira gukora harimo kwibira mu mazi (scuba diving), kuroba, no gusura inyubako zo mu bihe bya kera zagiye zisenyuka zirimo ingoro ya Apollo, n’agace ka Cappadocia karimo inzu zifite udusongero dutangaje.

Mu gihe uri muri Turikiya ushobora gusura ahahoze ingoro y'ikigirwamana cy'Abagereki cyitwaga Apollo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza