U Rwanda ruzarambagiriza ba mukerarugendo mu imurikagurisha rwatumiwemo muri Israel

Yanditswe na IGIHE
Kuya 11 Gashyantare 2019 saa 08:28
Yasuwe :
0 0

U Rwanda rwizeye kunguka umubare w’abarugana binyuze mu Imurikagurisha Mpuzamahanga ry’Ubukerarugendo rizwi nka International Mediterranean Tourism Market (IMTM 2019) rizabera mu Mujyi wa Tel Aviv muri Israel.

Iri murikagurisha riteganyijwe kuba ku wa 12-13 Gashyantare 2019. U Rwanda rwaritumiwemo hashingiwe ku ishoramari ryarwo n’uburyo rufatwa nk’urubereye gukorerwamo ubukerarugendo muri Afurika.

IMTM ni imurikagurisha ryagutse, rimeze nk’igikorwa gihuza abashoramari bakomeye mu bihugu byo mu Burasirazuba bw’Inyanja ya Méditerranée.

Ryitabirwa n’abantu bo mu bihugu 50, abamurika 1720, abari mu buyobozi bw’abafata ibyemezo mu mitegurire y’ibikorwa bikomeye 235 n’abaguzi 18,250.

Mu imurikagurisha rya IMTM, aho u Rwanda ruzamurikira ibikorwa byarwo hari icyapa cya ‘Visit Rwanda’; ruhagarariwe n’Ikigo cy’Igihugu cy’Iterambere (RDB), Ambasade y’u Rwanda muri Israel n’abatwara ba mukerarugendo.

Abazasura ‘Visit Rwanda’ bazasogongezwa ku cyayi na kawa by’u Rwanda, bifite icyanga cyigaruriye benshi.

Ikigo cy’Igihugu gishinzwe guteza imbere Ibikomoka ku Buhinzi n’Ubworozi byoherezwa mu Mahanga (NAEB) cyohereje hanze toni z’icyayi 27 824 zasaruwemo miliyoni $88 mu 2017/2018.

U Rwanda kandi rufata kawa nk’igihingwa kirwinjiriza amadovize menshi. Mu mwaka w’ingengo y’imari wa 2017/2018, umusaruro wa kawa wazamutseho 19%, uva kuri toni 18,439 ugera kuri 21,959,880 zinjije $69,359,159.

Umuyobozi w’Ubukerarugendo no kubungabunga urusobe rw’Ibinyabuzima muri RDB, Mutangana Eugène, yavuze ko kwitabira iri murikagurisha ku nshuro ya mbere ari amahirwe yo kugera ku bantu benshi.

Yagize ati “Usibye inama zizaduhuza n’abashoramari mu by’ubukerarugendo, tuzanagira umwanya aho abantu 70 bayobora ba mukerarugendo bazagaragaza u Rwanda nk’ahantu habereye ishoramari n’ubukerarugendo muri Afurika. Ibi bizazana ubukangurambaga bwo kumenyekanisha umwihariko w’u Rwanda ku barugana bashaka kwidagadura n’abakora ishoramari.’’

Ambasaderi w’u Rwanda muri Israel, Rutabana Joseph, yagaragaje inyungu igihugu kizakura mu butumire cyahawe.

Yagize ati “Kuba u Rwanda ruzitabira imurikagurisha ry’ubukerarugendo rikomeye muri Israel ni amahirwe yo kwinjira ku isoko rya ba mukerarugendo ryaguka bwangu. Ingendo zirenga miliyoni 1.7 zikorwa n’abava muri Israel bajya hanze buri mwaka, ziyongereyeho ku mpuzandengo ya 13%.”

Ibikorwa by’imurikagurisha rimenyekanisha ubukerarugendo bw’u Rwanda byiyongera ku bindi bikomeye birimo amasezerano rwasinye na Arsenal FC yo mu Bwongereza na Film mbarankuru ya Rwanda: The Royal Tour.

RDB igaragaza ko mu 2017 u Rwanda rwinjije miliyoni $438 zivuye mu bukerarugendo, intego ya Guverinoma ni uko mu 2024 inyungu ruvana mu bukerarugendo izagera kuri miliyoni $800.

U Rwanda ruri mu bihugu ba mukerarugendo bizihira gusura. Iyi foto igaragaza bamwe bari gutembera ku kiraro kiri rwagati muri Pariki y'Igihugu ya Nyungwe
Mu Mujyi wa Tel Aviv hari kumenyekanishirizwa ubukerarugendo bw'u Rwanda
Ubukerarugendo bw'u Rwanda buri kwerekanwa muri Israel

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza