Kigali: Uyu mwaka uzasiga ubusitani bwashyizwe ahimuwe inganda bwatangiye kubyazwa umusaruro

Yanditswe na Thamimu Hakizimana
Kuya 29 Ukwakira 2019 saa 10:27
Yasuwe :
0 0

Ubuyobozi bw’Umujyi wa Kigali bwatangaje ko uyu mwaka wa 2019 uzarangira ubusitani bwashyizwe i Gikondo ahimuwe inganda bwiswe “Gikondo Recreation Park” bwatangiye gukoreshwa no kubyazwa umusaruro.

Ibi Umujyi wa Kigali wabitangaje kuri uyu wa Mbere tariki ya 28 Ukwakira 2019,mu kiganiro bwagiranye na IGIHE.

Ubu busitani bwatangiye gushyirwa muri aka gace muri Kamena 2018 ndetse biteganyijwe ko aho bwashyizwe hazaba ari ahantu nyaburanga, ahantu abanya-Kigali n’abatembereye mu murwa mukuru w’u Rwanda bazajya basohokera ariko bakishyura amafaranga make.

Umuvugizi w’Umujyi wa Kigali, Bruno Rangira,yabwiye IGIHE ko igice cya mbere cyo gutunganya ubu busitani cyarangiye.

Yavuze ko umushinga watinze kurangira kubera inyigo Ikigo cy’Igihugu gishinzwe kubungabunga ibidukikije (REMA) ku buryo igishanga cyose cyatunganywa.

Yagize ati “ Hari inyigo iri gukorwa na REMA y’ukuntu kiriya gishanga cyose cyatunganywa cyose. Byasabye ko bigenda gahoro kugira ngo bafate umwanzuro w’igihe bizakorwa.”

Yongeyeho ati “ Ubu turi kuvugana n’abafatanyabikorwa batandukanye bashobora kuhakurikirana kugira ngo aribo bakira abantu bahaza no kuhakorera isuku n’ibindi. Ndumva ibyo aribyo byose mu kwezi gutaha bizaba byatunganye kugira ngo harebwe uko hatangira gukoreshwa.”

Rangira akomeza avuga ko bizeye neza ko uyu mwaka wa 2019 uzarangira buriya busitani bwatangiye gukoreshwa.

Byari biteganyijwe ko muri Kamena uyu mwaka aribwo gusura no gutembera muri ubwo busitani byari gutangira.

Icyiciro cya gatatu cyo gutunganya "Gikondo Recreation Park" kizaba ari icyo kuringaniza ubutaka, gusenya inyubako zihegereye no kuhatunganya ku buryo n’umuntu uri kure azajya abasha kwihera ijisho.

Ubusitani bwa “Gikondo Recreation Park” buzarangira gutunganywa butwaye miliyoni 600 Frw.

Gikondo Recreation Park igizwe n'ubusitani, utuyira, ibiti n'ibindi bizajya bifasha abahatembereye kuruhuka
Umujyi wa Kigali watangaje ko uyu mwaka uzarangira ubu busitani bwa Gikondo bwatangiye kubyazwa umusaruro
Imirimo yo gutunganya iki gishanga cyahozemo inganda irarimbanyije
Byitezwe ko ubu busitani buherereye ahahoze inganda i Gikondo buzarangira butwaye miliyoni 600 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .